ލިބުނު އުފާ

އެ ޝަކުވާތަކަށް ޖަވާބުދޭން އެތައް އިރަކު އަހަރެންނަށް އޮވެވުނެވެ. ހަމަ ވިސްނެނީއެވެ. ދޮށީ ދަރިފުޅު ކިހައި މޮޅު ހެއްޔެވެ؟ ގައުމު ތަމްސީލުކުރަން ގޮސް އެ ހުރީ ރާއްޖެއިން ބޭރުގައެވެ. ރާއްޖެއާ އެތައް މޭލެއް ދުރު އަބޫދާބީގައެވެ. އެ ހުވަފެން އަހަރެން ދުށީ މިއަދަކު ނޫނެވެ. މީގެ އެތައް އަހަރެން ކުރިން ވެސް އެ ހުވަފެން އަހަރެން ދުށީމެވެ. ދަރިފުޅާ މެދު އެ އުންމީދު ކުރީމެވެ. ނަމަވެސް އެ އުންމީދުން އަހަރެންގެ ހިތަށް އިއްޔެ ލިބުނީ މަލާމާތެވެ. ފުރައްސާރަޔާއި ޖެއްސުމެވެ. މިލްކުވީ ހިތަށް ތަދުވާ ފަދަ ބަސްތަކާއި ޖުމުލަތަކެވެ.

އެންމެ ފުރަތަމަ އެ ދަރިފުޅުގެ ހަގީގަތް އެނގުނީ އަންހެނުންނަށެވެ. ދަރިފުޅުގެ އުޅުމަށް އައި ބަދަލު ފާހަގަވެގެން އެ ވާހަކަ ދެއްކީ އަންހެނުންނެވެ. އެ ދުވަހު އެ ކަން ގަބޫލު ނުކުރެވުނަސް ފަހުން އެ ކަން ގަބޫލުކުރަން މަޖުބޫރުވިއެވެ. ދަރިފުޅުގެ އުޅުން ހުންނަގޮތް ލޮލަށް ފެނިއެވެ. ޑޮކްޓަރުން ދެއްކި ވާހަކަތައް އަޑުއަހާފައެވެ. އެ ހިތްދަތިކަމުން އަރައިގަނެވުނީ އެތައް ދުވަހެއް ފަހުންނެވެ. އަންހެނުންގެ ލޮލުން ފޭބި ކަރުނަޔާއި ހިތަށް ވީ ތަދު އެ ދުވަހު ފުހެދިނީ އަހަރެންނެވެ. އެ ހިތްދަތިކަމަށް އަންހެނުން ކެތްކުރިއެވެ. އަހަރެން ކެތްތެރިވީމެވެ. ދެއްވި ނިޢުމަތަށް ޝުކުރުވެރިވީމެވެ.

އަހަރެންނާއި އަންހެނުންގެ ދިރިއުޅުން މާލެއަށް ބަދަލުކުރީ ލިބިފައިވާ ދެ ކުދިންނަށް ކިޔަވައި ދިނުމަށެވެ. އެ ކުދިންނާ މެދު ކުރެވޭ އުންމީދުގެތަކުގެ މަތިވެރިކަމުންނެވެ. ޚާއްޞަކޮށް ފިރިހެން ދަރިފުޅަށް ދޭންޖެހޭ ސަމާލުކަން ބޮޑުކަމުންނެވެ. އެ ނިޔަތުގައި މުޅި ދިރިއުޅުން ބަދަލުކުރީމެވެ.

ލިބުނު ޗުއްޓީއެއްގައި ދެ ކުދީން ގޮވައިގެން އަހަރެން ރަށަށް ދިޔައީމެވެ. ފިރިހެން ދަރިފުޅުގެ އުޅުން ހުންނަ ގޮތުން ބައެއް މީހުން ސުވާލުކުރެއެވެ. ދަރިފުޅުގެ ހަގީގަތް އެނގުނު ނަމަވެސް އެ ސުވާލުތައް ތަކުރާރުކުރެއެވެ. ބައެއް މީހުންގެ ނަޒަރުގައި ދަރިފުޅަކީ މޮޔައެކެވެ. ހަމައިގައި ހުންނަ ކުއްޖެއް ނޫނެވެ. އެ އަޑު އަހަރެންގެ ކަންފަތުގައި ޖެހޭ ކޮންމެ ފަހަރަކު އަހަރެންނަށް އުނދަގޫވެއެވެ. ނަމަވެސް ކެތްކޮށްލައިގެން ހުންނަނީއެވެ.

