''ހާދަ ފާޑުފާޑުގެ އަޑުއަޑު އެބަ އިވެޔޭ. ހަނދާންކުރާތި ....... ބައްޕަގެ ގަދަރާއި އާއިލާގެ ދަރަޖަ ވެއްޔާ މޮޑެނުލާތި. ތިއީ ނުވިސްނޭވަރުގެ ކުއްޖެއް ނޫން.'' ނުރުހުމުގެ ރާގުގައި ބައްޕަ ދެއްކި ވާހަކަތައް އަމާޒުވީ، ކޮން ކަމަކަށްކަން ރެހެންދިހާރަށް އެނގުނެވެ. ބައްޕަގެ ބަސްތަކާއި ލަފުޒުތަކުގެ ހަރުކަށިކަން އޭނާއަށް ވިސްނުނެވެ.
ރެހެންދިހާރަކީ މަހާސަރަށް ލިބިފައިވާ 'އައިޑެންޓިކަލް' ނިބޫގެ ތެރެއިން އެކެކެވެ. އޭނާގެ ކޮއްކޮއަކީ ކަމަންހާރެވެ. ދެ ކުދިންގެ އުމުރުގައިވަނީ ދެތިން މިނެޓްގެ ތަފާތެވެ. ބަލައިބެލުމަށް ދެ ކުދިން ވަތްކެއް ނުކުރެވެއެވެ. ނުދަންނަ ބަޔަކަށް އެ ދެ ކުދިން ވާނީ އެކަކަށެވެ. އެހާވެސް ދެ ކުދިން ވައްތަރެވެ. ދެ ކުދިންގެ އުޅުން އެއްގޮތެވެ. ގިނަ ފަހަރަށް މަހާސަރަށް ދެ ކުދިން ވަކިވަނީ ރެހެންދިހާރު ކަރުގައި އަޅާފައި އޮންނަ ލޯ ފަށުންނެވެ.
ކުދިންގެ އުމުރުން 7 އަހަރުގައި، ކުދިންގެ މަންމަ ވަނީ މި ދުނިޔެ ދޫކޮށްފައެވެ. އެ ދުވަހަށްފަހު، ކުދިންގެ ހުރިހާ ކަމެއް ބަލަހައްޓަމުން ދިޔައީ މަހާސަރެވެ. އަންހެނުން ނެތުމުން ލިބެމުން ދިޔަ މޮޅިވެރިކަމާއި ހިތްދަތިކަން ގުރުބާންކުރީ ދަރިންނަށްޓަކައެވެ. އާއިލާގެ ގަދަރާއި ދަރަޖަ ދެމެހެއްޓީ ދަރިންގެ މާދަމާއަށްޓަކައެވެ. ލިބިފައިވާ ބާރާއި ހަކަތަ ހުސްކުރަމުން ދިޔައީ ދެ ކުދިންގެ މުސްތަގުބަލަށެވެ. ދަރިންވެސް އެކަން ދަނެއެވެ. ބައްޕަ ކިތަންމެ ހަރުކަށިވިޔަސް އެ ކުދިން ދެކެ އެންމެ ލޯބިވަނީ ބައްޕަކަން އެކުދިންނަށް އެނގެއެވެ.
ކުދިން ފުރާވަރަށް އެރުމުން މަހާސަރުގެ ހިތަށް އުނދަގޫވަމުން ދިޔައެވެ. ނޭނގޭ ތަދެއް އިހުސާސް ވަމުންދިޔައެވެ. އެ ތަދު ގުޅިފައިވަނީ ދެ ކުދިންނަށް ލިބިފައިވާ ރީތިކަމާއެވެ. އެ ރީތިކަމުން މަޖުބޫރުވީ ބޭރުތެރޭ ކުޅެއުޅުމަށް ކުދިންނަށް ދީފައި އޮތް މިނިވަންކަން ހުއްޓުވާށެވެ. ވޭރުތަކަށް ގޮސް އެ ކުދިން ފެންވެރައި އުޅުނު އުޅުން މަނާކުރާށެވެ. ކާންބޯން ކުރަމުން އައި ބައެއް މަސައްކަތް ހުއްޓާލައި ހަމައެކަނި ދަރިންނަށްޓަކައި ވަގުތު ދޭށެވެ. އެ ދަރިންގެ ކަންތައްތަކާމެދު ވިސްނާށެވެ. އެ ނިޔަތުގައި ދެ ދަރިންނާ ވާހަކަދައްކަން މަހާސަރު ނިންމިއެވެ.
