އެކުވެރިޔާ

މިއަދު އެކުވެރިޔާއަކީ ވެސް ޒުވާންކަމަށް އަލްވަދާޢުކިޔަމުންދާ މިތުރެކެވެ. އާރާބާރު ހުރި މީހެކެވެ. އެހެން ޒުވާނުންގެ އިހުސާސްތައް ފަދައިން، ޒުވާންކަމުގެ މޫސުމީ ހަޅަ ޖެހި އެކުވެރިއެކެވެ. އޭނާގެ ނަޒަރުގައި ލޯތްބަކީ ވެވޭ އެއްޗެކެވެ. ލޯބިވާން ޖެހޭނީ ވެސް ރީތި ކުދީންދެކެއެވެ. އެންމެ ރީތި މީހަކީ ހަޔާތަށް އެންމެ ރަނގަޅު މީހާއެވެ. އެކަމަކު އެންމެ ލޯބިވީ އޭނާގެ ބައްޕަދެކެއެވެ. އެންމެ ބަރާބަރު މީހަކީ އަހަރެންނެވެ. އޭނާ ގަބޫލުކުރާ ގޮތުގައި އޭނާ ދައްކާ ހުރިހާ ވާހަކައެއް އެނގެނީ އަހަންނަށެވެ. އެއީ އޭނާއަށް ވިސްނިފައި އޮތް ގޮތެވެ. ހަގީގަތަކީ އޭނާ ދައްކާ ބައެއް ވާހަކަތައް އަހަރެންނަށް ވެސް ނޭނގޭކަމެވެ. ބައެއް ފަހަރު އެނގޭކަމަށް ހެދެން ޖެހޭކަމެވެ. އެ ޚިޔާތަކާއެކު ވަދެވުނީ މަޒީއަށެވެ. ދެވުނީ އަމިއްލަ ރަށަށެވެ.

މީގެ އެތައް އަހަރެއް ކުރިއެވެ. އަހަރެން ވެސް އުޅުނީ ރަށުގައެވެ. ރަށު މަދަރުސާ ގައެވެ. އޭނާވީ އަހަރެންގެ ހިޔަންޏަށެވެ. ކޮންމެ ކަމެއްގައި ވެސް އުޅުނީ އަހަރެންނާ އެކުއެވެ. އެންމެ ކުޑަ އިރުއްސުރެ ވެސް އެއީ އާދައެވެ. އަހަރެން ދާ ކުލާހަކަށް އޭނާ ވެސް ދާން ބޭނުންވެއެވެ. އަހަރެން ހޯދާ ކޮންމެ އެއްޗެއް   އޭނާ ވެސް ހޯދަން ބޭނުންވެއެވެ. އެންމެ ކުޑަމިނުން ރިޕޯޓްފޮތް ވެސް ޖެހެނީ އެއްގޮތްވާށެވެ. މާކުސްތަކާއި ގްރޭޑް ވެސް އެއްގޮތް ވުމަށް އޭނާ ބޭނުންވެއެވެ.

ގްރޭޑް 6 ނިމިއްޖެއެވެ. ނަސީބަކުން އެކުވެރިޔާގެ ހުރިހާ އުއްމީދެއް ދިޔައީ ފުރިހަމަވަމުންނެވެ. ހުރިހާ ޓީޗަރުންގެ އެހީތެރިކަމާ އެކު، އޭނާ ވެސް ދިޔައީ އަހަރެންނާ އެކު، އެއް ކުލާހެއްގައި ކިޔަވަމުންނެވެ. ފިލާވަޅުތައް ހަދަނީ އަހަރެންގެ ފޮތް ބަލައިގެންނެވެ. ޓެސްޓްގައި ވެސް އިންނަނީ އަހަންނާ ޖެހިގެންނެވެ. ބައެއް ފަހަރު އަހަރެންގެ ޕޭޕަރު ބަލައެވެ. ނުބަލާކަމަށް ހެދެން ވެސް އުޅެއެވެ. ކޮޕީ ކުރުމަކީ މަނާކަމެއްކަން ޚުދު އެކުވެރިޔާއަށް ވެސް އެނގެއެވެ. ބައެއް ފަހަރު އަހަރެންގެ ޕޭޕަރުގެ ގަނޑުތައް އޭނާއަށް ފެންނާނެހެން ބަހައްޓަމެވެ. ބޭނުމަކީ އޭނާއަށް ދެއްކުމެވެ. ކިތަންމެ ބިރުން އިނދެ ވެސް އެކަން ކުރަނީ އެކުވެރިޔާއަށް އެއިން ފައިދާއެއް ކޮށްފާނެ ކަމުގެ ނިޔަތުގައެވެ.

