ނުޒޭރަށް ގަބޫލުކުރެވުނީ ފެނުނު ދުވަސްވީ ގާތަކަކީ އާދައިގެ ގާތަކެއް ނޫންކަމެވެ. އެގާތަށް އެއްގާ އަނެއްގަލާ ގުޅުވާލެވޭނެ ކަމެވެ. އޭނާއަށް ޔަގީން ކުރެވުނީ އެތައް ދުވަހެއްގެ ކުރީގެ ހަދާންތަކާ އެގާތައް ގުޅިފައިވާކަމެވެ. އެހެންވެ، އެ ގާތަކުގައިވާ އަކުރުތައް އޭނާގެ ޢިލްމާ ގުޅުވާލުމަށްފަހު، ސިކުނޑިއަށް އޭގެ ބައްޓަން ނަގައި ލިޔުމުގެ ނިޒާމުތަކާ ގުޅުވާލީއެވެ. ބޮޅުތަކެއްހެން ކަނޑާ ނަގާފައިވާ އަކުރުން އެއީ ބްރަހަމީ އަކުރުކަން އޭނާ ދެނެގަތީ ވަރަށް ފަސޭހަކަމާއެކުއެވެ. އެއާއެކު އޭނާގެ އަތުގައިއޮތް ފޯނުން ނެޓަށްވަނީ އެކަން ޔަގީން ކުރުމަށެވެ. ނަމަވެސް އެކަމަށް ހުރަސް އެޅީ ނުޒޭރުގެ ލޯބިވެރިޔާ މިޒްނާ އެވެ.

" ކޮބާ އަދިވެސް މެންދުރު ނުކަންދޯ؟ މިހާރު އެހަރަ ހަވީރު ވަނީ." މިޒްނާ ފެށީ ޝަކުވާއެވެ. އެއީ އާއްމުކަމެކެވެ. ކޮންމެ ދުވަހަކު އޭނާ ގުޅަނީ ނުޒޭރު ނުކައި ހުންނަކަން އެނގޭތީއެވެ. އެ މަސައްކަތުގައި އުޅޭއިރު ވަގުތުތައް ދާގޮތް އޭނާއަށް ނޭނގޭތީއެވެ. އެކަމުގެ ތެރެއަށް ވަދެ، މާބޮޑަށް ގެއްލޭތީއެވެ.

" މިއަދު ވަރަށް ބިޒީ. މި އުޅެނީ ވަރަށް ދުވަސްވީ ގާތަކެއް ފެނިގެން. ފަހުން ގުޅާނަން އިނގޭ." ދެތިން ޖުމުލަ ބުނުމަށްފަހު ނުޒޭރު އުޅުނީ ފޯނުބާއްވާށެވެ.

" ނޫން.. މަޑުކޮށްބަލަ. ވަރަށް މުހިންމު ވާހަކައެއް ދައްކާށޭ މި ގުޅީ. މިހާރު އަހަރެންނާ ވާހަކަދައްކާލާނެ ވަގުތު ވެސް ނުވަނީތަ؟" ނުރުހުމުގެ ރާގުގައި މިޒްނާ ފެށި ޖުމުލަތައް އޭނާ ނިންމާލީ ސުވާލަކުންނެވެ.

" ނޫން... ނޫން. ހަމަ ހަގީގަތުގައިވެސް ވަރަށް ބިޒީ. އިރުއޮއްސުމުގެ ކުރިން މިއަދުގެ މަސައްކަތް ނިންމާލެވޭތޯ މި އުޅެނީ. ދެން ބާއްވަނީ އިނގޭ!" ނުޒޭރު ބޭނުންވީ  ފޯނު ބާއްވާށެވެ. މިޒްނާ ބޭނުންވީ އޭނާ ދައްކަން އުޅޭ ވާހަކައައިގެން ކުރިއަށް ދާށެވެ.

" މަޑުކޮށްބަލަ... ކުޑަ ވަގުތުކޮޅެއް ދެވިދާނެއްނު. މިއީ ވެސް މުހިންމު ވާހަކައެކޭ." މިޒްނާ ދައްކަމުން ދިޔަ ވާހަކަތައް ނުޒޭރު މެދުކަނޑާލިއެވެ.

" މިޒޫ އަބަދުވެސް ދައްކާނީ މުހިންމު ވާހަކަ. ދެން ތި މުހިންމު ވާހަކަ  ދައްކާނީ ފަހުން ދޯ." ނުޒޭރު ހިފީ ފޯނުބާއްވާށެވެ.

" ނޫން.. ނޫން.. އިހަށް މަޑުކޮށްބަލަ.. މިއަދުވެސް ބައްޕަ ވާހަކަތަކެއް ދައްކައިފި. ބައްޕަ ބުނީ އަހަރެންނަށް މިހުރީ ނުޒޭރު ސިހުރު ހަދާފަޔޯ. އަހަރެން އެހާ މޮޔަވެފައި މި ހުންނަނީވެސް އެހެން ވެގެންނޯ. ނުޒޭރުގެ ކާފައަކީ ރަށުގެ ވަރަށް ގިނަ ބަޔަކަށް ސިހުރުގެ ހެދި މީހެކޭވެސް ބައްޕަ ބުނި. އަދި އަހަރެންގެ ކާފަ މަރުވީ ވެސް އެ ބަލީގައިކަމަށާއި ނުޒޭރަށް ވެސް އެކަންކުރަން އެނގޭނެކަމަށް ބައްޕަ ބުނި." މިޒްނާ ދައްކަންފެށި ވާހަކަތަކުން ނުޒޭރަށް އަސަރު ކުރިއެވެ. އުންމީދު ވެރިވެފައިވާ މޫނަށް ނުތަވަސްކަމުގެ ކުލަވަރު ވެރިވިއެވެ. މިޒްނާގެ ބައްޕަ ނުޒޭރާ ނުގަބޫލުވާ ސަބަބު އޭނާއަށް ދެނެގަނެވުނެވެ. ނަމަވެސް އެކަން ނުޒޭރު ސިއްރު ކުރީއެވެ.

" ތި ހަދާއެއްޗެއް ތިހުރީ ހަދާފައި. އަހަރެންނާ ހެދި މިޒޫ މޮޔަވުމުން ރަނގަޅެއްނު.... ކޮބާ ގޯހަކީ؟" ނުޒޭރު ޖަހާލީ ހިނިގަނޑެކެވެ.

" ގޯހަކީ ބައްޕަ ނުޒޭރާ މެދު ދެކޭގޮތް. ތި އާއިލާއާމެދު ދެކޭ ގޮތް. އަހަރެމެންގެ ގުޅުމަށް އެޅޭ ހުރަސް. ހައްތާވެސް ގޯހެއްނު." މިޒްނާ ހިތްހަމަ ނުޖެހުނެވެ.

" ދެން ތީ ކޮންކަހަލަ ވާހަކައެއް މި ގަޑީގައި ދައްކަން. ބައްޕަ އަބަދުވެސް އުޅޭނީ އަހަރެމެން ދެ މީހުން ދުރުކުރުވަން. މިހާރު ދެން ބާއްވަނީ. ފަހުން ތި ވާހަކަދައްކާނީ." މިޒްނާ ވާހަކަދައްކަދައްކަ ހުއްޓާ ނުޒޭރު ފޯނު ކަނޑާލިއެވެ. މަދު ފަހަރަކު ނޫނީ އެހެނެއް ނުހަދައެވެ. ކޮންމެ ވާހަކައެއް ދެއްކިޔަސް އޭނާ އަޑުއަހައެވެ. ނުޒޭރު އެހެން ހެދީ ހަމަ ބިޒީވީމާކަން މިޒްނާ ގަބޫލުކުރިއެވެ. އޭނާގެ މަސައްކަތަށް ހުރަސްއެޅުމުންކަން އޭނާގެ ހިތް ބުންޏެވެ. ނުޒޭރަށް ސޮރީގެ މެސެޖެއް ފޮނުވާލީ އެހެންވެއެވެ. އެ ކުރާކަމެއް ބަލައިލުމަށް އެތަނަށް ދިއުމަށް  އޭނާ ހިތުން ރާވަމުންނެވެ.