''ދެކުދިންވެސް ތި ތިބީ މިހާރު މީހުންނާ އިންނަވަރުވެފައި. އަވަހަށް އެ ކަންކުރަންވީ.. އެހެން ނޫނީ މާ ދެރަ ގޮތްތަކެއް ދިމާވެދާނެ. މި ވާހަކަ ދައްކަން މި ޖެހުނީވެސް އެ ބިރުވެރިކަން ބައްޕަގެ ހިތަށް ވަންނާތީ. އެ ކަމުން ބައްޕައަށް އުނދަގޫވާތީ.'' ކުރިމަތީ ތިބި ދެ ކުދިންގެ މޫނަށް ވަކިވަކިން ބަލަމުން މަހާސަރު ވާހަކަދެއްކިއެވެ. އެ ވާހަކަތަކުން ރެހެންދިހާރަށް ލިބެމުން ދިޔައީ ނުތަނަވަސްކަމެވެ. ނުތަނަވަސް ކަމާއި މާޔޫސްކަމެވެ. އެންމެ ފަހުން ބިރުން ހުރެ ފުރުޞަތުގެ ބޭނުންކުރަން ރެހެންދިހާރަށް މަޖުބޫރުވިއެވެ.
" އަހަރެންނަށް ސަގުރަސު އާއިލާގެ މަލުސިރު ރައްޓެހިވާން ހުށަހެޅި. އެއީ އަހަރެން ވަރަށް ގަޔާވާ މީހެއް." އިސްދަށަށް ޖަހައިގެން ހުރެ ބައްޕަގެ ކުރިމަތީ ރެހެންދިހާރު އޭނާގެ ހިތްވަރު ނެރުނެވެ.
" ތިކަން ބައްޕައަށް އެނގޭ. ތިކަމާ ބައްޕަ ހިތްހަމަ ނުޖެހޭތީ މި ވާހަކަ މިދައްކަނީ.. އެއީ ދެން ކޮން ބައެއް؟ އަހަރެމެންނާ އަޅާބަލާފައި އެއީ ކޮންކަހަލަ އާއިލާއެއް؟ ތިބުނި މަލުސިރަކީ އަތުން ފައިން ކަމެއް ކުރާ މީހެއްނޫން. ދެން ކިހިނެއް ދަރިފުޅު ގެންގުޅޭނީ... '' ދެފަރާތަށް ބޯ ހޫރާލަމުން މަހާސަރު ވާހަކަދައްކަމުން ދިޔައީ ނުރުހުމުގެ ރާގުގައެވެ. އެ ވާހަކަތަކަށް އިތުރު އެއްޗެއް ބުނާކަށް ރެހެންދިހާރަކަށް ނުކެރުނެވެ.
'' ކޮންމެ ކޮންމެ މީހަކާ އިންނާކަށް މަށަކަށް ގަބޫލެއް ނުވެވޭނެ. ދަރިފުޅުމެންނަށް އެކަން ނުވަންޏާ އިންނާނެ ރަނގަޅު މީހަކު ބައްޕަ ހޯދައިދީފާނަން.'' މަހާސަރުގެ އެ ޖުމުލައާއެކު އަތުން ކުރި އިޝާރާތުން، ދެކުދިން ހިނގައިގަތީ އެތެރެގެއާ ދިމާއަށެވެ.
