މި މަސައްކަތަކީ އަބޫބަކުރު އިސްނަންގަވައިގެން ކައުންސިލަށް ހުށަހެޅި ހުށަހެޅުމަކާ އެކު މި އަހަރުގެ ޖޫން މަހުގެ 12ވަނަ ދުވަހު ކައުންސިލުން ބޭއްވި 4ވަނަ ދައުރުގެ 240ވަނަ އާންމުން ޖަލްސާގައި 7 މެންބަރުންގެ އިއްތިފާގުން ފާސްކޮށް ނިންމެވުމަށް ފަހު ދެއްވި ހުއްދައިގެ ދަށުން އަބޫބަކުރު އަޅުއްވާ ހިޔަލެކެވެ.
އަބޫބަކުރު ބުނުއްވީ މިފަދަ ހިޔަލެއް އަޅަން ނިންމީ ތުޅާދޫގައި އެފަދަ ހިޔަލެއް އަޅާފައި ނެތުމާއި އެ ދަތިކަން ރަށަށް ލަފާފުރާ މީހުންނަށް ދިމާވެފައިވާތީ އެކަމަށް ހައްލެއް ހޯއްދަވައިދެއްވުމުގެ ބޭނުމުގައި ކަމަށެވެ.
"ބޭނުންވީ ކޮންމެވެސް ކަމެއް ރަށަށް ކޮށްދެން. ކޮންމެ ވެސް މީހަކު އިސްނަގައިގެންތާ މި ދަތިކަމަށް ވެސް ހައްލެއް ހޯދޭނީ. އެހެންވެ ކައުންސިލަށް ހުށަހަޅައިގެން މި ހުއްދަ ލިބުނީ. ހުއްދަ ލިބުމާއެކު މަސައްކަތް މި ފެށީ" އަބޫބަކުރު ބުނުއްވިއެވެ.
އަބޫބަކުރު ބުނުއްވީ ކައުންސިލުން ދީފައިވަނީ 28 ފޫޓް ދިގު، 14 ފޫޓް ފުޅާ ބިންކޮޅެއް ކަމަށާއި އެ ތަނުގައި ދެ ފާޚާނާއާއި ދަތުރުވެރީންނަށް ތިބެވޭނެ ހުސްޖާގައެއް ތައްޔާރު ކުރެވޭނެކަމަށެވެ.
"މި ބަލަނީ ވީހާ ވެސް އަވަހަކަށް ނިންމާލެވޭތޯ. މިހާރު މި މަސައްކަތް މި ފެށީ. އިރާދަކުރެއްވިއްޔާ ސިމެންތި މަސައްކަތް ފިސާރި އަވަހަށް ނިންމާލާނަން. ހިޔާކުރުމާއި ދޮރުތަކުގެ މަސައްކަތް ވެސް ކުރިއަށް އެބަދޭ" ބަކުރު ބުނުއްވިއެވެ.
ބަކުރު ބުނުއްވީ މިތަނާއެކު 1988ވަނަ އަހަރުގެ ނޮވެންބަރު މަހުގެ 3ވަނަ ދުވަހު ޝަހީދުވި ތުޅާދޫގެ ބަޠަލު މަބުސްތާނުގޭ، ކޯޕްރަލް ޝަހީދު ހުސައިން މުޙައްމަދުގެ ހަނދާންތައް އާކުރެވޭނެ ގޮތެއް ހެދުމުގެ މަސައްކަތް ވެސް ކުރެވޭ ކަމަށާއި އެ ވިސްނުން ވެސް ގެންގުޅޭ ކަމަށެވެ.
"އިރާދަކުރެއްވިއްޔާ މި ހިޔަލާއެކު ޝަހީދު ޙުސައިން މުޙައްމަދުގެ ޒިކްރާ އާކުރެވޭނެ ގޮތެއް ހަމަޖެއްސޭތޯ ވެސް އެބަ ބަލަން. އެކަން ވެސް އިރާދަކުރެއްވިއްޔާ ކުރާނަން" އަބޫބަކުރު ބުނުއްވިއެވެ.