ފޯނު ކަނޑާލުމަށްފަހު ނުޒޭރު އުޅުނީ މަސައްކަތުގެ ތެރެއަށް އެނބުރި ވަދެވޭތޯއެވެ. ނަމަވެސް މިޒްނާ ދެއްކި ވާހަކަތަކުން ހިތަށް އުނދަގޫ ވާ ގޮތްވިއެވެ. ނުޒޭރުގެ ކާފައާމެދު ދެއްކި ވާހަކަތަކުގެ އަސަރު އޭނާއަށް ކުރިއެވެ. ތެދެކެވެ. ކާފައަކީ އެ ބުނާ ކަހަލަ މީހެކެވެ. ރަށުގެ ގިނަބަޔަކަށް ސިހުރުހެދިކަމަށް ބުނާ މީހެކެވެ. އެކަމަކު އެއީ މީގެ އެތައް އަހަރެއް ކުރީގެ ވާހަކަތަކެކެވެ. މިހާރު އެކާފައެއް ދުނިޔެއަކު ނެތެވެ. ކާފަ މަރުވިތާ ކިތަންމެ އަހަރެކެވެ. އެ ކާފަ އެ ކަން ކުރިނަމަވެސް އެ ކަމާ ނުޒޭރާ ގުޅުވީ ކީއްވެ ހެއްޔެވެ؟

ޚިޔާލުގެ ފުންކަނޑަކަށް ގެނބެމުން ދިޔަ ނުޒޭރަށް އެނބުރި މަސައްކަތުގެ ތެރެއަށް ވަދެވުނީ އެތައް އިރެއް ފަހުންނެވެ. ހޯދުނު ގާތައް، ސައިޓްގައި ހަދާފައިވާ ކުޑަ ޖިފުޓިގަނޑަށް ގެންގޮސް އެ ގާތައް ސާފުކުރަން އިންނަތާ ކިތަންމެ އިރެކެވެ. ފަރުވާތެރި ދެ އަތުން ފަހަރަކު ގަލެއް ސާފުކުރުމަށްފަހު އެ ގާތަށް ރާވަމުން ދިޔައެވެ. އެ ކަމަށް ވެސް އެތައް ވަގުތެއް ނެގިއެވެ. ބާކީ އޮތް ދެ ގާ ލާންވީތަން އެ ވަނީ ޔަގީންކުރެވިފައެވެ. ނަމަވެސް ސާފުކޮށްލާފައި ނޫނީ އެތާ ނުބާއްވަން އޭނާ ނިންމީއެވެ. އަތުރާލެވިފައިވާ ގާތަކުން އުފެދުނު ތިން ފޫޓް ދިގު، ދެ ފޫޓް ފުޅާ ގާގަނޑުގައި ލިޔެފައި ވަނީ ކޮންޗެއްކަން ނުޒޭރަށް ނޭނގުނަސް އެއީ ތާރީޚީ ލިޔުންތަކެއްކަން އޭނާއަށް ޔަގީންވިއެވެ. ކޮންމެވެސް އާ ހޯދުންތަކެއް އެއިން ހޯދޭނެކަމަށް އޭނާއަށް ގަބޫލުކުރެވުނެވެ. ކުރެވުނު ބުރަ މަސައްކަތުގެ ހިތްހަމަޖެހުން، ފުން ނޭވާއަކާއެކު ލިބިގަންނަމުން އަތުގައިވާ ގަޑިއަށް ނުޒޭރު ބަލައިލިއެވެ. ދެން އަވަސްވެގަތީ މަސައްކަތް ކުރަމުންދާ ސައިޓްގައި ހުރި ތަކެތި ހަމައަކަށް އަޅުވާލުމަށެވެ. އަސުރު ނަމާދު ނުކޮށް ހުރުމުގެ ސަބަބުން އިރުއޮއްސުމުގެ ކުރިން ގެއަށް ދިއުމުގެ ބޭނުމުގައެވެ.

ނުޒޭރު މަސައްކަތްކުރާ ސައިޓުން ނައްޓާލިތާ އަދިވާނީ ދެތިން މިނެޓެވެ. ސައިކަލުގައި އައިސް އެ ތަނަށް މަޑުކޮށްލީ މިޒްނާއެވެ. ސައިޓްގައި ހުރި ޖިފުޓިގަނޑާ ހަމައަށް މިޒްނާ ދިޔައީ ގުދުވަމުން ކަހަލަ ގޮތަކަށެވެ. މެދާހަމައަށް ދެބިތް ބައްދާފައިވާ އެތަނުގައި ނުޒޭރު އުޅޭނެކަން ޔަގީން ކޮށްގެނެވެ. އޭނާ ބޭނުންވީ ނުޒޭރު ސިއްސުވާލާށެވެ. ނަމަވެސް މިޒްނާއަށް ލިބުނީ ޝޮކެކެވެ. ނުޒޭރު އެތާކު ނެތެވެ. އޭނާ އަވަސް އަވަހަށް ފޯނު ނެގުމަށްފަހު ނުޒޭރަށް ގުޅިއެވެ. އެތައް ފަހަރަކު އެނަމްބަރަށް ޖެހިއެވެ.

މިޒްނާގެ ލޮލުގައި އަޅައިގަތީ ރާވާލެވިފައިވާ ގާގަނޑެވެ. ހެނދުނުއްސުރެ ނުޒޭރު ކުރަމުންދިޔަ މަސައްކަތެވެ. އޭނާ ބޭނުންވީ އެގާގަނޑުގެ ފޮޓޯއެއް ނަގާށެވެ. ނުޒޭރަށް ސަޕްރައިޒެއް ދޭށެވެ. އޭނާއަށް ނޭނގި އެ ތަނަށް ދެވުނީތީއެވެ. އެހެންވެ ގާނގަނޑަށް ބަލަހައްޓައިގެން ހުރުމަށްފަހު ނެގީ ފޮޓޯއެކެވެ. އެ ވަރަކުން ހިތްހަމައެއް ނުޖެހުނެވެ. ގާގަނޑުން މަދުވާ ބައި ގުޅުވާލާ ހިތްވިއެވެ. ބާކީ އޮތް ދެ ގާ ނެގުމަށްފަހު މަދުވާ ޖަގަހަށް ދެ ގާ ފައްތާލުމުގެ މަސައްކަތް ފެށިއެވެ.

އޭރު ފެނުގެ ސަތަހައިން އިރު ފޮރުވެނީއެވެ. ރަތްވިލާ ކުލަތަކުން އުދަރެސް ދޮން ކުރަނީއެވެ. މާދުރުދުރުގައި އުޅުމަށްފަހު ތަފާތު ދިރުންތައް އެ ސޮރުމެންގެ ހާއްޔަށް އައިސް ވަންނަނީއެވެ. މިޒްނާގެ އަތުގައި އޮތް ފަހު ގާގަނޑު ބޭއްވުމާއެކު އަތުރާލެވިފައިވާ ގާތަކަށް އެރީ ކުއްލި ލޮޅުމެކެވެ. އެއާއެކު މުޅިތަނަށް އަލިވިގެން ދިޔައެވެ. ދެން ފެނުނީ ކަށްބޯހެރަމަތިން އައި އަލިގުޅައެއް ގާގަނޑުތެރެއަށް ވަންތަނެވެ. އެ އަލިގުޅަ ހިތަދޫއާ ދިމާއަށް އައި މަންޒަރު ރަށުގެ އަތިރިމަތީ ތިބި ބައެއް މީހުންނަށް ފެނުނެވެ. ފެނުނު މީހުންގެ ހިތްތަކަށް ބިރުވެރިކަން ވަނެވެ. ހައިރާންކަމާއެކު އެމަންޒަރަށް ބަލަހައްޓައިގެން ތިބެވުނެވެ. މިޒްނާއަށް ހުރެވުނީއެވެ. ވާނުވާ ނޭނގިފައެވެ. ހަރަކާތް ހުއްޓިފައެވެ. އޭނާއަށް ހަރަކާތްކުރެވުނީ އިވެން ފެށި މޫސީގީ ރާގުންނެވެ. އެ ރާގުގެ މަސްތުގައި މިޒްނާއަށް ޖެހެވުނެވެ. ކުރިމަތިން ފެނުނު ކަންތައްތައް ހަނދާން ނެތުނެވެ.