އެއް ފަހަރަކު ދިމާވިގޮތެކެވެ. ރިޕޯޓްފޮތް ދިން އިރު ކޮންމެވެސް އެއް މާއްދާއަކުން އަހަންނަށް ލިބުނީ އަށްޑިހަ ހަތަރެކެވެ. އެކުވެރިޔާއަށް ނުވަދިހަ ދީފައި އޮތެވެ. އެކަން އެކުވެރިޔާއަކަށް ގަބޫލެއް ނުކުރެވުނެވެ. އޭނާ ޝަކުވާ އުފުލިއެވެ. ޓީޗަރުގެ ގާތަށް ދިޔައެވެ. އެންމެފަހުން އޭނާގެ މާކުސް ޖެހުނީ ދަށް ކުރާށެވެ. އަހަރެންނަށް ލިބުނު މާކުހާ އެއްވަރަށް އޭނާގެ މާކުސް ވެސް ޖެހުނީ ބަދަލުކުރާށެވެ. އެ ކަން އެނގުމުން ވަރަށް ގިނަ ކުދިން ހީނހީފައި އެ ވާހަކަ ދެއްކިއެވެ. އެކުވެރިޔާ ކުރި މޮޔަ ކަންތަކުގެ ވާހަކައިން ޖޯކު ޖަހައި އުޅުނެވެ. ނަމަވެސް އެކުވެރިޔާއަށް އެ ކަންވީ ވަރަށް ހަމަޖެހޭ ކަމަށެވެ. މާކުސް ބަދަލުކުރެވުމުން އެކުވެރިޔާ ހުރީ ހިތްހަމަ ޖެހިފައެވެ. އޭނާއަށް ގަބޫލުކުރެވުނީ އަހަރެންނަށް ވުރެ މަތިން އޭނާއަށް މާކުސް ނުހޯދޭނެކަމެވެ. އަހަރެންގެ ޕޭޕަރު ބަލައިގެން ޓެސްޓު ހަދާ އިރު އަހަރެންނަށް ވުރެ މަތިން މާކުސް ލިބެންވީ ސަބަބެއް ނެތްކަމަށެވެ.

ދުވަސްކޮޅެއް ފަހެވެ. އެކުވެރިޔާގެ ބައްޕަގެ މަތިވެރި ގުރުބާނީން އެކުވެރިޔާ ރާއްޖޭން ބޭރަށް ދިއުމުގެ މަގު ފަހިވިއެވެ. އަޑުއިވުމަށް އަލި މަގެއް ފެނޭތޯ ކުރާ އުއްމީދުގައި ކުލަޖެހޭ ގޮތްވިއެވެ. އެކުވެރިޔާއަށް އެކަން ވީ އުފާވެރި ކަމަކަށެވެ. އޭނާއަށް ހިންދީ ފިލްމްތަކުން ފެންނަމުން ދިޔަ މަންޒަރުތައް ބޭރަށް ގޮސް ހަމަ ލޮލުން ބަލައިލުމުގެ ފުރުޞަތު ހުޅުވުނު ކަހަލައެވެ. އެ ދުވަސްވަރުގެ ކަމަކީ އެ ވާހަކަދެއްކުމެވެ. ބޭރަށް ގޮސް އަންނަ އިރު ކަންފަތް ރަނގަޅުވާނެކަމަށް އޭނާ ބުންޏެވެ. އެ އުންމީދު އޭނާ ކުރިއެވެ. އެ ވާހަކަތައް އަހަންނަށް ކިޔައިދިނެވެ.

ފޮނިފޮނި އެތައް ވާހަކަތަކަކަށް ފަހު، އެކުވެރިޔާ ރަށުން ފުރައިގެން ދިޔައީ ވަރަށް އުންމީދާ އެކުއެވެ. އެތައް ހަދިޔާއެއް އަހަންނަށް ގެނެސްދޭނަމޭ ބުނަމުންނެވެ. އަހަރެން ވެސް ހުރީ އުފަލުން ފޮޅިފައެވެ. އޭނާ ދައްކާ ވާހަކަތައް ހަގީގަތަކަށްވާނޭ ނަމައޭ ހިތަށް އަރާފައެވެ.

