ކީރިތި ޤުރްއާނުގައި އަޚުލާޤަށް އެހައި ބޮޑަށް އިސްކަން ދެއްވާފައި ވުމަކީ އަޚުލާޤަށް ލިބިދޭ ޚާއްޞަ ޤަދަރެކެވެ. އަދި އޭގެ ސަބަބުން މުޖުތަމަޢުގެ ފަރުދުންގެ ސްލޫކަށް ލިބިދެވޭ މަތިވެރި އިރުޝާދު ތަކަކީ އަޚުލާޤުގެސިފަ، އެތައް ގުނައަކަށް މަތިވެރި ކޮށްދޭ ކަމެއް ވެސް މެއެވެ. ކީރިތި ޤުރްއާނުގެ ވަރަށް ގިނަ އާޔަތްތަކުގައި އަޚުލާޤުގެ މަތިވެރި ސިފަތަކާއި އޭގެ މަފްހޫމުތައް ބަޔާންކޮށްދެއްވާފައި ވެއެވެ. އަދި އޭގެ ސަބަބުން ފަރުދުންގެ ދިރިއުޅުމަށް އަންނާނެ ބަދަލުތަކާއި ކުރާނެ އަސަރުތައް ވެސް ބަޔާންކޮށްދެއްވާފައި ވެއެވެ. އެހެންކަމުން ކީރިތި ޤުރްއާނަކީ އިންސާނާގެ ނަފުސު ތަހުޒީބުކުރުމަށް ބޭނުންވާ ކާނާ ލިއްބައިދޭ އެންމެ އިސް މަސްދަރުކަމުގައި ވެއެވެ. އަދި އެންމެ ހެޔޮމަގަށް އިންސާނާއަށް މަގުދައްކައިދޭ ދަންމަރަކީ ވެސް ކީރިތި ޤުރްއާނެވެ.
ކީރިތި ޤުރްއާނުގައި ވަރަށް ގިނަ ރީތި ސިފަތަކާއި ކަންކަން ޝާމިލުގޮތެއްގައި އުގަންނައިދީފައި ވަނީ ފުރިހަމަ ބަލާޣާތްތެރި ޢިބާރާތްތަކުންނާއި ފުން މާނާތައް އެކުލެވޭ ގޮތެއްގައެވެ. އަމާނާތްތެރިކަމާއި ތެތުވެރިކަމާއި ޢަދުލުވެރިކަމާއި ހަމަހަމަކަމާއި އިންސާފާއި އޯގާތެރިކަމާއި ތަވާޟުޢުވެރިކަމާއި މުޢާމަލާތްތައް ހިންގާނެ ގޮތްތައް ބަޔާންކޮށްދެއްވާފައި ވަނީ ވިސްނާ ފިކުރުހިންގާ ބަޔަކަށް އިބުރަތެއް ޙާޞިލްވާނެހައި ވެސް ފުރިހަމަކޮށެވެ.
ކީރިތި ޤުރްއާނުގައި ބާޔާންކުރައްވާފައިވާ މިދެންނެވި ފަދަ އެންމެހައި ސިފަތަކަކީ ސަލާމަތްތެރިކަން ޤާއިމު ވެފައިވާ ހިތްހެޔޮ، އޯގާތެރި އަދި މަތިވެރި އަޚުލާޤުގެ ވެރި މުޖުތަމައެއް ބިނާކުރުމަށް ބޭނުންވާނެ ސިފަތަކެކެވެ.
އިޖުތިމާޢީ، އިޤްތިޞާދީ އަދި ސިޔާސީ ގޮތުން މުޖުތަމަޢުތައް ކުރިމަތިލާންޖެހިފައި ވަނީ ވަރަށް ގިނަ ގޮތްގޮތުން ގޮންޖެހުންތައް ހުރި ދިރިއުޅުމަކާއެވެ. 21 ވަނަ ޤަރުނުގައި ވެސް މި ފަދަ ދިރިއުޅުން، ހަމަ މަގަށް ގެންދިއުމަށް ބޭނުންވަނީ މީގެ ސާދަސަތޭކަ އެތައް އަހަރެއްގެ ކުރިން ވެސް މުސްލިމުން ދިރިއުޅުން ބިނާކުރި މަތިވެރި މަސްދަރު ކަމުގައިވާ ކީރިތި ޤުރްއާނަށް ރުޖޫޢަ ވުމެވެ. އެ ޤުރްއާނާ މެދު ވިސްނާ ފިކުރު ކުރުމެވެ.
أَفَلَا يَتَدَبَّرُونَ الْقُرْآنَ أَمْ عَلَىٰ قُلُوبٍ أَقْفَالُهَا މާނައީ: ފަހެ، ޤުރްއާނާމެދު އެއުރެން ވިސްނައި ފިކުރު ނުކުރަނީހެއްޔެވެ؟ ނުވަތަ (އެއުރެންގެ) ހިތްތަކުގައި ތަޅުތަކެއް ލެވިފައިވަނީ ހެއްޔެވެ؟ (ނުނިމޭ)