މިޒްނާއަށް އިވެމުންދިޔަ ރާގު އިވެންފެށިތާ މާގިނައިރެއް ނުވެއެވެ. އިރުކޮޅެއް ފަހުން، ކޯއްޓޭމަގުގެ ނިމޭހިސާބުގައި ހުންނަ ރަނިންހަނާ ފެންގަނޑާ ދިމާއަށް ސައިކަލުގައި ދިޔަ ދެ އަންހެނަކަށް ވެސް އެއަޑު އިވުނެވެ. އެ އަޑު އިވުމާއެކު އެ މީހުންނަށް މަޑުކޮށްލެވުނެވެ. އެ މީހުންގެ ނަޒަރު ހުއްޓުނީ ސައިޓްގައި ހުރި ޖިފްޓިގަނޑުގެ ބޭރުގައި އޮތް ގަސްބުޑެއްގެ މަތީ، ބޯގުޑުވާލަ ގުޑުވާލަ އިން މިޒްނާއަށެވެ. މިޒްނާގެ އެ ހަރަކާތްތަކުގައި އެ މީހުންނަށް ބައިވެރިވެވުނީ އިވެމުންދިޔަ ރާގުގެ މަސްތުގައި ބަނދެވެމުންނެވެ. އެ ރާގުގެ އަޑު އަންނަނީ ކޮން ދިމާއަކުންކަމެއް ނޭނގެއެވެ. ބައެއް ފަހަރު އެ ރާގު ގަދަވެފައި މަޑުވާހެން ވެސް ހީވެއެވެ. މާދުރުދުރުން ވަޔާއެކު އެ ރާގު އަންނަހެން ވެސް ހީވެއެވެ. ދިމާކުރިމަތިން އެރާގު އިވޭހެން ވެސް ހީވެއެވެ.

އެ ރާގުގެ މަސްތުގައި ތިން މީހުން ތިއްބާ ކޯއްޓޭ މަގުން ރަށުތެރެއާ ދިމާއަށް ދެމަފިރިއަކު ސައިކަލުގައި ދަތުރުކުރިއެވެ. ސައިކަލުގައި އިން ފިރިހެން މީހާގެ ލޮލުގައި އަޅައިގަތީ އެތާ މަޖާކުރަމުންދާ ތިން އަންހެނުންނެވެ. ސައިކަލުން ފޭބި އަންހެން މީހާގެ ކަންފަތަށް ވިރުވާއެޅެމުން ދިޔައީ އިވެމުންދިޔަ ރާގެވެ. އެހިތްގައިމު ރާގުގެ އަސަރު ކުޅެލީ އެ އަންހެން މީހާގެ ހިތާއެވެ. ހަށިގަނޑުގައި ދައުރުވަމުން ދިޔަ ލެއާއި ޖަހަމުން ދިޔަ ވިންދާއެވެ. އެ މީހުންގެ ހަރަކާތްތަކަށް އެ އަންހެން މީހާ ވެސް ގެނބިގެން ދިޔައެވެ. ފިރިހެން މީހާ ގަތީ ބިރެވެ. ކުރިމަތީ ތިބި އަންހެނުންތައް އެއްގޮތެއް ހަދާތަން ފެނުމުންނެވެ. އޭނާގެ އަންހެނުން ފަހަތުގައި ހުރެ އެގޮތަށް ހަރަކާތް ކުރާކަން އެނގުނީ ފަހަތް ބަލައިލުމުންނެވެ. އޭނާއަށް ހަޅޭލަވައި ގަނެވުނީއެވެ. އަޑުގައި ނެތްތަނަށް "މީހެކޭ މީހެކޭ" ކިޔާ ގޮވަން ފެށުނީއެވެ. އަތުގައިވާ ފޯނުން އެހެން މީހަކާ ގުޅުމަށް ހަނދާންވީ މާ ފަހުންނެވެ.

މާ ގިނައިރެއް ނުވެ މުޅި ރަށަށް ޚަބަރު ފެތުރިއްޖެއެވެ. އެ ވާހަކައިން ވައިބާއާއި ސޯޝަލް މީޑިއާ ހިސޯރުކުރިއެވެ. ރަށުގެ ކަންވެރިންގެ ކަންފަތާ ހަމައަށް އެ ވާހަކަ ފޯރިއެވެ. ދުވަސްވީ މީހުންނަށް ތެޅިގަނެވުނީއެވެ. މުޅި ރަށުތެރެ ހަލަބޮލިވީއެވެ. މީހުންތައް ކޯއްޓޭ މަގާ ދިމާއަށް ޖަމާވަނީއެވެ. ސައިކަލުގައި ދުއްވަމުން އައި މީހުންނަށް ދެވުނީ ކޯއްޓޭ ދެ މަގު ބެދުނު ހިސާބަށެވެ. އެހިސާބުގައި ވާ ހަނި މަގުގެ ހުރަހަށް ވާހެން ލަކުޑިތަކެއް އަޅާ މަގު ވަނީ ބަންދުކޮށްފައެވެ. އޭރު މުޅިތަން ވަނީ ތޮއްޖެހިފައެވެ. އެއް ބަޔަކު އުޅެނީ ވާނުވާ ނޭނގިގެންނެވެ. އަނެއް ބަޔަކު އުޅެނީ އެ މަގުން އެތެރެއަށް ނުވަދެވިގެންނެވެ. ރަށުގެ ބައެއް ހަރު މީހުން މަސައްކަތްކުރަމުން ދިޔައީ އެއްވެފައިތިބި މީހުންނަށް ވިސްނައި ދެވޭތޯއެވެ. އެއްވެސް އަންހެނަކު އެ ހިސާބަށްވުރެ އެތެރެއަށް ނުދާންވީ ސަބަބު ބުނެދެވޭތޯއެވެ.

ފެންވަރައި ނިމިގެން މަޣުރިބު ނަމާދު ކޮށްލައިގެން ނުޒޭރުވެސް އަވަސްއަވަހަށް މިސްކިތުން ފޭބީ ރަށުތެރޭގައި މީހުންގެ އަޑުފަށްގަނޑު ގަދަވާން ފެށުމުންނެވެ. ސައިކަލުގެ ބަރުގޮންގެ އަޑާއި ބާރު ސްޕީޑްގައި އުޅަންދުތައް ދުއްވާއަޑު ގަދަވާން ފެށުމުންނެވެ. އަވަސް އަވަހަށް ނުޒޭރަށް ބަލައިލެވުނީ ފޯނަށެވެ. ފޯނުއޮތީ އަސުރު ނަމާދަށް ސައިލެންޓަށްލީ ގޮތަށެވެ. ފޯނުގައި އެތައް މިސްކޯލެއް އޮތެވެ. އެތައް މެސެޖެއް އައިސްފައި އޮތެވެ. އޭނާ އަށް ލިބުނީ ކުއްލި ހައިރާންކަމެކެވެ. އޭނާވެސް މިސްރާބުޖެހީ ސައިޓާ ދިމާއަށެވެ. އަވަސްވެގަތީ ލިންކްރޯޑުން ގޮސް ޑޭޒީމަގުން ސެންޑިއާ ހިނގުމަށް އެޅުމަށެވެ.

މީހުންގަނޑުގެ ތެރެއިން ނުޒޭރަށް އެ ހިސާބަށް ދެވުނުއިރު އަންހެނުންތަކެއް ރޮނީއެވެ. އެމީހުން އެސަރަހައްދުން ދުރަށް ގެންދާތީވެ ހަޅޭލަވަނީއެވެ. އެތަން ދޫކޮށް ގެއަށް ނުދިއުމަށް ވަރުދައްކަނީއެވެ. އެތަނުން ގުޑާނުލުމަށް ގަދަފައި ވިއްދަނީއެވެ. ނުޒޭރަށް ހީވީ ފައިދަށުން ބިންގަނޑު ދެމިގަތްހެނެވެ. އޭނާގެ ލޯބިވެރިޔާ މިޒްނާ އުޅޭގޮތް ފެނުމުންނެވެ. އޭނާއަށް ވާގޮތް ބަލަން ނުޒޭރަކަށް ނުހުރެވުނެވެ. ހަޅޭފަޅޭލަވަމުން އޭނާ ދޫކުރުމަށް ނުޒޭރު ގޮވަން ފެށިއެވެ. މިޒްނާގެ ކުރިމައްޗަށް ނުޒޭރު އެރިނަމަވެސް އޭނާ ރެއަކާ ނުލިއެވެ. މިޒްނާގެ ބާރު އަޑުން އޭނާއަށް އަނިޔާ ނުކުރުމަށް ލެވީ ހަޅޭކެވެ. އޭނާ އެތަނުގައި ބެހެއްޓުމަށް ކުރީ އާދޭހެވެ. އެތަނުގައި ތިބި ހަތަރު އަންހެނުންގެ އެދުމަކީ އެއީއެވެ. އެ މީހުން އެތަނުން ނުގެންދިއުމެވެ. އެތަނުގައި ބޭތިއްބުމެވެ. އެ އާދޭހަށް ފުރަގަސް ދީ އެ މީހުން ރަށުތެރެއަށް ގެންދަން ފެށުމުން އެ އަންހެނުންނަށް ހެދުނު ގަދައެއް ހެދީއެވެ. ބާރުގަދަ ތިން ހަތަރު ފިހެނުންނަށް އެއިން އަންހެނަކު މަތައެއް ނުވެއެވެ. ތެޅިފޮޅޭވަރުން އޮތްބެއް ނޯވެއެވެ. ހަތަރު އަންހެނުން އެގޮތަށް މަތަކުރުންވީ އުނދަގޫ ކަމަކަށެވެ. އެންމެފަހުން ޖެހުނީ ހަތަރެސްފައި އައްސާށެވެ. އެއަށްފަހު އެ ތަނަށް ގެންދެވުނު އެމްބިއުލަންސާއި ދެ ޖިޕަށް އެ އަންހެނުންތައް އެރުވުމަށް ފަހު ސިއްޙީ މަރުކަޒަށް ގެންދެވުނީއެވެ.