"މާލޭގައި ދަރިފުޅު ބަހައްޓައިގެން ކީއް ތި ކުރަނީ؟ ކިޔަވައިދެނީތަ؟" ސުވާލުކުރީ އަހަރެންގެ ރަށުގައި އުޅޭ ރަށުން ބޭރު މީހެކެވެ. އަހަރެން ދަންނަ ދެކެފަރިތަ އަހަންމަދެވެ.

"އެސޮރު އިމާދުއްދީނަށް ވައްދައިގެން މި އުޅެނީ. ކިޔަވައިދޭން ވާނެއެއްނު. އޭރުންތާ މީހަކަށް ހެދޭނީ" އަހަރެން ޖަވާބުދިނީމެވެ.

"ބަލަ އެ ސޮރު އުޅޭ ގޮތް އެބަ ފެނެއެއްނު. މަށަށް ހީވަނީ ތިއީ ބޭކާރު ކަމެއްހެން. ބޮޑު ޚަރަދުކޮށްފައި ބޮޑު ކުލި ދައްކާފައި މާލޭގައި ހުރުމުގެ މާނައެއް ނެތްހެން. ގައިމު މި ރަށުގައި ހުރެ ތިޔަ ކަން ކުރަން އުޅޭނަމަ މާ ރަނގަޅުވާނެ" އަހަންމަދު ފާޅުކުރީ އޭނާއަށް ފެންނަ ޚިޔާލެވެ. އެ ޚިޔާލުން އަހަރެންނަށް އުނދަގޫވިއެވެ. ނަމަވެސް ރައްދުދޭކަށް އަހަރެން ބޭނުމެއް ނުވިއެވެ.

"އެސޮރު ވަރަށް މޮޅުވާނެ ކުޅިވަރު ކުޅެން. ދުވެލި އެހައި ބާރުވާނެ. އަނެއްކާ ކޯޗުން ބުނާ ބަސް އަހާނެ" އަހަންމަދުގެ ޚިޔާލު ބަދަލުވޭތޯ އަހަރެން ފެށީ އެހެން ވާހަކައެކެވެ.

"ބަލަ ކުޅިވަރުތަކުގައި ބައިވެރިވެވޭނީ ވެސް ވިސްނުމެއް ހުރެގެން. އެއީ ވެސް އިލްމެއް. ބުއްދި ނެތިއްޔާ ކޮން ކުޅިވަރެއް. އެންމެ ކުޑަމިނުން ދުވުމުގެ ރޭހެއް ވެސް ޖަހައިލެވޭނީ ވިސްނުމެއް ހުރެގެން. ވަހީދުގެ ތިޔަހަރަ ވިސްނުމެއް ދޯ. އެ ދަރިފުޅު ހިތްހަމަ ޖައްސަން މުޅި ދިރިއުޅުން ތިޔަ ހަލާކު ކުރަނީ" އަހަންމަދު ވިސްނާ ގޮތް އަހަރެންނަކަށް ނުވިސްނުނެވެ. އެ ސިކުނޑީގައިވާ ތަފާތުކުރުން އަހަރެންނަކަށް ގަބޫލެއް ނުކުރެވުނެވެ. އަހަންމަދަށް މިފަދަ ކުއްޖަކު ނުދެއްވިކަމީ ނަސީބެކޭ އަހަރެން ހިތަށް އެރިއެވެ.

"ދަރިން ބޭނުންވާ ކަންކަން ކޮށްދިނުމުން އަހަރެން ހިތްހަމަ ޖެހޭ. އެހެންވީމާ މައްސަލައެއް ނެތްތާ. އަހަރެންގެ ދަރިފުޅާ މެދު އަހަރެން ކުރާ ކިތަންމެ އުންމީދެއް އެބަ ހުރި. އިރާދަކުރެއްވިއްޔާ އެ ކަން ހާސިލުވާނެ" އަހަރެންގެ ކުރިމަތީ، ދިހަވަރަކަށް ފޫޓު ދުރުގައި ހުރި ދަރިފުޅަށް ބަލަހައްޓައިގެން އިނދެ އަހަރެން ބުނީމެވެ. ހަގީގަތުގައި ވެސް އަހަރެންގެ އުންމީދުތަކެއް ހުއްޓެވެ. އަހަރެން ދެކޭ ހުވަފެންތަކެއް ހުއްޓެވެ. ނަމަވެސް އަހަރެންނަށް ގަބޫލުކުރެވުނީ އެ ކަންކަން ހާމަކޮށްފި ނަމަ އަހަރެންނަށް ވުރެ ބޮޑު މޮޔައަކު ނުހުންނާނެކަމަށެވެ.

