ބޮޑު ޢީދުގެ ފޯރީގެ އުފަލާއި މަޖަލުގައި މުޅި ތުޅާދޫ އޮތީ ހިނިތުންވެފައެވެ. ރަށުން ބޭރު މެހުމާނުންނާއި ރަށުގެ އެތައް ބަޔަކު ވަނީ އީދުގެ އުފަލުގައި ބައިވެރިވުމަށް ރަށަށް ޖަމާވެފައެވެ. އެ ޖަމާވީހާ ބަޔަކު އުފާކޮށްދިނުމަށް ރަށުކައުންސިލުންނާއި ރަށުގެ ކުލަބުތަކުން ދިޔައީ ހަރަކާތްތެރިވަމުންނެވެ. މި ކަމުގައި އެންމެ ހަރަކާތްތެރި އެއް ކުލަބަކީ ތުޅާދޫ ސިލްވަރ ޝައިން ކުލަބެވެ. ކޮންމެ އަހަރެއްގެ އަޟްޙާ ޢީދަކީ އެ ކުލަބަށް އަންނަ އަހަރީ ޢީދެއް ވެސް މެއެވެ. އެ އުފާތަކުގައި ޢީދު ދުވަސް ފާއިތުވެ ވަޅު ޢީދު ދުވަސް ފާއިތުވެއްޖެއެވެ. ޖެހިގެން އައި ދުވަހު އޮތީ ނާކެނޑުމެވެ. އެ ޚަބަރާއެކު ދެން ފެތުރުނު ޚަބަރުން މުޅި ތުޅާދޫ ހުއްޓުނެވެ. ކުޅިވަރުތައް މެދުކަނޑާލެވުނެވެ. އެންމެން ޖަމާވާން ފެށީ އަތިރިމައްޗަށެވެ. ބ. އޭދަފުށީގައި ނިޔާވެގެން ރަށަށް އެ ގެނެވުނީ މީގެ އަހަރުތަކެއް ކުރިން ޢީދުގެ ސަގާފީ ހަރަކާތްތަކުގެ މުރީދެވެ. ރަށުގެ ޚިތާނީ ޚިދުމަތްތެރިޔާއެވެ. ބ.ތުޅާދޫ، މީނާޒު، ޢަބްދުﷲ އަބޫބަކުރެވެ. މުޅި ތުޅާދޫގެ ތިއްތިބެއެވެ.