ރަށުގެ ގިނަ ބަޔަކު ސިއްހީ މަރުކަޒު ދޮށަށް ޖަމާވެފައިވެއެވެ. އެ އެންމެންގެ މޫނު މަތިން ފެންނަނީ ބިރުވެރިކަމެވެ. ހާސްކަމާއި ނުތަނަވަސްކަމެވެ. ކޮންމެ މީހެއްގެ ހިތުން ކުރަނީ ސުވާލުތަކެކެވެ. އެހެން ވާންވީ ކީއްވެހެއްޔެވެ؟ އެ ކަން ކުރީ ކާކު ހެއްޔެވެ؟ ހުއްޓުން އަރާފައިވާ ނުޒޭރަށް ވެސް ހިތުން ކުރެވެނީ ހަމަ އެ ސުވާލުތަކެވެ. މިޒްނާ އެ ތަނަށް ދިޔަ ސަބަބެވެ. އޭނާއަށް އެހެން ވާންވީ ގޮތެވެ. އެ ގޮތް މެދުވެރިވީ މީހުންގެ އާއިލާތަކަށް ލިބުނީ ހިތާމައެވެ. އެކަމުގައި ކެތްކުރެވުނީ ބައެއް މީހުންނަށެވެ. އަނެއް ބަޔަކު އަޑުގެ ކޮޅަށް ރޮނީއެވެ. އެފަދަ ގޮތެއްވުމުން އެ ހިތާމާގައި ގިސްލަނީއެވެ. އެ މީހުން ހަމަޔަކަށް އެޅުވުމަށް އެއް ބަޔަކު އުޅޭއިރު އަނެއް ބަޔަކު ތިބީ ރުޅިގަދަވެއެވެ. މިޒްނާގެ ބައްޕަވަނީ ހަމައިން ނައްޓާފައެވެ.

"މަށަށް އޭރު ވެސް އެނގޭ ނުޒޭރަކީ އެ ކަހަލަ މީހެއްކަން. އެއީ އޭނާ ހަދައިގެން އުޅޭ ސިހުރެއް. އޭނާގެ ކާފައަކީވެސް އެ ކަހަލަ މީހެއް. ރަށުގެ ރައްޔިތުންނަށް ސިހުރު ހެދި މީހެއް. މާ ހެޔޮ އެދިގެން އެ މަންޖެ ދެކެ ލޯބިވާކަމަށް ހެދިގެން އެބަ އުޅެއެއްނު." މިޒްނާގެ ބައްޕަގެ ބަރު އަޑުން އެންމެންގެ ނަޒަރު ހުއްޓުނީ ނުޒޭރަށެވެ. އިސްދަށަށް ޖެހިފައިވާ ނުޒޭރަށް ހުރެވުނީއެވެ. ބުނާނެ އެއްޗެއް ނެތެވެ. މިޒްނާގެ ބައްޕައާ ދެކޮޅަށް ދައްކާނެ ވާހަކައެއް ނެތެވެ.

"ކަލޭ ހަމަ މިހާރު މިތަނުން ދޭ. މި ކަން ކުރީ ކަލޭ. މި ސިހުރު ހެދީ ކަލޭ. އަހަރެންނަށް ހަމަ ޔަގީން އެއީ ކަލޭ ކުރި ކަމެއްކަން. މާ މޮޅު މީހަކަށް ވެގެން ތަންތަން ކޮނެކޮނެފައި ދުވަސްވީ އެއްޗެހިތައް ހޯދަ ހޯދާފައި އުޅެއެއްނު. އެ ދުވަސްވީ ފޮތްތައް ނަގައިގެން ކުރަން އެނގުނު ކަމަކީ މީތަ؟ އެ ނޫން ކަމެއް ކުރަން ކަލެއަކަށް ނޭނގުނުތަ؟ މަގޭ ދަރި ނޫން މީހަކާ ހިތާވާކަށް ނުލިބުނުތަ؟" ރުޅިގަދަވެފައިވާ ބައްޕަގެ އެތެރެހަށީގައި އަނދަމުންދާ އުދާސްތަކާއެކު ބޭރުކުރާ ބަސްތަކުން ނުޒޭރުގެ ހިތަށް ތަދުވަމުން ދިޔައެވެ. މުޅި މީހާ ހާސްވެ ކަންބޮޑުވަމުން ދިޔައެވެ. ހިއްލަމުން ދިޔަ ދަލާއެކު މާނޭވާ ވެސް ލެވެން ފެށިއެވެ.

ނުޒޭރަށް މަޖުބޫރުވީ އެ ތަނުން ދާށެވެ. އޭނާ އެ ތަނުގައި ހުރުމަށް ވުރެ ނުހުރުން ރަނގަޅުވާނެކަމަށް ވިސްނިގެންނެވެ. ބައެއް މީހުން އޭނާ އެތަނުގައި ހުންނަން ދެކޮޅު ހެދުމުންނެވެ. ނުޒޭރަށް ގޮތް ހުސްވިއެވެ. އެތެރެ ހަށީގައި އޮތް ހިތުން އުފެއްދި ހިތާމައިގެ ރާޅު ލޮލަށް ބިންދާލިއެވެ. ނަމަވެސް އޭނާ ހިތްވަރު ކުރިއެވެ. ކެތްތެރި ވިއެވެ. އަމިއްލަ ޒަމީރުގެ ހައްގުގައި ނުތެދުވީ މިޒްނާދެކެ އޭނާ ލޯބިވާތީއެވެ. އެ ބައްޕަގެ ނުރުހުން އިތުރަށް ހޯދަން ބޭނުން ނުވާތީއެވެ. ނުކުރާ ކުށެއްގެ އަނިޔާ އޭނާއަށް ލިބެމުން ދިޔަޔަސް ވަރިހަމަކޮށްފައެވެ. ނޭނގޭ ކަމެއްގެ ތުހުމަތު އޭނާގެ ބޮލުގައި އެޅުނަސް ހެޔޮކަމަށް ނިންމާފައެވެ. ނުދަންނަ ކަމެއްގެ އިލްޒާމުން އެހަށިގަނޑު ވަށާލިޔަސް ފަރުވާލެއް ނެތްކަމަށް ގަބޫލުކޮށްފައެވެ. އޭނާ ފުލުހުންގެ ބެލުމުގެ ދަށަށް ގެންދިޔައެވެ. ތަނުގެ މަސްލަހަތު ހިފެހެއްޓުމުގެ ބޭނުމުގައެވެ.

އެންމެންނަށްވެސް ގަބޫލުކުރެވުނީ އެއީ ސިހުރުގެ ކަމެއްކަމަށެވެ. އެކަން ޔަގީން ކޮށްދިނީ ރަށުގެ ގިނަ ބަޔަކު ދަންނަ ބޮޑުބެއްޔާއެވެ. ބޮޑުބެއްޔާ ބުނަމުންދިޔައީ އެއީ މީހުންތަކެއް "ދުއްވާލަން" ހަދާފައިވާ ސިހުރެއް ކަމަށެވެ. އަންހެނުންތަކެއް ނައްތާލުމަށް ހަދާފައިވާ ނުބައި ސިހުރެއް ކަމަށެވެ. އެ ހަތަރު އަންހެނުންނަށް ވަމުންދާ ގޮތް ފެނި އެ ކަމާ ބޮޑުބެއްޔާ ކަންބޮޑުވީ އެހެންވެއެވެ. އެ ކަމުގެ ސަބަބުން ދެންވާނެގޮތް މާގޯސްވާނެކަން އޭނާއަށް ގަބޫލުކުރެވޭތީއެވެ. ހިތާމަވެރި އެތައްކަމެއް ދިމާވެދާނެކަން އޭނާގެ އަލި ހިތް ބުނާތީއެވެ.