ޚިޔާލީ ދުނިޔެއިން އަހަރެން ހޭލައްވާލީ އަހަރެންގެ ފޯނެވެ. ރިންގުވާން ފެށުމުން އަހަރެން ފޯނު ނެގީމެވެ. ވާހަކަދެއްކީ ދަރިފުޅާ ހަވާލުވެގެން ރާއްޖެއިން ބޭރަށް ދިޔަ އޮފިޝަލެކެވެ.

"ދާދި ދެންމެ ދަރިފުޅު ރިހި މެޑަލް ހޯދައިފި. އެއީ ފިރިހެނުންގެ 200 މީޓަރު ދުވުމުން ފައިނަލުގައި ވާދަކޮށް. އެ ޚަބަރުދޭން މި ގުޅާލީ. އިރުކޮޅެއް ފަހުން ދަރިފުޅާ ވާހަކަދައްކާލެވޭ ގޮތް ހަދައިދޭނަން. އަދި ގުޅާލާނަން" އޮފިޝަލް ދިން އުފާވެރި ޚަބަރު ގޮސް ބޮސްދިނީ އަހަރެންގެ ހިތުގެ އެންމެ ފުނުގައެވެ. އެއާ އެކު ދެ ލޮލުން ދެމިގަތީ އުފާވެރިކަމުގެ ކަރުނައެވެ. ހިތުން އޮހިގެން ދިޔައީ ހެއްދެވި ފަރާތަށް ކުރެވުނު ޝުކުރުގެ ބަސްތަކެވެ.

ލިބުނު އުފާވެރި ޚަބަރު އަހަރެން އަންހެނުންނަށް ދިނީމެވެ. އަންހެނުންނަށް ލިބުނީ ހައިރާންކަމުގެ އުފަލެކެވެ. ފުރަތަމަ ގަބޫލު ވެސް ނުކުރިއެވެ. ނަމަވެސް އަހަރެންގެ އިހުސާސްތަކާއެކު އަންހެނުން ވެސް އެ ވާހަކަތައް ގަބޫލުކުރީއެވެ.

އަހަރެންނާއި އަންހެނުން އިންތިޒާރު ކުރީ ފޯނުކޯލަށެވެ. ބޭނުންވީ ދަރިފުޅާ ވާހަކަދައްކާލާށެވެ. ދަރިފުޅަށް މަރުހަބާ ކިޔާށެވެ. އަހަރެންގެ އިންތިޒާރަށް ނިމުން އައެވެ. ދަރިފުޅާ ބައްދަލުވިއެވެ. އަހަރެންގެ ލޮލުން ކަރުނަ ހިލިގަތެވެ. ވާހަކަދައްކަން  އުނދަގޫވިއެވެ. ނަމަވެސް ހިތްވަރުކޮށް ވާހަކަދެއްކީމެވެ. ދަރިފުޅަށް މަރުހަބާ ކީމެވެ. އަހަރެންގެ ހިތުގެ ޝުޢޫރު ފާޅުކުރީމެވެ. ދަރިފުޅާ މެދު ފަޚުރުވެރިވާ ވާހަކަ ބުނީމެވެ. އަހަރެންނެކޭ އެއްފަދައިން އަންހެނުން ވެސް ހުރީ އުފަލުން ފޮޅިފައެވެ. ދަރިފުޅު ހުރީ އެއަށް ވުރެ ބޮޑަށް ހެވިފައެވެ. ހަގީގަތުގައި ވެސް އަހަރެންގެ ދަރިފުޅަށް ފަޚުރުވެރިވެވެއެވެ. ރާއްޖެއަށް އެ ހޯދައިދިން ރީތި ނަމަށް ޝުކުރުވެރިވެވެއެވެ.