އެއް މަސް ފަހުން އެކުވެރިޔާ އެނބުރި ރަށަށް އައެވެ. ނަމަވެސް އޭނާ ހުރީ ހަމަ އެ ގޮތަށެވެ. ޑޮކްޓަރުންގެ ބަހަކަށް ވީ އެ ކަމަށް ބޭސްކުރުމަށް މާ ލަސްވީ ކަމުގައެވެ. އެކަމަކު އެންމެންނަކީ މުއްސަނދިންނެއް ނޫނެވެ. އެއީ ވަގުތުން ފަރުވާ ކުރެވޭ ފެންވަރުގެ ތަނަވަސްކަން ލިބިފައިވާ ބައެއް ވެސް ނޫނެވެ. އެހައި ބޮޑު ޚަރަދެއް ކުރެވޭނީ ކިހިނެއް ހެއްޔެވެ؟ ދުލުން ބުނެލާހައި ފަސޭހައިން އެހައި ދުރަށް ދާނީ ކިހިނެއް ހެއްޔެވެ؟ ޑޮކްޓަރުންނަށް ކަމެއް ނުވަނީ ތާއެވެ. އަހަރެންގެ އެކުވެރިޔާ އެ މީހުންގެ ގާތަށް އެ ދިޔައީ އެންމެ ފަހަރަކުއެވެ. އެހައި ދުރަށް، އެހައި ބޮޑު ޚަރަދު ކޮށްގެން ދިއުމުން އެ ބުނީ ފަރުވާއެއް ނެތް ވާހަކައެވެ. މިހާރު އެ ކަން ރަނގަޅު ވާން ނެތްކަމަށެވެ. އަޖައިބެކެވެ. ޑޮކްޓަރުން މޮޅޭ ކިޔައިގެން މީހުން މި ދައްކަނީ ކޮން ވާހަކައެއް ހެއްޔެވެ؟ ޑޮކްޓަރުންނަށް ކުރެވެނީ ކޮން ކަމެއް ހެއްޔެވެ؟

ހިތުގައި އުފެދުނީ ހިތްހަމަނުޖެހުމެވެ. ޑޮކްޓަރުންނާ މެދު އުފެދުނީ ނަފުރަތެވެ. އެކުވެރިޔާއާ މެދު އުފެދުނީ ހަމްދަރުދީއެވެ. އޭނާގެ ގާތުގައި އެ ވާހަކަތައް އަހާކަށް ނުކެރުނެވެ. އެކަމާ އޭނާ ދެރަވާނެ ވަރު އެންމެ ރަނގަޅަށް އެނގޭނެ އެކަކީ އަހަރެންނެވެ. ބައެއް ފަހަރު އޭނާގެ މަންމައަށް ނުކުރާ އިތުބާރު އަހަންނަށް ކުރެއެވެ. ކޮއްކޮމެންނަށް ނުދޭ ސަމާލުކަން އަހަންނަށް ދެއެވެ. އެހެންވެ، އެކަން އަހަރެން ވެސް ދަންނަމެވެ. އެ އެކުވެރިޔާގެ ހާލަށް ހަމްދަރުދީވެ ކެތްކުރަމެވެ.

ދުވަސްތައް ފާއިތުވިއެވެ. އަހަރެންގެ ކިޔެވުން ރަށު މަދަރުސާއިން ނިމުނީއެވެ. ދެން އޮތީ އިތުރަށް އުނގެނުމަށް މާލެ ދިއުމެވެ. އެ ވާހަކަ އެކުވެރިޔާއަށް އެނގުނު ހިސާބުން ކަންތައް ގޯސްވިއެވެ. އެއީ މާ ކުރިން ވެސް އެކުވެރިޔާ ދައްކާ ވާހަކައެކެވެ. އަހަރެންގާތުގައި ވެސް އެތައް ފަހަރަކު އެ ވާހަކަ ދެއްކިއެވެ. އެ ފުރުސަތު އޭނާއަށް، އޭނާގެ ބައްޕަ ހޯދައިދޭނެ ވާހަކަ ބުންޏެވެ.