ފަތިސްވަގުތު ގާތްވަމުން ދިޔަވަރަކަށް އަންހެނުންތައް ދިޔައީ ހަމައަކަށް އެޅެމުންނެވެ. ބާލަމުން ދިޔަ ވަރުގަނޑު ދިޔައީ މަތަވަމުންނެވެ. އެ އަންހެނުންތައް ވަރުބަލިވީއެވެ. ރޭ ހަތަރުދަމު ކުރެވުނު ހަރަކާތްތަކުން ލޮޑުވީއެވެ. ގައިގެ ވަރު ހުސްވީއެވެ. ހެނދުނުވީއިރު، ހުރިހާ އަންހެނުންތައް ތިބީ ގަބުވެފައެވެ. ހިރިލާން ނޭނގިފައެވެ. އަނގައިން ބަހެއްވެސް ނުބުނެއެވެ. މީހަކު ފެނުނަސް އަޅާވެސް ނުލަނީއެވެ. ހަމަތިބެނީއެވެ. ސިއްހީ މަރުކަޒުން އެންމެންކަހަލަ ގޮތަކަށް ގެއަށް ބަދަލުކުރަން ނިންމީ މާ ބޮޑު އިތުރު މައްސަލަތަކެއް ފާހަގަ ނުކުރެވޭތީއެވެ. ނަމަވެސް ނަފުސާނީ ގޮތުން ބޮޑެތި ގެއްލުންތަކެއް ވެފައިވާ ކަމަށް ޑޮކްޓަރުން ދިޔައީ ބުނަމުންނެވެ.

ފަންޑިތަވެރިންގެ ބުނުންތައް ތަފާތެވެ. އެ މީހުންނަށް ގަބޫލުކުރެވުނީ އަދި ކަންތައް ފެށުނީ ކަމަށެވެ. މިހާރު މަޑުން ތިއްބަސް އެމީހުން ހަރަކާތްތެރިވާނެކަމަށެވެ. އެންމެން އެއްތާކު ބައިތިއްބައިގެން މަތަކުރަން އުނދަގޫ ވެދާނެކަމަށެވެ. އަންހެނުންތައް ގޭގެއަށް ފޮނުވާލި މައިގަނޑު ސަބަބު ގިނަ ބަޔަކަށް ނޭނގުނަސް ރަށުގެ ހަރުމީހުންނަށް އެ ކަންކަން އެނގެއެވެ.

ހަވީރު ވަގުތު ގާތްވަމުން ދިޔަ ވަރަކަށް ގަބުވެފައިވާ އަންހެނުންތައް ހަރަކާތްތެރިވާން ފެށިއެވެ. އަމިއްލައަށް ޒީނަތްތެރިވެ ތައްޔާރުވާން ފެށިއެވެ. އިހުނަށްވުރެ ގިނައިން ވާހަކަދައްކަން ފެށިއެވެ. އެކަން ވާނެކަން ކުރިންވެސް އެނގެއެވެ. އެކި ގޭތަކުގެ ފިރިހެނުންގެ ސަމާލުކަމަށް އެ ކަންވަނީ ގެނެސްފައެވެ. އިރުއޮއްސޭ ވަގުތަށް ތައްޔާރުވެ އެ ހަތަރު އަންހެނުން ތިބި ގޭގެއަށް، ބާރުގަދަ ތިން ހަތަރު ފިރިހެނުން ވަނީ ފޮނުވާފައެވެ. އެ މީހުން މަތަކުރުމަށް އަޅަންޖެހޭ ފިޔަވަޅުތައް ވަނީ އަޅާފައެވެ.

އަންހެނުންގެ ތެރެއިން އެންމެ ބޮޑަށް ތައްޔާރުވަމުން ދިޔައީ މިޒްނާއެވެ. އަތުގައި އޮތް އެންމެ ރީތި ހެދުންލައިގެން ނުކުންއިރު، އަތްފައި ވަނީ ގަނަހާއިން ފުރާފައެވެ. އިސްތަށިގަނޑުގައި ވެސް ޖަހާފައިވަނީ އިހުގެ ހުޅިއެވެ. ތިން ހަތަރު ޓިސްދަތި ބޮލަށް ޖަހާފައިވާއިރު މޫނުގެ އޮމާން ހަންގަނޑު ފޮރުވާފައި ވަނީ ހުދު ފުށުގެ ބޯ ފަށަލައަކުންނެވެ. މިޒްނާ ފެނުމުން އޭނާ ހުރީ ހަމައިގައި ނޫންކަން ކޮންމެ މީހަކަށް ވެސް ގަބޫލުކުރެވެއެވެ. އެ ހުރިހާ ތައްޔާރީއެއް އޭނާވީ ކޯއްޓޭ ސަރަހައްދަށް ދާށެވެ. އެ ތައްޔާރީތަކުގައި އުޅޭތާ ކިތަންމެ އިރެކެވެ. ނަމަވެސް އޭނާ ހުއްޓުވާފައި ވަނީ އެގޭގައި ތިބި ފިރިހެނުންތަކެވެ. އަދި ގަޑި ނުޖެހޭކަމަށް ބުނެއެވެ. އިރުއޮއްސެން ވާއިރަށް އެތަނަށް ގެންދާނެކަމަށް ބުނެއެވެ.

ފަސްގަޑި ސާޅިސް ފަހެއް ވުމާއެކު މިޒްނާ ގޮވައިގެން އެ ހާދިސާ ހިނގި، ކޯއްޓޭ ސަރަހައްދަށް ދިޔައެވެ. އޭރު ކިޔެވެލި ކިޔަވާނެ 30 މީހުން، ނުޒޭރު މަސައްކަތް ކުރާ ސައިޓްގައި ތިން ބަރިއަކަށް އެތުރިގެން ތިއްބެވެ. ހުދު ގަމީހުގައި ހުރި ބޮޑުބެއްޔާގެ އަމުރަށް އެމީހުންގެ ކިޔެވުން ފެށުމާއެކު މުޅި ސަރަހައްދުގެ ހިމޭންކަން ގެއްލުނެވެ. ގަސްތަކަށް ނިދަން އައި ކާޅުތައް މޮޔަވި ފަދައެވެ. ބޯމަތީ އުދެހެމުން ދިޔަ ވާތަކުގެ ކީން އަޑުން މުޅި ހިސާބުގަނޑު ގުގުމާލިއެވެ. ހާލާއި ކުކުޅުތަކަށް ހީވީ ބިރެއް ފެނިގެން އުޅުނުހެނެވެ. މުޅި ހިސާބަށް ނާމާންކަން ވެރިވީ ކީއްވެކަން ބޮޑުބެއްޔާ ދެނެގަތެވެ. އޭނާ ވެސް ބިސްމި ކިޔުމަށްފަހު އާޔަތްތައް ކިޔަވަން ފެއްޓިއެވެ. މިޒްނާ ތެޅިގަތީ ދެނެވެ. ފުންމަ ފުންމާފައި ހަޅޭލަވަން ފެއްޓިއެވެ. އޭނާ ކަރުގައި ނުހިފުމަށް ގޮވަން ފެއްޓިއެވެ. މަރުވެދާނެކަމަށް ބުނަމުން ދިޔައެވެ. މާގިނަ އިރުތަކެއް ނުވެ އޭނާ ވެއްޓުނީއެވެ.

މޫނަށް ބުރުއްސާލި ފެންފޮދަކާއެކު އޭނާގެ ދެލޯ ހުޅުވާލިއެވެ. އޭރު އޭނާގެ ވަށާ ތިބި މީހުން ކޮންމެ މީހެއްގެ ކުރިމަތީ ފެން ޖަގެއް ބަހައްޓައިގެން ކިޔަވަނީއެވެ. ބޮޑުބެއްޔާގެ ސުވާލުތައް ކުރަންފެށީ މިޒްނާގެ ފައިގެ ކުޑަވައި އިނގިލީގައި ހިފަހައްޓައިގެން ހުރެއެވެ. މިޒްނާގެ ދުލުން ޖަވާބުދެމުން ދާއިރު ބޮޑުބެއްޔާއަށް ވެސް ލިބެމުން ދިޔައީ ހައިރާން ކަމެވެ. އެދައްކާ ވާހަކަތައް ގަބޫލުކުރަން އުނދަގޫވިއެވެ. ދޮގު ނުހަދާ ތެދަށް ބުނުމަށް ހަރުކަށި އިބާރާތުން ވާހަކަދެއްކީ އެހެންވެއެވެ. އެހެން ނޫންނަމަ ދުވަހަކު ވެސް ސަލާމަތް ނުވާނެކަމަކަށް ހަރުކަށި ކަމާއެކު ނުބުނީހެވެ. ﷲ ގެ އަދުއްވާއޭ ބުނަމުން އަންދާލާނެ ކަމުގެ އިންޒާރެއް ނުދިނީހެވެ.