ބައްޕަ ބުނި ޖުމުލައިގެ އަސަރު ރެހެންދިހާރުގެ ހިތުގެ ވިންދާ ކުޅެލިއެވެ. އެ ޖުމުލައާ މެދު ވިސްނަން ފެށިއެވެ. އެކަމުގެ ސަބަބުން ރެހެންދިހާރުގެ ލޯ އެތައް ދުވަސްތަކެއްގެ ކުރިއަށް އޮބާލިއެވެ. މަލުސިރާއެކު ހޭދަކުރި އުފާވެރި ވަގުތުތައް އޭގެ ބާރު ދުވެލީގައި އައިސް ހިތަށް ޖަމާވިއެވެ. އުމުރުން 13 އަހަރުގައި ގޭ ދޮރުމަތީ ހުއްޓާ އޭނާ ކުރި މައްޗަށް މަލުސިރު ވައްޓާލި ގާކޮޅު ނެގި ދުވަސް މަތިންނެވެ. އޭގެ ފަހުން ދެ މީހުންގެ ގުޅުން ބަދަހިވެ، ބަދަލުކުރެވުނު މެސެޖުތަކުގެ މަތިންނެވެ. ބައްޕައާ ސިއްރުން ރަށުގެ ބޮޑުވޭރު ދޮށުގައި ބައްދަލުކޮށް ދެއްކި ވާހަކަތަކުގެ މަތިންނެވެ. މިކަން ކޮށްދިނުމަށް ކޮއްކޮވީ ގުރުބާނީގެ މަތިންނެވެ.
''މަށަށް ހީވަނީ އަހަރެން މަލުސިރާ ބައްދަލުކުރާކަން ބައްޕައަށް އެނގުނީހެން.'' ނުތަނަވަސްކަމާއެކު ވާހަކަ ފެށީ ރެހެންދިހާރެވެ. ދޭނެ ޖަވާބެއް ނޭނގިފައި ކަމަންހާރަށް އިނދެވުނީއެވެ.
''އަޅެ ކީއްވެތަ ބައްޕަ އެ ރުޅި އަންނަނީ؟ ފަގީރުވުމަކީ މައްސަލައެއްތަ؟ އެ އާއިލާގެ ނިކަމެތިކަމުން ބައްޕައަށް ލިބޭނެ އުނިކަމަކީ ކޮބާ؟ އެހެން ނޫނަސް އެ ފަގީރުކަމުން އަސަރުކުރަންޏާ ކުރާނީ އަހަރެންނަކަށްނު. އެކަމުން ބައްޕައަށް ކުރާނީ ކޮން ގެއްލުމެއް؟'' ރެހެންދިހާރަށް ކުރެވުނީ ސުވާލުތަކެކެވެ.
''މަށަށް ހީވަނީ ބައްޕަ ބޭނުންވަނީ ދައްތަ އެހެން މީހަކާ ކައިވެނި ކުރުވަން ހެން. ބައްޕަގެ ވާހަކަތަކުން އަހަރެންނަށް ވިސްނުނީ އެކަންތައް.'' ކަމަންހާރުގެ ޚިޔާލު އޭނާ ފާޅުކުރިއެވެ.
''މަށެއް ނުއިންނާނަން. ބައްޕަދެކެ ކިތަންމެ ބިރުގަތަސް އެކަމެއް ނުކުރާނަން. އަހަރެން ލޯބިވަނީ މަލުސިރު ދެކެ. އޭނާއާ ދެން ވަތްކެއް ނުވެވޭނެ.'' ބުނެވުނު ތިން ޖުމުލައަށް ފަހު ރެހެންދިހާރަށް ލެވުނީ ފުން ނޭވާއެކެވެ.