ކިޔެވުމަށް ޓަކައި އަހަރެން މާލެ ފުރަން އޮތް ރޭ އެކުވެރިޔާއަކަށް ނުނިދުނެވެ. އިރުއިރުކޮޅާ އަހަރެންގެ ގެއަށް އާދެއެވެ. އަހަރެންނާ ކޮންމެ ވެސް ވާހަކައެއް އަތުގެ ހަރަކާތްތަކުން ދައްކައެވެ. ސިޓީ ފޮނުވާނެ ވާހަކައާއި ފޯނުކުރާނެ ވާހަކަ ވެސް ބުނެއެވެ. އޭނާ ވެސް މާލެ ދާނެ ވާހަކަ ތިން ހަތަރު ފަހަރު ބުންޏެވެ. އެއް ވާހަކަތަކެއް އެތައް ފަހަރަކު ތަކުރާރުކުރިއެވެ.

ދެ މީހުން ދެ ތަންވީއެވެ. އެކު އުޅުނު އެންމެ ގާތް ރަހުމަތްތެރިޔާ، ލޯމަތިން ގެއްލުނީއެވެ. ހިޔަނިފަދައިން ރަށުގައި އުޅުނު މިތުރާއާ ވަކިވީއެވެ. މިއީ ގުދުރަތުން ރޭވި ހަމަޖެހިފައިވާ ގޮތެވެ.

މީހުން ބުނެއެވެ. ދުނިޔެއަކީ އަޖައިބެއް ކަހަލަ ތަނެކެވެ. އެކި ދުވަހު ދައްކާނީ އެކި މޫސުމެވެ. އެކި ފަހަރު ފޮޅޭނީ އެކި މަލެވެ. ތެދެކެވެ. މޫސުން ބަދަލުވީ ފިސާރި އަވަހަށެވެ. އެ ބަދަލު އައީ އަހަންނަށެވެ. އަހަރެންގެ ރައްޓެހިން ބަދަލު ވީއެވެ. އާ ބަޔަކު އެ ރައްޓެހިކަމުގެ އިމަށް ވަނީއެވެ. އެއާއެކު އިހުގެ އެންމެ ގާތް މިތުރުން ދުރަށް ޖެހުނީއެވެ. ދުރުގައި ތިބި މީހުން ދުރު ކުރެވުނީއެވެ. އެ ލިސްޓުގައި އެކުވެރިޔާ ވެސް ކޮންމެ ވެސް ގޮތަކަށް ހިމެނުނީއެވެ. ކުރިން އޮތް ގާތްކަން ކުޑަވަމުން ދިޔައީއެވެ.

ފުން ޚިޔާލުތަކުން ނުކުންނަން މަޖުބޫރުވީ ފޯނު ރިންގުވާން ފެށުމުންނެވެ. ދެތިން ފަހަރު ރިންގުވެފައި ފޯނު ކެނޑުނެވެ. އަހަރެން ނަންބަރު ބަލައިލާން އުޅެނިކޮށް އަނެއްކާ ވެސް ރިންގުވާން ފެށިއެވެ. އަވަސް އަވަހަށް ފޯނު ޖީބުން ނެގުމަށް ފަހު، "ހަލޯ" ގޮވާލީމެވެ.

"އަންވަރު. މީ ސިއްތައްތަ. ޔޫސުއްބެ ނިޔާވެއްޖެ. އަޅެ، ރައޫފު ގާތަށް ދޭބަލަ. އޭނާ ހަމައަކަށް އަޅުވައިދީބަލަ. މިހާރު އޭނާ މާލެ ދާނެ. އެކަން ވިޔަސް ވާނީ އަންވަރަށް. އެހެން މީހެއްގެ ބަހެއް ނާހާނެ" ރުއިމުގެ ރާގުގައި ވާހަކަދެއްކީ އެކުވެރިޔާގެ މަންމައެވެ. އެ އާދޭހުގައި ވަނީ ހިތާމައިގެ އަސަރެވެ. ލިބުނު ކުއްލި ސިހުމާއެކު އަހަރެންގެ ހަވާސް ހޭލައްވާލިއެވެ. ޖަހަމުން ދިޔަ ހުވާސް އަވަސްކުރުވިއެވެ. އެކުވެރިޔާއަށް ވާނެ ވަރު ވިސްނުނެވެ.