ސުވާލަކަށްފަހު ސުވާލަކަށް ޖަވާބުދެމުން ދާ އިރު މިޒްނާގެ ދޮން މޫނު ވަނީ ރަތްވެފައެވެ. ބިރުން ތުރުތުރު އަޅާހާލު އޭނާ ތެޅެނީއެވެ. ބޮޑުބެއްޔާ ދެން ސުވާލުކުރީ އެ ސިހުރު ވީތަނަކާ މެދުއެވެ. މިޒްނާގެ އަތް ހިއްލާލުމަށްފަހު އިނގިލި ދިއްކުރީ އޭނާގެ ވާތް ފަރާތަށެވެ. ދެ ވަނަ ފަހަރަށް ސުވާލުކުރުމުން ކަނާތް ފަރާތަށް އިނގިލި ދިއްކުރިއެވެ. އެތައް ބިރެއްދެކުމުން އޭނާގެ ވާތްފަރާތުން ދިހަވަރަކަށް ފޫޓް ދުރުގައި އޮތް ދިގު އަކަ ގަލަށް އޭނާގެ އިނގިލި ދިއްކޮށްލިއެވެ. އެއީ ނުޒޭރު ރޭވި ގަލެވެ. މިޒްނާ ފުރިހަމަ ކުރި ގަލެވެ. ބޮޑުބެއްޔާގެ ލޯ އެ ގަލަށް ހިންގާލުމަށް ފަހު އަނެއްކާވެސް ހަރުކަށި ޢިބާރާތުން އެ ސުވާލުތައް ތަކުރާރު ކުރީއެވެ. މިޒްނާ ދެން ވެސް ދިނީ އެ ޖަވާބެވެ. ބުނަމުން ދިޔައީ އެއީ ތެދުކަމަށެވެ. އެ ގަލުގެ އަނެއް ފަރާތް ބެލުމަށް އޭނާ ބުނީ ދެން އިތުރު ގޮތެއް ނެތްކަން ޔަގީންވުމުންނެވެ. ބޮޑުބެއްޔާ ރެއަކާލީ ދެނެވެ. ހަދާފައިވާ ސިހުރު ރާވާފައި އެ ވަނީ އެ ގަލުގެ އަނެއް ފުށުގައިކަން އޭނާ ދެނެގަތެވެ. އެ ގަލުން ބައެއް ނެގުމަށް ބުނުމުން މިޒްނާއަށް ވީގޮތް ބެލުމަށްފަހު އެއީ ތެދުކަން ބޮޑުބެއްޔާ ޔަގީންވެސް ކުރީއެވެ. ދެން ސުވާލުކުރީ އެ ކަން ކުރި މީހާއާ މެދުއެވެ. އެ ސުވާލުގެ ޖަވާބުން ބޮޑުބެއްޔާއަށް ލިބުނީ ސިހުމެވެ. އެއީ މާކުރީގެ ކަމެއްކަމަށް އޭނާ ބުނާތީއެވެ. އެކަން ކުރި މީހުން މިހާރު ދުނިޔޭގައި ނެތްކަމަށް ބުނަމުން ދިޔައީތީއެވެ. ބޮޑުބެއްޔާގެ ސުވާލުތަކުން އެތައް ކަމެއް ހޯދުމަށްފަހު ކިޔަވަމުންދިޔަ މީހުންގެ ކިޔެވުން އިތުރަށް ބާރުކުރުމަށް ބުންޏެވެ. ދެންކިޔަވާ އާޔަތަށް ފަހު ފެންޖަގަށް ފުމެލުމަށް ބޮޑުބެއްޔާ އެދުނެވެ. އެއާއެކު މިޒްނާއަށް ތެޅިގަނެވުނެވެ. ދަމާލެވުނު ނޭވާއާއެކު މުޅި މީހާ ހިނދުނެވެ. އެ ނޭވާ ދޫކޮށްލީ އިރުތަކެއް ފަހުންނެވެ. އެއާއެކު އެރި ވަރުގަނޑު ކަނޑުވާލީ ބޮޑުބެއްޔާ ކިޔެވި ފެންޖަގުން އަތް ގޮތްޓަށް އެޅި ފެންފޮދު މިޒްނާގެ މޫނަށް ބުރުވާލުމުންނެވެ.

ބޮޑުބެއްޔާގެ އަމުރަށް، ކިޔަވަމުންދިޔަ މީހުންގެ ކުރިމަތީ ހުރި ފެންޖަގުތައް ގެންގޮސް ދިގު އަކަ ގަލަށް އޮއްސާލިއެވެ. އެހިނދު އެ ގަލުން އަލިކަނޑައިގެން ދިޔައެވެ. ގަދަ ވިދުވަރެއް ލެވިފައިވާ ވައް ބޯޅައެއް ކަހަލަ އަލިގުޅައެއް އެގަލުން ނިކުތެވެ. ހީވީ ބާރު ގުގުރިއެއް ޖެހުމަށް ގަދަ ވިދުވަރެއް ވިދާލިހެންނެވެ. އެ ވިދުވަރާއެކު ކުރިމަތީ އޮތް ގާގަނޑުން ނުކުން އަލިގުޅަ ގަސްތަކުގެ މަތިން ގޮސް އޮބާލީ ފަޅުތެރޭގައި އޮތް ކަށްބޯހެރައަށެވެ. ހަމަޖެހުމުގެ ފުންނޭވާއެއް ބޮޑުބެއްޔާއަށް ލެވުނީ ދެނެވެ. މިޒްނާއާ އިތުރު ސުވާލުކޮށް އޭނާއާ އަވަލާފައިވާ ޖިންނީގެ ކިބައިން މިޒްނާ ސަލާމަތްކުރި އިރު އޭނާ އޮތީ ހޭނެތިފައެވެ. އަނެއް ތިން އަންހެނުންވެސް އެ ނުރައްކާތެރިކަމުން މިންޖުކުރެވުނީ އެ ހާލުގައެވެ.

މިޒްނާ ހަމައަކަށް އެޅުނީ ހަތަރުވަރަކަށް ދުވަސް ފަހުންނެވެ. މީގެ ހައެއްކަ ދުވަސްކުރިން ކަންތައްތައް ވީގޮތުގެ ހަނދާނެއް އޭނާ ނުހުރެއެވެ. ނަމަވެސް ހަށިގަނޑުގެ އެކިތަންތަނުން ނަގާ ދިލައާއި ވާ ތަދުން ކަންތައްތަކެއް ކުރެވުނު ކަމުގެ އިހުސާސް އޭނާއަށް ކުރެވެއެވެ. އޭނާއަށް މެދުވެރިވީ ކަންތައްތަކުގެ ވާހަކަ މުޅިރަށުގައި ދައްކައެވެ. ނޫސްތަކާއި ފޯނުތަކުގައި އެކަން ރޭކޯޑްކުރެވިފައި ވެއެވެ. މިޒްނާ ޖެހިލުން ވަނީ ބައްޕަގެ ވާހަކަތަކުންނެވެ. ނުޒޭރުގެ ވާހަކަ އެހުމުން ބައްޕަ އަންނަ ރުޅިންނެވެ. އިތުރަށް އެފަދަ ކަމެއް ތަޖުރިބާ ކުރަން ބޭނުންވަނީތޯ ބައްޕަ ސުވާލު ކުރާތީއެވެ. އެ ހިތާމާގައި އަނދަން ބޭނުންވަނީތޯ ބައްޕަ އަހާތީއެވެ.