''އަހަންނަށް ފެންނަނީ އަވަހަށް ކައިވެނި ކުރަން. އެކަމުގައި ކުރިއަށް ދާން. އެހެން ނޫނީ މާ ލަސްވެދާނެ" ކަމަންހާރަށް ފެންނަގޮތް އޭނާ ހާމަކުރިއެވެ.
''އެކަމަކު އެކަމަށް ބައްޕަ ހުރަސް އަޅާނެއްނު.'' ރެހެންދިހާރު ވިސްނީ ވެދާނެ ގޮތަކާމެދުއެވެ.
''އެކަމާ އުޅުނީމަތާ އެނގޭނީ. ތިހެން ހުއްޓާ އެހެން މީހަކާ ކައިވެނިކުރުވަން އުޅެފިނަމަ...'' ކަމަންހާރު ބޭނުންވީ ދައްތައަށް ވިސްނައިދޭށެވެ. ދައްތައަށް ވެދާނެ ގޮތެއް ހާމަކޮށްދޭށެވެ.
''ނޫން. އެކަމެއް ނުވާނެ. އަހަރެން ދިރިހުއްޓާ އެކަމެއް ނުވާނެ. އަހަރެންނަށް އެހެންމީހަކާ އެކުއެއް ނޫޅެވޭނެ.'' އަޑަށް ބާރުލަމުން ރެހެންދިހާރު ވާހަކަދައްކަމުން ދިޔައެވެ. ދެ މީހުންގެ ވާހަކަތަކުން ނިންމުނީ ހަދާނެ ގޮތެކެވެ. އެކަމާ ކުރިއަށް ދާނެ ގޮތެކެވެ.
ހަފުތާއެއް ފަހެވެ. މަލުސިރާއި ރެހެންދިހާރު ތިބީ ރަށުގެ ބޮޑުވޭރުގެ ބިއްދޮށުގައެވެ. އެއީ އާއްމުކޮށް އައިސް ބައްދަލުކުރާ ތަނެވެ. ކޮންމެ ހަފުތާއަކު ވެސް ދެ މީހުން އެތަނަށް އަންނަނީ ހަގީގީ އަޅުކަމަށެވެ. ނަމަވެސް ނިމިގެން ދަނީ ލޯބީގެ އަޅުކަމުންނެވެ.
''މިހެން ކިހާ ދުވަހަކު އުޅެވޭނީ. މާދަމާ އަހަރެމެން ގެއަށް އައިސް މި ވާހަކަ ދައްކަންވާނެ. އެހެން ނޫނީ މި ކަމެއް ނުވާނެ.'' މަލުސިރުގެ ބޯ ބާއްވާނެ ބާލީހަކަށް އުނގު ދީގެން އިން ރެހެންދިހާރު ދެއްކި ވާހަކަތައް އަޑުއެހުމަށް ފަހު މަލުސިރު ޖަވާބު ދިނެވެ.
''ރެހެންދިއަށް ކެރެންޏާ މަށަށް ކެރޭނެ. ތި ވަރުގެ ހިތްވަރު ހުރިއްޔާ މަ މިހުރީ ހަމަ ތައްޔާރަށް. ރެހެންދިއަށް ދެރަ ގޮތެއް ވެދާނެތީ މަ މި މަޑުކުރަނީ.''
''މި ހެން ދެ މީހުން އުޅޭއިރު ހާދަ އުފާވެރިޔޭ. އަހަރެންނަށް ދެން މަލުސިރާ ނުލައެއް ނޫޅެވޭނެ. ދެން ކެތެއް ނުކުރެވޭނެ.'' މަލުސިރުގެ ބޮލުގައި މަޑުމަޑުން ފިރުމާލަމުން ރެހެންދިހާރު ބުންޏެވެ.
