ނިކަން ބޮޑު ގޮނޑިއެއްގައި މަންޒަރު ބައްލަވަން އެ އިންނެވީ މާޅޮސް މަޑުލު ދެކުނުބުރީ އަތޮޅުވެރިޔާ ޔޫސުފު ކަލޭފާނެވެ. ރ. މީދޫ ކުމުންދޫ ސޮރުގެ އިބްރާހީމް ދަމަމުންދާ އިރު، ލިޔަމުން އެ ގެންދަނީ ތުޅާދޫ މާމުދިމު އިދުރީސްބެގޭ މުހައްމަދެވެ. އޭރު، ލިޔާ ހަރަށް ޖަހަން ގެންގުޅޭ ތެޔޮފުޅި، އަތަށް ނަގައިގެން، އަތްގޮޑިއާ ވަރަށް ކައިރީގައި، ވަރަށް ކުޑަކުޑަ ފިރހެން ކުއްޖަކު އިނެވެ. އަތުގައި ހުރި ތެޔޮތަކާ އެއްކޮށް އެ ކުއްޖާގެ އަތް އުނގުޅާލީ ރިއްސެޔޮ ލާޖަހަން ފަށާއިފައިވާ ލަކުޑި ގަނޑުގައެވެ. އޭގައި ދެވަނަ ލާފަށް ޖަހަން އުޅެއުޅެ ވެސް އޭތީގެ ވަށައިގެން ލާ ޖެހޭގޮތެއް ނުވިއެވެ. ވަށައިގެން އެނބުރެމުން ދިޔަ ބޮމަކަނދުގައި ހަރުކޮށްފައިވާ ލަކުޑިގަނޑުގައި އޭގެ ފަހުން ލާޖެހެނީ އެއްފަރާތުގައެވެ. ލިޔާ މީހާއަށް ވެސް ދަމާ މީހާއަށް ވެސް އެ ވީގޮތެއް ނޭނގުނެވެ. އެނގޭހައި ވެސް ކަމަކީ އެ ކުޑަ ކުއްޖާ ކޮންމެވެސް ކަމެއް ކޮށްފިކަމެވެ. އެކަމުން އެނގުނީ، ލިޔެލާޖެހުމުގެ މުޅިން އާ ތަޖުރިބާއެއް އެ ދުވަހު ކުރެވުނުކަމެވެ. އެ ތަޖުރިބާގެ މެދުވެރިއަކީ އެ ވަގުތު ލިޔަމުން ގެންދިޔަ މުހައްމަދު އިދުރީސްގެ 10 އަހަރުގެ ފިރިހެން ދަރިފުޅެވެ. އެއީ ބ. ތުޅާދޫ ފެންފިޔާޒުގޭ އަބުދުއްސައްތާރު މުހައްމަދެވެ. އެއީ ތުޅާދޫ މާވަޑި ސައްތާރެވެ.