ކައުންސިލް ވެބްސައިޓު މެދުވެރިކޮށް ރައްޔިތުންނަށް ލިބެންޖެހޭ ޚިދުމަތްތައް އޮންލައިންކޮށް ނުލިބުމުގެ ޝަކުވާ ބައެއް ރައްޔިތުން ކުރަމުން އަންނަ އިރު އެކަން ހައްލުކުރުމުގެ މަސައްކަތް ކައުންސިލުން ވެސް ކުރަމުން އަންނަ ކަމަށް ކައުންސިލްގެ ރައީސް ވިދާޅުވިއެވެ.
ކައުންސިލްގެ ރައީސް އިބްރާހީމް ޢާދިލް ވިދާޅުވީ ވެބްސައިޓްގެ ޚިދުމަތް ހުއްޓުމުގައި ތުޅާދޫ ކައުންސިލްގެ އެއްވެސް އިހުމާލެއް ނެތްކަމަށާއި އެ މައްސަލަ ދިމާވެފައި ވަނީ ވެބްސައިޓް ހަދަން ހަވާލުކުރި ފަރާތުން އެކަން ކައުންސިލުން ހަވާލުކޮށްފައިވާ ގޮތަށް ނިންމާލެވިފައި ނުވާތީ ކަމަށެވެ.
"އުންމީދު މި ކުރަނީ ކުރިއަށް އޮތް މަހެއްހާ ދުވަހުގެ ތެރޭގައި މިކަން ޙައްލުކުރެވޭނެ ކަމަށް. ވަރަށް ބޮޑު ޔަޤީންކަމެއް އެބަ އޮތް އެކަން ހައްލުވާނެކަމުގެ" ކައުންސިލްގެ ރައީސް ވިދާޅުވިއެވެ.
ތުޅާދޫ ޓައިމްސްއަށް އެނގިފައިވާ ގޮތުގައި ކައުންސިލްގެ ވެބްސައިޓް ފަރުމާކުރުމުގެ ކަންކަން އެކަން ކުރަން ހަވާލުކުރި ފަރާތުން ވަނީ ނިންމާފައެވެ. ނަމަވެސް އެއާއެކު ހަދަން ޖެހޭ އެޕްލިކޭޝަނެއް ހެދުމުގެ މަސައްކަތް ނިންމާފައެއް ނުވެއެވެ. ވެބްސައިޓްގެ ޚިދުމަތް ލަސްވަނީ އެ ސަބަބާ ހެދިއެވެ.
ކައުންސިލެއްގެ ވެބްސައިޓަކީ މަޢުލޫމާތުގެ ވަރަށް މުހިންމު މަންސައަކަށް ވާއިރު ވެބްސައިޓް ޑައުންވެފައި ހުރުމުގެ ސަބަބުން، ކައުންސިލުން ދޫކުރާ އެކިއެކި ފޯމުތަކާއި ބައެއް މަޢުލޫމާތު ރައްޔިތުންނަށް ލިބުމުގައި ދަތިތަކެއް ހުރިކަން ފާހަގަކުރެވެއެވެ.
ލޯކަލް ގަވަރމަންޓް އޮތޯރިޓީ (އެލް.ޖީ.އޭ) އިން ލޯކަލް ކައުންސިލްތަކުގެ ޕަރފޯމަންސް އިންޑެކްސް ހަދާއިރު ވެސް އެ ކައުންސިލެއްގެ ވެބްސައިޓަކީ ވަރަށް މުހިންމު މަންސައެކެވެ.