''އަހަރެންނަކަށްވެސް ދެން ކެތެއް ނުކުރެވޭނެ. މިހާރު މި އިންތިޒާރު ކުރެވެނީ ކައިވެނި ކުރެވޭނެ ދުވަހަކަށް. އަހަރެންގެ އާއިލާއިން ވެސް ބޭނުންވަނީ މިކަން އަވަސްކުރަން. ބުނަން މިއަދު އަދި ނަންނުގައްޗެއްވެސް ގެއިން ފެނިއްޖެ. މަންމަ ބުނީ ގެއަށް އުފާވެރިކަމެއް ވާން އުޅެނިއްޔޯ. މަށަށް ހީވަނީ ރެހެންދި އަހަރެމެންގެއަށް ގެންދެވެނީހެން.'' ހިނިގަނޑަކާއެކު މަލުސިރު ބުންޏެވެ.
''ތިހެން ބުނީމާ މި ހަނދާންވީ. އަހަރެމެން ގެއިން ފެންނަ ނަންނުގަތި އިއްޔެ މަރާލައިފި. ވީގޮތަކީ ބޮޑުއަށި މަތީ އެ ނަންނުގަތި އޮއްވާ ކޮއްކޮއަށް ފެނުނީ ވަރަށް ކައިރިން. ގަތްބިރުން ކޮއްކޮ ހަޅޭއްލަވައިގަތީ. މީގެ ކުރިން ވެސް ދެފަހަރަކު މި ކަމެއް ހިނގި. ކޮއްކޮ ވަރަށް ބިރުގަންނާނެ ނަންނުގަތި ދެކެ. އެ އަޑަށް ބައްޕަ ނުކުމެ އޭތި މަރާލީ. ފަހުން އެ ކަމާ ދެރަވެގެންވެސް އުޅުނު ބައްޕަ.'' ރެހެންދިހާރު ދެއްކި ވާހަކަތަކުން އޭނާގެ އުނގުން ބޯނެގުމަށް ފަހު މަލުސިރަށް އިށީނދެލެވުނެވެ.
''އެކަމަކު ތިއީ ހާދަ ދެރަ ކަމެކޭ. ޔަގީން ކޮންމެވެސް ދެރައެއް ދިމާވާނެ.'' ޝަހާދަތް އިނގިލި ހުޅުވާލުމަށްފަހު މަޅާލެވިފައިވާ އެހެން އިނގިލިތަކުގައި ބޮޑުވައި އިނގިލި ޖައްސާލަމުން މަލުސިރަށް ބުނެވުނެވެ.
''މީހުން ތިހެން ބުނާތީ އަޑުއަހަން. އެކަމަކު ކޮންމެ ފަހަރަކު އެގޮތަކަށް ދިމައެއް ނުވެއެއްނު.'' ރެހެންދިހާރު ބުންޏެވެ.
''ރަނގަޅީ ދިމާ ނުވިއްޔާ. ދެން ހިނގާ ދަމާ. މިހާރު މާ ލަސްވެއްޖެ. އެކަމަކު އަހަރެމެން ދެ މީހުން ދިމާވަންވާނެ. އަހަރެން ދާނީ އަތިރިން. ރެހެންދި ދޭ މައި މަގުން.'' ގަސްތަކުގެ ތެރެއިން އަތިރިމައްޗަށް ހިނގައި ގަންނަމުން މަލުސިރު ބުންޏެވެ.
ރަށުގެ ބޮޑުމަގުން އުތުރަށް އެޅުމަށް ފަހު، ޖެހިގެން އޮތް ގޯޅިން ލަނބާލުމާއެކު ރެހެންދިހާރަށް ލިބުނީ ހާސްކަމެވެ. އެ ގޭ ދޮށަށް މީހުންތައް ޖަމާވެފައިވަނިކޮށް ރެހެންދިހާރަށް ފެނުނެވެ. އޭނާގެ ހިތް ތެޅެން ފެށިއެވެ. ނަގާ ކޮންމެ ފިޔަވަޅަކަށް ޚިޔާލެއް ބޮލަށް ވަންނަމުން ދިޔައެވެ. ޖަހާ ކޮންމެ ވިންދަކާއެކު ދެރަގޮތެއް ނުވުމަށް އެދި ދުއާކުރެވެމުން ދިޔައެވެ.