އެކުވެރިޔާ މުޅިގޭގައި ދުވަނީއެވެ. ބާރު ބާރަށް ރޮނީއެވެ. ބައްޕަ މަރެއް ނުވާނޭ ގޮވަމުންނެވެ. އެ އަނގައިން ބަސްތައް އަތުރަން ނޭނގުނަސް އޭނާ ގޮވަމުން ދިޔައީ އެ ވާހަކައެވެ. އެ އަޑު އިވޭ ކޮންމެ މީހަކަށް އެ މަންމަން ޖުމުލަތަކުގައި ވާ އިބާރާތްތައް ސިފަކުރެވޭހާ ވެއެވެ.

އޭނާ ބައްޕަ މަރުވާންވީ ކީއްވެ ހެއްޔެވެ؟ އުޅުނީ ގަދަފަދަ ކޮށެވެ. އެންމެ ފަހުން ވާހަކަ ދެއްކި އިރު ވެސް ގަދަފަދައެވެ. ބަލިކަމަކަށް ނުބުނެއެވެ. އުމުރުން މާ ގިނަ ދުވަސްތަކެއް ވީކީ ނޫނެވެ. ނުނިމި ހުރި އެތައް ހުވަފެނެއް އެބަ ހުއްޓެވެ. ކުރާން ރާވާފައި ވާ އެތައް ކަމެއް އެ ހުރީއެވެ. ބައްޕަ މަރެއް ނުވާނެއެވެ. އެއީ ދޮގެކެވެ. ގަބޫލެއް ނުކުރާނަމެވެ. އެކުވެރިޔާގެ މަންމަން ބަހުރުވައިން ކޮންމެ މީހަކާ ވެސް ކުރަނީ އެ ޒުވާބެވެ. ބައްޕައާ މެދު އޭނާ އުންމީދު ކަނޑައެއް ނުލައެވެ.

ދެފައި މައްޗަށް ތިރިވެ، އިނދެ، އެކުވެރިޔާ ރޮމުން ދިޔައީ، ބިންމަތީގައި ތަޅަމުންނެވެ. މީހުން އެއްވެ، އޭނާއަށް ވިސްނައި ދެވޭތޯ އުޅުނެވެ. ނަމަވެސް އެކަން ކާމިޔާބު ވާ ގޮތެއް ނުވެއެވެ. މަންމަން ބަހުރަވަ ނޭނގޭތީއެއް ނޫނެވެ. އެކުވެރިޔާގެ އިހުސާސްތައް ނުދަންނާތީއެއް ނޫނެވެ. އެ ވާހަކަތައް އަޑުއަހަން އެކުވެރިޔާ ބޭނުން ނުވާތީއެވެ. އެކުވެރިޔާ މާލެ އައީ އެ ސަބަބާ ހުރެއެވެ. ރަށުގެ އެތައް ބަޔަކާ ޒުވާބުކޮށްފައެވެ. އޭނާ ގެ "ކޮޅު" ގަދަވާނެކަން ޔަގީންކޮށްފައެވެ.

މާލޭގައި ފައިޖެހުމާ އެކު، އެކުވެރިޔާ ތުރުތުރު އަޅަންފެށިއެވެ. ފުރަތަމަ ވެސް މުޅި މާހައުލަށް ނަޒަރު ހިންގާލީއެވެ. އެއްވެފައިތިބި މީހުންގެ މޫނުމަތިން އޭނާ އެތައް ކަމެއް ދެނެގަތެވެ. ހައްތާ ވެސް އާއިލާ މީހުންނެވެ. ރަށު މީހުންނާ، ރައްޓެހިންނެވެ.