އެ ބައްޕައަށް ގަބޫލުކުރެވެނީ އެކަން ނުޒޭރު ނުކުރިނަމަވެސް އެ ކަންމެދުވެރިވީ ނުޒޭރުގެ ސަބަބުންކަމެވެ. އެކަމަށް މަގުފަހިވީ ނުޒޭރާ ހެދިކަމެވެ. އެފަދަ މީހަކާ ގުޅުމަށްވުރެ ނުގުޅުން މޮޅު އިތުރުވާނެކަމެވެ. އެކަމަކު އެއީ މިޒްނާ އެންމެ ލޯބިވާ ފަރާތެވެ. ދިރިއުޅުމުގެ އުންމީދުތަކާ އެންމެ ބޮޑަށް ގުޅިފައިވާ ފަރާތެވެ. ދުވަހަކު ވެސް ވަކިނުވުމަށް ހުވާކޮށްގެންހުރި ފަރާތެވެ. އެ ލޯތްބާ ދުރަށް ދާންވީ ހެއްޔެވެ؟ އެ އަހުދުތައް އުވާލާންވީ ހެއްޔެވެ؟ ނުޒޭރުގެ ކުށަކީ ކޮބައި ހެއްޔެވެ؟ ނުޒޭރުގެ ކާފަ ކުރި ކުށެއްގެ އަދަބު އޭނާއަށް ލިބެން ޖެހޭ ހެއްޔެވެ؟ އޭރުން ނުޒޭރު ކިހައި ދެރަވާނެ ހެއްޔެވެ؟ ހިތަށް ވެރިވަމުންދިޔަ ސުވާލުތަކަށް ޖަވާބުދޭން ކެރޭވަރަށް ވުރެ މިޒްނާގެ ހިތް ބައްޔެވެ. ބައްޕަގެ އެ ވާހަތަކާ ދެކޮޅަށް ތެދުވާނެހާ ހިތްވަރެއް ވެސް ނެތެވެ.

އެތައް ވިސްނުމަކަށްފަހު އަމިއްލަ ހިތް ކަތިލަމުން މިޒްނާ މެސެޖުކުރީ ނުޒޭރަށެވެ. ވަކިވުމަށް ބޭނުން ކަމަށް ބުނެއެވެ. އެއަށް ފަހު ފޮނުވީ ފޮޓޯއެކެވެ. މީގެ ހަ ދުވަސްކުރިން މިޒްނާގެ ފޯނުން ނެގި ގާގަނޑުގެ ފޮޓޯއެވެ. ނަސޭހަތްދީފައި ވަނީ ދެންވެސް އެކަހަލަ ކަމެއްގެ ތެރެއަށް ނުވަނުމަށެވެ. އެދިފައި ވަނީ އެހެން ގޮތެއް ހޯދުމަށެވެ. އޭނާއަށް އިންތިޒާރު ނުކުރުމަށެވެ.

މިޒްނާގެ މެސެޖް ފެނުމުން ނުޒޭރުގެ ހިތް ބާރުބާރަށް ތެޅެންފެށިއެވެ. ބަހާރު މޫސުމުގެ އުފާވެރިކަމާއެކު ހެދުމުން ދިޔަ ލޯބީގެ ގުލްޝަނަށް ޚަރީފު ހިޔަނި އެޅުނުކަން އޭނާއަށް ޔަގީންވިއެވެ. އެއީ ވެދާނެ ގޮތެއްކަން އޭނާ ގަބޫލުކުރިއެވެ. މިޒްނާގެ ބައްޕަ އެހާ ނުގަބޫލުއިރު އަދި ކަންތައް ދިމާވިގޮތުން މި ދުވަސް އަތުވެދާނެކަމަށް އޭނާ ހީކުރިއެވެ. އެކަން ވީ ވެސް އެހެނެވެ. ނުޒޭރަށް ލިބުނީ މާޔޫސްކަމެވެ. ހަ މަސްދުވަސް ބޭކާރުވީއެވެ.

ނުޒޭރަށް ލިބުނީ ހިތާމައެވެ. ދުވަހަކު ބޮލުގައި އެޅެން ބޭނުންނުވި އިލްޒާމެއް ވަގުތު ކޮޅަކަށް ނަމަވެސް އެ ބޮލުގައި އެޅިގެންނެވެ. އެކަމުގެ ސަބަބުން އޭނާ އެންމެ ލޯބިވާ މިޒްނާ އޭނާއާ ވަކިވީއެވެ. އޭނާގެ ކުށަކީ ކޮބައި ހެއްޔެވެ؟ ކިޔެވި ތަކެތީގެ ބޭނުން ކުރަން އުޅުން ހެއްޔެވެ؟ އާ ހޯދުންތަކެއް ހޯދަން އުޅުން ހެއްޔެވެ؟

ނުޒޭރަށް ރޮވޭގޮތްވިއެވެ. އަމިއްލަ ނަފުސަށް މަލާމާތްކުރަން ފެށިއެވެ. އެނާގެ ކެރިޔަރާމެދު ސުވާލު އުފައްދަން ފެށިއެވެ. އެ ޚިޔާލުގައި އެތައް އިރަކު އޭނާ އޮތީ ހަޔާތުގެ ޞަފުހާތައް އުކާލައުކާލައެވެ. ނަމަވެސް އެއީ މާޒީއެވެ. ކުރެވޭނެ ކަމެއް ނެތެވެ. އެ ހަނދާންތަކުން މިއަދު ގެނެސްދޭނީ ކަރުނައިގެ ވާރެއެވެ.

ނުޒޭރު ކެތްތެރިވިއެވެ. މީހުންގެ ފުރައްސާރައާ ކުރިމަތިލިއެވެ. އޭނާގެ މަސައްކަތައިގެން ކުރިއަށް ދާން ނިންމިއެވެ. އެންމެ ފުރަތަމަ ވެސް އޭނާ ބޭނުންވީ ދިމާވި ހާދިސާ ދިރާސާ ކުރާށެވެ. އެ ގަލުގެ ހަގީގަތް އޮޅުންފިލުވާށެވެ. ބޮޑުބެއްޔާއާ ބައްދަލުކުރީ އެހެންވެއެވެ. އޭނާގެ ފަރާތުން މަޢުލޫމާތު ހޯދީ އެ ނިޔަތުގައެވެ. ދެ މީހުންގެ ގުޅުން ވަކިވުމަށް މިޒްނާ ދެއްކި "ބަހަނާ"ގެ ފޮޓޯވީ ނުޒޭރުގެ ދިރާސާއަށް ލިބުނު ހިތްވަރަކެވެ. އެގަލުގައިކަނޑާ ނަގާފައިވާ ބްރަހަމީ އަކުރުގެ ލިޔުންތައް އޭނާ ދިރާސާކުރަން ލިބުނު ހެއްކަކަށެވެ. އެއިން ކޮންމެ އަކުރެއް ވަކިވަކިން ދެނެގަނެ އެއިން ދޭހަވާ މާނަތައް ނެޓްގެ އެހީގައި ހޯދުމަށް ނުޒޭރު ތައްޔާރުވިއެވެ.

ފުރަތަމަ ފައްޓާފައިވާ ޖުމުލަ ދެނެގަތުމުގެ މަސައްކަތް ނުޒޭރު ފެށިއެވެ. " މަމަ މި ދްވީތައި މަހިލައިން މަރަންނަން މި ޕަންޑިތަ ކަރްޔުމް" ގެ މާނަ ދެނެގަނެވުނީ ވަރަށް މަސައްކަތުންނެވެ. އެ މާނަ ބޮލަށް ވަނުމާއެކު އޭނާގެ ގައިން ހީބިހި ނެގިއެވެ. އަމިއްލަ ޒަމީރު ތެޅިގަތެވެ. ފުންނޭވާއެއް ބޭރަށް ދޫކޮށްލެވުނެވެ. "އަހަރެން، މިރަށުގެ އަންހެނުން މަރަން ފަންޑިތަ ހެދީމޭ" ބުނެ ފަށާފައިވާތީއެވެ. އެ ޖުމުލައިން ނުޒޭރުގެ މުޅިޝައުގު އެކަމަށް ދަމައިގަތެވެ. އެ މަސައްކަތް ނުނިންމާ އެތަނުން ނުތެދުވަން އޭނާ ހިތް ބޭނުންވިއެވެ. އެކަމުގައި އެތައް ވަގުތެއް އޭނާ ހޭދަކުރިއެވެ. ހަވީރު މަސައްކަތް ފެށި މީހާއަށް އެކަން ކޮށް ނިންމާލެވުނީ އަނެއް ދުވަހުގެ ފަތިހު ފަހެއްޖަހަން އުޅެނިކޮށެވެ. އޭނާއަށް ހަމަޖެހުމުގެ ނޭވާއެއް ލެވުނެވެ. މުޅި ލިޔުންގަނޑު ރަނގަޅަށް ދޭހަކޮށްލެވުމުންނެވެ.

