މިއަހަރުގެ އަޟްޙާ ޢީދު ކުޅިވަރު ކުޅޭ ސަރަޙައްދުގައި ގާޑިޔާ ބެހެއްޓުމަށް ބިން ދޫކުރުމަށް ނިންމާފައިވަނީ ކައުންސިލްގެ 04 ވަނަ ދައުރުގެ 227 ވަނަ ޖަލްސާގައެވެ.
ކައުންސިލުން މަޢުލޫމާތު ދިން ގޮތުގައި މި ބިންތައް ދޫކުރެވޭނީ ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ރަޖިސްޓްރީ ކޮށްފައިވާ ފަރާތްތަކަށެވެ. ކޮންމެ ވިޔަފާރިއަކަށް ދޫކުރެވޭނީ އެންމެ ބިމެއްކަމާއި މި ގޮތަށް ބިން ދޫކުރުމުގައި ކާބޯތަކެތީގެ ޚިދުމަތްދޭ ފަރާތްތަކަށް އިސްކަންދޭނެ ކަމަށް ވެސް ކައުންސިލުން ބުނެއެވެ.
ޖުމުލަ 10 ބިން ދޫކުރުމަށް ހަމަޖެހިފައިވާއިރު، ބިމެއްގެ އަގަކީ ދުވާލަކަށް 150 ރުފިޔާއެވެ. 10 ފަރާތަށް ވުރެ ގިނައިން ކުރިމަތިލައިފި ނަމަ، ބިން ލިބޭ ފަރާތްތައް ކަނޑައަޅާނީ ގުރުއަތުލައިގެން ކަމަށާއި މިގޮތަށް ހޮވޭ ފަރާތްތަކުގެ މެދުގައި ސްލޮޓް ގުރުއަތުލުން ވެސް އޮންނާނެކަމަށް ކައުންސިލުން މަޢުލޫމާތު ދެއެވެ.
ގާޑިޔާ ބަހައްޓަން ޝައުޤުވެރިވާ ފަރާތްތަކުން 2025 މެއި 22 ވާ ބުރާސްފަތި ދުވަހުގެ މެންދުރު 14:00 ގެ ކުރިން އޮންލައިން ފޯމެއް މެދުވެރިކޮށް ރަޖިސްޓަރީ ވުމުގެ ފުރުޞަތު ކައުންސިލުން މިހާރުވަނީ ހުޅުވާލާފައެވެ.
މި ނިންމުމަކީ ރަށުގެ އިޤްތިޞާދީ ޙަރަކާތްތައް އިތުރުކޮށް، ޢީދު ދުވަސްވަރު ރައްޔިތުންނަށް ފަސޭހަކަމާއެކު ކާބޯތަކެތި ލިބޭނެ މަގު ތަނަވަސްކޮށްދިނުމަށް އެޅޭ މުހިންމު ފިޔަވަޅެއް ކަމުގައި ކައުންސިލުން ފާހަގަކުރެއެވެ.