ރެހެންދިހާރު ގެއާ ހަމަވުމާއެކު އެންމެންގެ ލޯތައް އޭނާއަށް އަމާޒުވިއެވެ. ދިގު ކަޅު، ފަންއިސްތަށިގަނޑުގެ ތެރެއިން ފެންނަމުންދާ އޮޅަލި މޫނަށް ބަލަން ފެށުނެވެ. ހާސްވެފައިވާ ރެހެންދިހާރަށް މީހުން ގަނޑުގެ ތެރެއިން ގޭތެރެއަށް ދެމިގަނެވުނެވެ. އޭރު މުޅި ގޭތެރޭގައި ވަނީ ރުއިމުގެ އަޑެވެ.
''ކީއްވެ އަހަރެންގެ ދެ ދަރިން ދާން ޖެހެނީ؟ ކޮބާ އެމީހުން ކުރި ކުށަކީ؟ ކީއްވެ އެ ކުދިން ބަދު ނަސީބު ވާންވީ. ދަރިންދެކެ އިންތިހާއަށް ލޯބިވުމުން ދެއްވާ ރިޒުގަކީ މީތަ؟'' ރޮމުން ރޮމުން މައްޗަށް ބަލަހައްޓައިގެން ހުރެ ހަޅޭއްލަވަމުން ދިޔައީ މަހާސަރެވެ. އޭނާ ހަމައަކަށް އެޅުވުމަށް ހިސާބުގަނޑު ގަދަރުވެރިން އުޅެއެވެ.
''ބަލަ އަދި ސަލާމަތް ވެދާނެއްނު. އެ ގެންދަނީ ގުރުއަތު ނަގާކަންނު. ތިގޮތަށް ނުރުހުން ފާޅުކުރާނަމަ ކަންތައް މާ ގޯސްވެދާނެ.'' މަހާސަރަށް ވިސްނައިދެވޭތޯ މަސައްކަތްކުރީ އޭނާގެ އެކުވެރިއެކެވެ.
''ނުވާނެ.. އެކަކުވެސް ނުވާނެ. އެހެން ނޫންނަމަ ކީއްކުރަން ގެންދަންވީ؟ ކޮބާ ބޭނުމަކީ؟'' ގޮތް ހުސްވެފައިވާ މީހެއް ފަދައިން އަޑުގެ ކޮޅަށް މަހާސަރު ހަޅޭއްވަމުން ދިޔައެވެ. އޭނާގެ އެ ޢަމަލުތައް ހުއްޓުވުމަށް ކުރެވުނު މަސައްކަތް ކާމިޔާބުވީ އެތައް އިރެއް ފަހުންނެވެ. އެތައް ބައެއްގެ މަސައްކަތުންނެވެ. އޭރު ގޭތެރޭގެ ދެކުނު ފަރާތުގައި ހުރި ދިމާއެނދުގައި ރެހެންދިހާރު އިނީ ގަބުވެފައެވެ. ތިރި އަށީގައި އިން ރެހެންދިހާރު ގިސްލަ ގިސްލާފައި ރޮނީއެވެ.
