މި ބައްދަލުވުން ބާއްވާފައިވަނީ 2025 ވަނަ އަހަރުގެ ޖުލައި މަހުގެ 14 ވީ ހޯމަ ދުވަހުއެވެ.
ތުޅާދޫ ކައުންސިލް އިދާރާއިން ބުނީ މި ބައްދަލުވުމުގެ މައިގަނޑު މަޤްޞަދަކީ ބ. އަތޮޅުގައި އާރު.ޓީ.އެލް ފެރީގެ ޚިދުމަތް ފެށުމަށް ކުރަންޖެހޭ ތައްޔާރީތަކާއި، ޚިދުމަތް ދެވޭނެ ގޮތްތަކާ ބެހޭގޮތުން މަޝްވަރާކުރުން ކަމަށެވެ.
މި ބައްދަލުވުމުގައި އެމް.ޓީ.ސީ.ސީން ވަނީ، ބ. އަތޮޅުގައި އާރު.ޓީ.އެލް ފެރީގެ ޚިދުމަތް މި ހިނގާ ޖުލައި މަސް ނިމުމުގެ ކުރިން ފެށުމަށް މަސައްކަތް ކުރަމުންދާ ކަމުގެ މައުލޫމާތު ދެއްވާފައެވެ. މި ޚިދުމަތް ފެށުމުން ބ. އަތޮޅުގެ ރަށްރަށުގެ ދަތުރުފަތުރަށް ގިނަ ފަސޭހަތަކެއް ލިބި، ރައްޔިތުންނަށް ދަތުރުފަތުރުގެ ހަރަދު ކުޑަކުރެވޭނެ ކަމަށް ލަފާކުރެވެއެވެ.
ބައްދަލުވުމުގައި ތުޅާދޫގައި ހަރަކާތްތެރިވާ މުއައްސަސާތަކުގެ ބައިވެރިންވަނީ، ޚިދުމަތް ފެށުމަށް ކުރަންޖެހޭ ތައްޔާރީތަކާއި، ރައްޔިތުންނަށް ދެވޭނެ ޚިދުމަތްތައް ހަރުދަނާކުރުމާ ބެހޭގޮތުން އެމް.ޓީ.ސީ.ސީއާއެކު މަޝްވަރާކޮށް، މުހިންމު ހުށަހެޅުންތައް ހުށަހަޅާފައެވެ.