މާގިނައިރުތަކެއް ނުވެ ސޯޝަލް މީޑިއާއަށް އެ ޚަބަރު އަރައި މުޅި ރާއްޖެއަށް އެ ޚަބަރު ފެތުރުނެވެ. އާއިލާ މީހުންނާއި ރަހުމަތްތެރިންނާއި އެކުވެރިން އަހަރެންނަށާއި އަންހެނުންނަށް ގުޅަން ފެށިއެވެ. ކޯލަކަށް ފަހު ކޯލެކެވެ. ކޮންމެ މީހަކު ވެސް އަހަނީ އެއީ ތެދެއް ހެއްޔެވެ؟ ބައެއް މީހުންނަށް އެ ކަން ގަބޫލުކުރަން ދަތިވީއެވެ. ނަމަވެސް ނޫސްތަކުގެ ފަލަ ސުރުޚީއަށް އެރުމުން އެއީ ހަގީގަތްކަން ގަބޫލުކުރަން މަޖުބޫރުވީއެވެ.

ދެން އަންނަން ފެށީ ތަހުނިޔާގެ މެސެޖުތަކެވެ. ސޯޝަލް މީޑިއާއާއި ވައިބަރ ގުރޫޕްތަކުގައި އޮތީ ދަރިފުޅުގެ ކާމިޔާބީގެ ވާހަކައެވެ. ދަރިފުޅުގެ ހިތްވަރުގެ ވާހަކައާއި ދަރިފުޅުގެ މޮޅު ވާހަކައެވެ. ރާއްޖެއާއި ދަރިފުޅު ނިސްބަތްވާ ރަށަށް ލިބުނު ރީތި ނަމުގެ ވާހަކައެވެ. އެ މެސެޖުތައް ކިޔައި ހިތް އުފަލުން ފުރުނެވެ. އިއްޔެ ބައެއް މީހުންނަށް ބަލައި ނުގަނެވުނު ދަރިފުޅު ބަލައިގަނެވުނީތީއެވެ. އިއްޔެ އުންމީދެއް ނެތްކަމަށް ހީކުރި ދަރިފުޅު ރާއްޖެއަށް ގެނެސްދިން އުންމީދުގެ ސަބަބުންނެވެ. އިއްޔެ އެ ދަރިފުޅަށް ސޭކޭ ގޮވި މީސްމީހުންގެ ދޫތަކުން އެ ދަރިފުޅަށް ތަޢުރީފު ކުރީތީއެވެ.

ތެދެކެވެ. ދަރިފުޅު ފިސާރި މޮޅެވެ. ފިސާރި ކާމިޔާބެވެ. ނަމަވެސް އެންމެ މޮޅީ އެ ދަރިފުޅުގެ މަންމައެވެ. އެންމެ ކާމިޔާބީ ވެސް އެ މަންމައެވެ. އަހަރެންގެ އަންހެނުންނަށް އަހަރެން ތަޢުރީފު ކުރީމެވެ. ޝުކުރު އަދާކުރީމެވެ. އެ އަންހެނުންގެ ކެތްތެރިން ނެތް ނަމަ އެ ދަރިފުޅަކަށް އެ ހިސާބަކަށް ނުދެވުނީހެވެ. ދަރިފުޅަށް ޓަކައި އެ މަންމަ އުފުލި ބުރަ ނޫފުލި ނަމަ އެ ޝަރަފެއް ނުހޯދުނީހެވެ. ދަރިފުޅާ މެދު ކުރި އުންމީދު ހަގީގަތަކަށް ހަދައިދިނުމަށް އަހަރެންނާ އެކު އަންހެނުން ނުވި ނަމަ މިއަދު މި ލިބޭ އުފަލެއް ނުލިބުނީހެވެ. ޝުކުރުގެ ބަސްތަކުން އަންހެނުން ގަތީ ލަދެވެ. ނަމަވެސް އެއީ ހަގީގަތެވެ. އަންހެނުން ހިނިތުންވެ ހުރެ އެ ހުރިހާ ޝަރަފެއް ދިނީ އަހަރެންނަށެވެ. އަހަރެން މިހުރީ ފިސާރި އުފަލުންނެވެ.