ކާރަކަށް އެރުމަށްފަހު، އާސަހާރާ މިސްކިތަށް އެކުވެރިޔާ ގެންދެވުނެވެ. އޭނާއަކަށް ކެތެއް ނުކުރެވުނެވެ. ކޮއްކޮމެންގެ ލޮލުން ހޯސްލާފައި ކަރުނަ ފައިބާތަން އެކުވެރިޔާއަށް ފެނުނެވެ. އޭގެ ޖަވާބުގައި އެކުވެރިޔާއަށް އަޑުގެކޮޅަށް ހަޅޭއްލަވައިގަނެވުނެވެ. އަދި ގަދައަޑާއެކު ރޯންފެށިއެވެ. އެހިސާބުން އެކުވެރިޔާގެ ހަށިގަނޑުން ބާރުދާހެން ހީވިއެވެ. ބަނޑުގައި އަތް އެޅުމަށް ފަހު، ހާސްވެ ވެއްޓޭން އުޅުނެވެ. ކައިރީގައި ތިބި މީހުން އޭނާ ހިފެހެއްޓިއެވެ.

އަހަރެންނާ، އެކުވެރިޔާ ދިމާވީ ހޮސްޕިޓަލުންނެވެ. އެކުވެރިޔާ ހޮސްޕިޓަލަށް ގެންދިޔަކަން އެނގިގެން އަހަރެން ދިޔައީ އެ ތަނަށެވެ. އޭނާ އޮޅުލައިގަތެވެ. ދަރިއަކު ބަފަޔަކުގައި އޮޅުލައިގަންނަ ގޮތަށެވެ. އޭނާގެ އިހްޞާސްތައް ބުނެ ދިނީ އެ ވާހަކަތަކެވެ. އޭނާ ކިޔައިދެން ބޭނުންވި އެތައް ވާހަކަތަކެއް ހުރިކަން އަހަންނަށް އެނގުނެއެވެ. އެކަމަކު އެ ހުރިހާ ވާހަކަތަކެއް، އޭގެ އަސަރާ އެކު ބަޔާން ކުރާނީ ކިހިނެއް ހެއްޔެވެ؟

މިއީ ދުނިޔޭގެ އާދައެވެ. ކޮންމެ މީހަކަށް ވެސް އެ ދުވަސް އަންނާނެއެވެ. އަހަރެން ވެސް މަރުވާނެއެވެ. އެކުވެރިޔާ ވެސް މަރުވާނެއެވެ. ބައްޕަ ވެސް މަރުވާނެއެވެ. ޖެހޭނީ ކެތްކުރާށެވެ. ކެތްތެރިވާށެވެ. އެކުވެރިޔާ ރޯ ނަމަ ކޮއްކޮމެން ވެސް ރޯނެއެވެ. ކޮއްކޮމެން ރޯ ނަމަ މަންމަ ވެސް ރޯނެއެވެ. އަހަރެން މަސައްކަތްކުރީ އެކުވެރިޔާއަށް ވިސްނައި ދެވޭތޯއެވެ. އެ ނިޔަތުގައި ހޮސްޕިޓަލްގެ އަވަސް ފަރުވާ ކޮޓަރީގައި އެތައް ވާހަކައެއް އެކުވެރިޔާއާ ހިއްސާކުރީމެވެ. އޭނާ ހިތްހަމަޖައްސައި ދެވޭތޯ އެތައް ވާހަކައެއް އަތުގެ ހަރަކާތުން ދެއްކީމެވެ. އެކަމަކު އިރުއިރުކޮޅާ އެކުވެރިޔާ ރޮއެގަނެއެވެ. އެ ހަނދާންތައް ހިތަށް ގެނެސް ހޭރިގަނެއެވެ.

އެންމެ ފަހުން އަހަރެން ބުނީމެވެ. ރޯކަމަށްވާ ނަމަ، ދެން އެ ތަނަކަށް ނުގެންދާނަމެވެ. ބައްޕަގެ މޫނުބަލާލަން ދާން ބޭނުން ނަމަ، ރުއިން ހުއްޓާލާށެވެ. އެކުވެރިޔާ އެއްބަސްވިއެވެ. އެ ގޮތަށް އެއްބަސްވި އިރު ވެސް އަހަންނަށް އެނގެއެވެ. އޭނާއަކަށް ކެތެއް ނުވާނެއެވެ. އެ ބައްޕަގެ ހަނދާންތަކާ ވަތްކެއް ނުވެވޭނެއެވެ. އެއީ އެކުވެރިޔާގެ ބައްޕައެވެ. އެކުވެރިޔާއަކީ އެހަށީގެ ލެއިން އުފެދުނު ދަރިއެވެ. އޭގެ އަސްލުނެތި ފަނާވެދާ އިރު، އޭގެ މޭވާއަށް ކެތްކުރެވޭނެ ހެއްޔެވެ؟

