އެއީ ގަސްގަހުގެ މޫ ބޭނުންކޮށްގެން ފަށަނާއި ދެ މައްޔާ ލައިގެން، ފަހަރަކު މަޑުލެއް ޖަހައިގެން ބަނދެފައިވާ 2 ފޫޓު ހުންނަ ވަރުގެ ދޯންޏެކެވެ. އެ ރީތި ދޯނި ދުއްވަމުން ދިޔައީ ތުޅާދޫ ދެކުނު ފަރާތުގައި ގުމްރީގެއާއި އެވަރުބުލޫގެއާ ދިމާ އަތިރިމާތީގައި އޮންނަ ކޯރުގައެވެ. އެ މަޖަލުގައި އުޅެނިކޮށް، އެތަނަށް އައި ބޮޑު ފިރިހެނަކު އެ ދޯނި އަތުލިއެވެ. ގަތް ބިރާއި ވީ ދެރައިން އެ ދޯނި ދުއްވަން ހުރި 8 އަހަރުގެ މުޙައްމަދު ޢަބްދުއްރަޙުމާން ދުވެފައި ގެއަށް ގޮސް އެކަމުގެ ޝަކުވާކުރީ އޭނާ ދުއްވި ދޯނި ބަން، އޭނާގެ ބައްޕަގެ ގާތުގައެވެ. އެ އަޑު އެހުމަށް ފަހު، އެއަށްވުރެ ރީތި، އެއަށް ވުރެ ބޮޑު ދޯންޏެއް އަނެއްކާ ވެސް އެ ހުނަރުވެރި ބައްޕަ ބެންނެވިއެވެ. އެ ހުނަރުވެރިއަކީ ބ. ތުޅާދޫ، ކަރަންކާމާގެ ޢަބްދުއްރަޙުމާން އަބޫބަކުރެވެ. ތުޅާދޫ މީހުންގެ ބަހުރުވައިން ނަމަ އާގޯތި އަބުދުބެއެވެ.