ތުޅާދޫގެ ދެ ބައިވެރީން ގަދަ 14ށް ދަތުރު ކުރީ މި ދިޔަ ހަފުތާގައި އެ ދަރިވަރުންގެ މަސައްކަތްތަކާއި ހުށަހެޅުންތަކަށް ބަލައި ރޭ ދިވެހިރާއްޖޭގެ އަޑުންނާއި ޓީވީ މޯލްޑިވްސްއިން ދުރަށް ދެއްކި "ބެސްޓްރޭޑިއޯ ޕްރެޒެންޓަރ ކޮންޕެޓިޝަން" ޕްރޮގުރާމުގައި ބައިވެރީން މަދުކުރުމުގެ ޝޯވްގައި އެ ދެ ބައިވެރީން ސަލާމަތް ވެގެންނެވެ.
ތުޅާދޫ ޓައިމްސްއަށް މަޢުލޫމާތު ލިބިފައިވާ ގޮތުގައި ތުޅާދޫ ދެ ބައިވެރީންގެ ހުށަހެޅުންތައް ޖުމުލަކޮށް ވަރަށް ރަނގަޅެވެ. އަދި ދެ ބައިވެރީންގެ މަސައްކަތް ވެސް ވަރަށް ފުރިހަމައެވެ. އެ ދެ ބައިވެރީންނަށް މަދުވަނީ އާންމުންގެ ވޯޓެވެ. މުބާރާތް ހަމަޖެހިފައިވާ ގޮތުން ބައިވެރީންނަށް ލިބޭ މާކުހުގެ 30 އިންސައްތައަކީ އާންމުންގެ ވޯޓެވެ. ތުޅާދޫ ދެ ބައިވެރީން ގަދަ 16 އިން 14 ށް ދަތުރު ކުރި އިރު ވޯޓް ލިބުނު މިންވަރު ސީދާ ނޭނގުނު ނަމަވެސް ބައިވެރީންނަށް ކޮށްފައިވާ ކޮމެންޓްތަކުން އެ ބައިވެރީންގެ ހުށަހެޅުންތައް ރަނގަޅުކަން ފާހަގަކުރެވުނެވެ.
މި މުބާރާތުގައި ވޯޓުލެވެނީ ޕީއެސްއެމް އެއަރ އެޕްލިކޭޝަން އެޅުވުމަށްފަހު އެ އެޕްލިކޭޝަން މެދުވެރިކޮށެވެ.
ދިވެހިރާއްޖޭގެ އަޑުން ރޭޑިއޯ ޕްރެޒެންޓަރުން އުފެއްދުމަށް ޓަކައި ރިއަލިޓީ ޝޯ އެއްގެ ގޮތުގައި ކުރިއަށްގެންދާ މި މުބާރާތް މިހާރު ބާއްވަމުން އަންނަތާ މިއީ 6ވަނަ އަހަރެވެ.
މި މުބާރާތަކީ ރޭޑިއޯ ދާއިރާގައި ޒުވާނުން ކުރިއަށް ދިއުމަށް ލިބޭ ރަނގަޅު ފުރުސަތެއްގެ ގޮތުގައި ބެލެވެއެވެ. އަދި މީގެ ކުރީގެ އަހަރުތަކުގައި ވެސް މި މުބާރާތުން ފާހަގަކުރެވުނު ގިނަ ޒުވާނުން މިހާރު އަންނަނީ ރޭޑިއޯ ދާއިރާގައި ކާމިޔާބު ޕްރެޒެންޓަރުންގެ ގޮތުގައި މަސައްކަތްކުރަމުންނެވެ.