އަހަރެންނާއެކު ވެވިފައިވާ އެއްބަސްވުމުގެ ދަށުން އެކުވެރިޔާ އަނެއްކާ ވެސް އާސަހަރާއަށް ގެނެވުނެވެ. އެތައް ނަސޭހަތެއް ދިނުމަށް ފަހު އެތައް ވާހަކަތަކެއް ދެއްކުމަށް ފަހުއެވެ. އެ ހިސާބުން ބައްޕަގެ މޫނު އެކުވެރިޔާއަށް ފެނުނެވެ. ލޮލުން ފައިބައި ގަތް ހޫނު ކަރުނަތައް ފޭދުނީ އަހަރެންގެ ގަމީހަށެވެ. އަހަރެންގެ ލޮލުން ވެސް އެ އަސަރު، ބަންޑުން ވިއެވެ. އޮޅުވާލުމަށް ޓަކައި އަހަރެން ހުރީ މަތި ބަލަހައްޓައިގެންނެވެ. އެކަމަކު ދެ ފަރާތަށް ދެމިގެން ދިޔަ ކަރުނަތައް، އެއްވެސް ހިފެހެއްޓުމެއް ނެތި ފޭބީ ދެ ކޮނޑަށެވެ. އެކުވެރިޔާގައި އަހަރެން އޮޅުލައިގަތީމެވެ. އަހަރެންގެ އިހްސާސްތައް އޮޅުވާލީމެވެ. އޭނާ ވެސް ކުރީ އެ މަސައްކަތެވެ. ދެ ލޯ ފުހެލީ އަހަރެންގެ ކޮނޑުގައި ބޯ އަޅާލަމުންނެވެ.

އިރުކޮޅެއް ފަހުން އެކުވެރިޔާގެ ލޮބުވެތި ބައްޕަގެ މޫނު ނިވާކުރަން ފެށުނެވެ. އެކުވެރިޔާ، އޭނާގެ ބައްޕަގެ މޫނަށް އެންމެ ފަހު ފަހަރަށް ބަލާލިއެވެ. އަދި 'ބައްޕާ' އޭކިޔާ ގޮވާލަން އުޅުނުހެން ހީވިއެވެ. އޭނާގެ ބަހުރުވައިން އޭނާ ސަލާމްކުރީއެވެ. އެއަށްފަހު، އޭނާގެ އަތުގައި އޮތް ކަފަކޮޅު ބައްޕަގެ މޫނުގައި ބޭއްވިއެވެ. ތުރުތުރު އަޅައަޅައި ހުރި އެ އަތުން، ނުބާއްވަން ގޮވައެވެ. އެކަމަކު އޭނާއަށް މަޖުބޫރެވެ. ކުރިމަތީ ތިބި އެންމެންގެ ލޯތައް ހުއްޓިފައި ވަނީ އެކުވެރިޔާއާ ދިމާއަށެވެ.

ކަށުނަމާދު ނިނުމީއެވެ. އެންމެން ހިގައިގަތީ ވަޅުލުމަށް ޓަކައި ގަބުރުސްތާނާ ދިމާއަށެވެ. އަހަރެން ހުރީ އެކުވެރިޔާގެ އަތުގެ އިނގިލިތަކުގައި ބާރަށް ހިފަހައްޓައިގެންނެވެ. އޭނާއާއެކު އަބަދު ވެސް ހުންނާނަމޭ ބުނަމުންނެވެ. ކޮނެފައިވާ ފުން ވަޅުގަނޑުގެ ތެރެއަށް އެކުވެރިޔާގެ ބައްޕަގެ ސަންދޯއް ބޭލުނެވެ. އެއާއެކު "ފަސް މުއް" އުކެމުންދިޔައެވެ. އެ ހިތާމަވެރި މަންޒަރު ބަލާކަށް އެކުވެރިޔާގެ ހިތަކަށް ކުޅަދާނައެއް ނުވިއެވެ. އޭނާ ހާސްވާ ގޮތްވެ، ވެއްޓޭ ގޮތް ވިއެވެ.