ނުޒޭރަކަށް މަޑެއް ނުކުރެވުނެވެ. ހަމަ އެވަގުތު ގެއިން ނުކުމެގެން ހިނގައިގަތީ ބޮޑުބެއްޔާ ގެއާ ދިމާއަށެވެ. ތަރުޖަމާކުރި ކަރުދާސްތަކާ ދިރާސާކުރަން ގެންގުޅުނު ފޮޓޯގެ ކޮޕީއެއްވެސް ހިފައިގެންނެވެ. ނުވިތާކަށް ލެޕްޓޮޕްވެސް ހިފައިގެންނެވެ. އެލިޔުންތައް ދެއްކުމަށްފަހު ބޮޑުބެއްޔާއަށް އޭގައި ލިޔެފައިވާ ވާހަކަތައް ނުޒޭރު ކިޔައިދެން ފެށިއެވެ. ބޮޑުބެއްޔާއަށްވެސް ލިބުނީ ހައިރާންކަމެވެ. ކަށްބޯހެރައަށް ހަދާފައިވާކަހަލަ ސިހުރެއް އެރަށުގައި ހަދަން އޭނާއަށް ޖެހުނުކަމަށް އެގަލުގައި ބުނެފައިވާތީއެވެ. އޭނާއަކީ އަންހެނެއް ނަމަވެސް އެފަދަ ސިހުރެއް ހަދަން އޭނާއަށް މަޖުބޫރުވީ އޭނާގެ ފިރިމީހާ އެ ރަށުގައި ތިބި އެހެން އަންހެނުންނާ ހެދި މޮޔަވާތީ ކަމަށް ވެސް އެގަލުގައި ބުނެފައި ވެއެވެ. ދެން އިތުރަށް ލިޔެފައިވަނީ އޭނާ ދޫކޮށްލުމަށް ފަހު އޭނާގެ ފިރިމީހާ އެހެން އަންހެނުންނަށް ލަނޑުދޭތަން ދެކެން ބޭނުން ނުވާކަމަށެވެ. އެ ފިރިހެން މީހާގެ ޝިކާރައަކަށް އަންހެނުން ވުމަށް ވުރެ އެ މީހުން މޮޔަވުން ވެސް މާ ރަނގަޅުކަމަށެވެ. އެހެންވެ އެ ކަންކުރީ ކަމަށާއި އެ ވާހަކަތައް ލިޔެފައި ވަނީ ފަހުތިބީންނަށް އެކަން އަންގައި ދިނުމަށްކަމަށްވެސް އެ ގަލުގައި ވެއެވެ. އެ ވާހަކަތަކާއެކު ޝޯޚުވެފައިވާ ބޮޑުބެއްޔާއަށް ބޯހޫރާލެވުނެވެ. ކަށްބޯހެރައާމެދު ދެކެވޭ ވާހަކަތަކުގެ ހަގީގަތް އެނގުނީތީއެވެ. ކަށްބޯހެރައިން ފެންނަ މިނިކަށިތަކަކީ މީހަކު ހެދި ސިހުރެއްކަން އޭނާއަށް ޔަގީން ކުރެވުނީތީއެވެ. އެސިހުރާ ކައްބޯހެރެއާ ގުޅުންތަކެއް ވާކަން އޭނާއަށް ގަބޫލުކުރެވުނީތީއެވެ. އެއަށްވުރެ ބޮޑަށް އޭނާއަށް ތަޢުރީފުކުރެވުނީ ނުޒޭރަށެވެ. އޭނާގެ އެ ހޯދުމަށެވެ. ހިތްވަރާއެކު ކުރި އެ މަސައްކަތަށެވެ. ނުޒޭރު ބޭނުންވީ އޭނާގެ ކުށެއްނެތްކަން މިޒްނާގެ ބައްޕައަށް ވިސްނައިދިނުމަށެވެ.  ބޮޑުބެއްޔާ މެދުވެރިކޮށް އެކަން ކުރުވުމަށެވެ.

ޖެހިގެން އައި ދުވަހުގެ މުޅި ރަށުގައި ދައްކަމުން ދިޔައީ ނުޒޭރުގެ އާ ހޯދުމުގެ ވާހަކައެވެ. ވައިބަރ އައި ސޯޝަލްމީޑިއާގައި އެނބުރެމުން ދިޔައީ ނުޒޭރު ދިރާސާކުރި ފޮޓޯއެވެ. ހަވީރު ނޫހުގެ ފަލަ ސުރުޚީގައިވަނީ "ދިވެހި އާކިއޮލޮޖިސްޓެއްގެ އާ ހޯދުމު"ގެ ވާހަކައެވެ.އެ ވާހަކަތަކުން ނުޒޭރު އުފަލެއް ނުވެއެވެ. އެ ތަޢުރީފުތަކުން އޭނާގެ ހިތެއް ނުފުރެއެވެ. ނުޒޭރުގެ ހިތް އޭނާއަށް ހަނދާން ކޮށްދެމުން ދިޔައީ މިޒްނާގެ ބައްޕަ ދެއްކި ވާހަކަތަކެވެ. އުނދަގޫ ކުރަމުން ދިޔައީ އެ ބައްޕަގެ ވިހަގަދަ ބުނުންތަކެވެ. އޭނާއާ ވަކިވި ދުވަހު މިޒްނާގެ މެސެޖުގައި ލިޔެފައިވާ ޖުމުލައެވެ. އެ ހަނދާންތަކަށް ގެއްލިފައި އިން ނުޒޭރަށް ހޭވެރިކަންވީ ފޯނު ވައިބްރޭޓްވުމުންނެވެ. ޖީބުގައި އޮތް ފޯނު ނަގައި ބަލައިލުމުން ތުންފަތްމައްޗަށް ގެނެވުނީ ހިނިތުންވުމެކެވެ. ހިތަށް ލިބުނީ ނުލިބޭނެކަމަށް ހީކޮށްގެންހުރި އުފަލެކެވެ.

މެސެޖް ފޮނުވީ މިޒްނާއެވެ. ބުނެފައިވަނީ ހަގީގަތް ގަބޫލު ކުރެވިއްޖެ ކަމަށެވެ. އެ ކަން ބައްޕައަށްވެސް ވިސްނައިދެވިއްޖެ ކަމަށެވެ. އަލުން ގުޅެން ބޭނުންވާކަމަށެވެ. އެ މެސެޖާއެކު ނުޒޭރަށް ދެފަހަރަކު ބޯޖަހާލެވުނެވެ. އަމިއްލަ މޭގައި އަތް އަޅާލެވުނެވެ. ހެއްދެވި ފަރާތަށް ޝުކުރު ކޮށްލެވުނެވެ.

މިއީ ދުނިޔެއެވެ. ހީނުކުރާ އެތައް ކަމެއް މިދުނިޔޭގައި ހިނގައެވެ. އެއިން ކޮންމެ ކަމެއްވެސް ގުޅިފައިވަނީ ކޮންމެވެސް ފަރާތަކާއެވެ. ކޮންމެވެސް ސަބަބަކާއެވެ. އެކަމުން އެކި މީހުންނަށް ލިބެނީ އެކި ކަހަލަ އިހުސާސެވެ. އެ އިހުސާސްތަކުން އެއްބަޔަކު ކަރުނައަޅައި ރޮނީއެވެ. އަނެއް ބަޔަކު އުފަލުން ފޮޅެނީއެވެ. އަނެއް ބަޔަކު އެ އިހުސާސްތައް ސިއްރު ކުރަނީއެވެ. ނުޒޭރުވެސް ސިއްރުކުރީއެވެ. ދިމާވި ހާދިސާއާ ކުރިމަތިލީއެވެ. ހަގީގަތް ހޯދުމަށް މަސައްކަތްކުރީއެވެ. އޭނާގެ ބޮލުގައި އެޅުނު އިލްޒާމުން ސަލާމަތްވީއެވެ. މިއަދު އޭނާއަށް ހިތްހަމަޖެހުން ލިބެމުން އެ ދަނީ އޭނާ އެންމެ ދެރަވި މެސެޖްފޮނުވި އޭނާގެ ލޯބިވެރިޔާ ފޮނުވި އިތުރު މެސެޖަކުންނެވެ. މިޒްނާގެ މެސެޖަށް ނުޒޭރު ފޮނުވީ 'ސުވާލު' މެސެޖެކެވެ.

"އޭނާ އެ ހެން އަންހެނަކާ ރައްޓެހިވެގެން އުޅޭނަމަ ހަދާނީ ކިހިނެއްހެއްޔެވެ؟" އެ މެސެޖު ފޮނުވިތާ ވީ ތިރީހަކަށް ސިކުންތެވެ.

" ރަށުގެ ހުރިހާ އަންހެނުންނަށް ސިހުރު ހަދާނީއޭ ބުނެ "ސްމައިލީއެއް" މިޒްނާ ފޮނޮވާލިއެވެ. އެ މެސެޖާއެކު ދެ މީހުންގެ ގުޅުމުގެ އާ ބާބެއް ފެށިގެން ދިޔައީއެވެ.