މި ފަހަރުގެ މުބާރާތުގެ ވަނަތަކަށް ދޭނެ އިނާމުތައް ކައުންސިލުން ކަނޑައަޅާފައިވަނީ، މުބާރާތުގެ ކިޔެވުންތައް ނިމި، އިންސާފުކުރުމުގެ މަސައްކަތް ވެސް ނިމުމަށް ފަހު، މި މަހުގެ 13ވަނަ ދުވަހު ބޭއްވުނު ކައުންސިލްގެ ބައްދަލުވުމެއްގައެވެ.
ތުޅާދޫ ކައުންސިލް އިދާރާއިން ލިބުނު މައުލޫމާތުތަކަށް ބަލާ އިރު، މި ޤުރުއާން މުބާރާތުން މުޅި މުބާރާތުގެ 1 ވަނަ، 2 ވަނަ އަދި 3 ވަނަ ހޯދާ ފަރާތްތަކަށް ކައުންސިލުން ފައިސާގެ އިނާމު ދިނުމަށް ވަނީ ހަމަޖެހިފައެވެ.
އެގޮތުން، މުޅި މުބާރާތުން 1 ވަނަ ހޯދާ ފަރާތަށް 12،000 ރުފިޔާ، 2 ވަނަ ހޯދާ ފަރާތަށް 8،000 ރުފިޔާ އަދި 3 ވަނަ ހޯދާ ފަރާތަށް 6،000 ރުފިޔާ ދިނުމަށް ކައުންސިލުން ނިންމާފައިވާ ކަމަށް އެ އިދާރާއިން މައުލޫމާތު ދެއެވެ. މުބާރާތަށް އިނާމުު ހުށަހެޅުމުގެ ފުރުޞަތު ކައުންސިލުން ހުޅުވާލާފައި ވެސް ވެއެވެ.
މި މުބާރާތް ކުރިއަށް ގެންގޮސްފައިވަނީ މިޖުލައި މަހުގެ 10 ން 12 އަށް ތުޅާދޫ ސްކޫލްގެ ހޯލުގައެވެ.