އެހިސާބުން ޖެހުނީ އެކުވެރިޔާ އެ ތަނުން ނެރޭށެވެ. އޭނާޔާ އެކު އަހަރެން ނިކުތީމެވެ. އަދި ކާރަކަށް ގުޅަމަށް ފަހު ގެއަށް ގެންދިޔުމަށް މަސައްކަތް ފެށީމެވެ. އޭރު ވެސް އަހަރެންގެ ހިތް ތެޅެއެވެ. އެކުވެރިޔާގެ އިހްސާސްތައް އަޑުއިވި ރޮވެއެވެ. ދެން ކެތެއް ނުކުރެވުނެވެ. ކާރު އައުމާއެކު ދެ މީހުން ވެސް އެރީ ކާރަށެވެ. އެކުވެރިޔާ އިނީ ގަބުވެފައެވެ. އަހަރެންވެސް އިނދެވުނީ އެ ކަހަލަ ގޮތެއް ވެފައެވެ.

ކާރު މިސްރާބު ޖެހީ ސަހަރާޔާ ދުރަށެވެ. އެކުވެރިޔާގެ ބައްޕަގެ މަހާނައާ ފެޔަށެވެ. މިއީ ދުނިޔޭގެ އާދައެވެ. ކޮންމެ މީހަކަށް ވެސް އޮތީ އުމުރެކެވެ. ކަނޑައެޅި ނިމިފައިވާ ދުވަސްތަކެކެވެ. އެއީ ބަދުނަސީބެއް ނޫނެވެ. މަރުވުމަކީ ވެސް ނަސީބެކެވެ. އަހަރެމެންނަށް އޮތީ ހެޔޮ ދުއާކުރުމެވެ. ރަހުމަތް ލައްވާތޯ ދެންނެވުމެވެ. މި ދެންނެވުންތަކުގައި ވަނީ އެކުވެރިޔާގެ އާދޭހެވެ. އޭނާގެ ހިތުން ކުރެވޭ ދުއާތަކެވެ. އެކަނި އިނދެ، ކިޔޭ ތަސްބީހަތަކެވެ.

އޭގެ އަހަރުތަކެއް ފަހުން އަހަރެންގެ އެކުވެރިޔާ އުޅެނީ މާލޭގައެވެ. އަހަރެންނާ އެއް ފަސްގަނޑެއްގައެވެ. ކޮންމެ ހުކުރު ދުވަހަކު އަހަރެންނާ އެކުވެރިޔާ ދިމާވެއެވެ. 11 ޖެހުމާއެކު އަހަރެންގެ ފޯނަށް އެކުވެރިޔާ ގުޅަން ފަށައެވެ. އެކުވެރިޔާ ގުޅާ ސަބަބު އަހަރެންނަށް އެނގެއެވެ. އެކުވެރިޔާއާއެކު ހުކުރަށް ދިއުމަށެވެ. ކިތަންމެ ލަސްވިޔަސް އެކުވެރިޔާ އަހަރެންނަށް އިންތިޒާރު ކުރާނެއެވެ. މާލޭގައި އުޅޭ ނަމަ އެކުވެރިޔާ ގޮވައިގެން ހުކުރަށް ދިއުމަކީ އަހަރެންނަށް މަޖުބޫރު ކަމެކެވެ. ނުދެވިއްޖަ ނަމަ ކަންތައް ވަރަށް ގޯސްވާނެއެވެ. އެކުވެރިޔާ ވަރަށް ދެރަވާނެއެވެ. ފާއިތުވީ 8 އަހަރު ކޮންމެ ހުކުރު ދުވަހަކު (މާލޭގައި އުޅޭނަމަ) އެކުވެރިޔާއާ އެކު އެއް ސުފުރާއަކުން އިންސާފުކުރީމެވެ. ހަފުތާއަކު 2 ގަޑި އިރު އެކުވެރިޔާއާއެކު ވަގުތު ހޭދަކުރީމެވެ. މިހާރު އެކުވެރިޔާ އުޅެނީ އަމިއްލަ ރަށުގައެވެ. ވަޒީފާގައެވެ. މިހާރު ވެސް ހަފުތާއަކު އެއް ފަހަރު ނަމަވެސް ގުޅާލާނެއެވެ. ނަމަވެސް އެއީ މަންމަނެކެވެ. އަނގައިން ވާހަކަނުދެއްކޭ މިތުރެކެވެ.