ޖެހިގެން އައި ދުވަހުގެ ހެނދުނުގެ އަޅުކަން ނިންމިގޮތަށް ގެއަށް ވަން މަހާސަރަށް އުޅެވޭ ގޮތް ޚުދު އޭނާއަކަށްވެސް ނޭނގެއެވެ. އިރުއިރުކޮޅާ ބޭރު ބަލައިލެވެއެވެ. އިރުމަތީ ފަރާތު ބިތުގައި ހުރި ބޮޑުއަށީގައި އިށީނދެލެވެއެވެ. ދެކުނުފަރާތުގައި ހުރި ދިމާއެނދާ ދިމާއަށް ހިނގައި ގަނެވެއެވެ. އެއަށްވުރެ އަވަހަށް އެނބުރި އައިސް ބޮޑު އަށީގައި ޖައްސާލެވެއެވެ. ގުރުއަތުނެގުމަށް ދަރިން ގެއިން ނުކުތީއްސުރެ މަހާސަރަށް ހުރެވުނީ އެދޭތެރޭގައި ހިނގާލަ ހިނގާލައެވެ. ސިކުނޑީގައި އެނބުރޭ ޚިޔާލުތަކާ އެއްވަރަށް މީހާ ވެސް އެނބުރި އެނބުރިއެވެ.
އިރުތަކެއް ފަހުން ކުއްލިއަކަށް ރޮމުންރޮމުން ގެއަށްވަނީ ރެހެންދިހާރެވެ. ކުރިމަތީ ހުއްޓުން އަރާފައި ހުރި ބައްޕަ ފެނުމާއެކު އޭނާއަށް ބައްޕަގައި ބައްދައި ގަނެވުނެވެ. ރޮމުން ދިޔަ އަޑު، ބާރުވެ ގިސްލެވެން ފެށުނެވެ.
''ބައްޕާ އަހަރެން ސަލާމަތްކޮށްދީ. އަހަރެންނެއް ނުދާނަން. އަހަރެން ސަލާމަތްކޮށްދީ. ކީއްވެތަ އަހަރެން ދާން ޖެހުނީ؟ ކީއްވެތަ އަހަރެން މަރުވާން ޖެހުނީ؟ ކީއްވެތަ އަހަރެންނަށް މިހެންވާންވީ؟'' ކުޑަކުއްޖަކު ފަދައިން ބައްޕަގައި އޮޅުލަމުން ރެހެންދިހާރު އަޑުގެ ކޮޅަށް ރޮމުން ދިޔައެވެ. އެ ބައްޕަގެ ލޮލުން އެއްވެސް ހިފަހެއްޓުމެއް ނެތި ހޯސްލާފައި ކަރުނަ ފައިބަމުން ދިޔައެވެ. ދަރިފުޅު ދެން ސަލާމަތް ނުވާނެކަން ހިތަށް އަރުމުން އެ ލޮލަށް ކެތްނުވީއެވެ. އިތުރަށް ހިތްވަރު ނުކުރެވުނީއެވެ. އޭރު ދައްތައަށް ދިމާވި ހިތާމަވެރިގޮތް ހިތަށް އަރާފައި ކަމަންހާރުވެސް ގިސްލަގިސްލާފައި ރޮނީއެވެ.
އިއްވުނު ސަންގާއެކު ރަށުތެރެއަށް ފެތުރު ޚަބަރުން ހިސާބުގަނޑު މީހުން އެ ގެއަށް ޖަމާވަމުން ދިޔައެވެ. މަހާސަރަށް ނަސޭހަތް ދިނުމުގައި ގަދަރުވެރީން އުޅެއެވެ. ރެހެންދިހާރާއި ކަމަންހާރު ހަމައަކަށް އެޅުވޭތޯ އެއްބަޔަކު މަސައްކަތްކުރާއިރު އަނެއްބަޔަކަށް ތިބެވުނީ ވާނުވާ ނޭނގިފައެވެ. ބުދުކޯލަށް ދާންޖެހުނީ ކާކުކަމެއް ގިނަމީހުންނަކަށް ވަކިކުރާކަށް ނޭނގުނެވެ. ދެކުދިންވެސް ރޮނީއެވެ. އުޅޭ ގޮތުން ދެ ކުދިންވެސް ދާންޖެހުނު ކަހަލައެވެ. އެ މަންޒަރުފެނި ކޮންމެ މީހެއްގެ ހިތުގައިވަނީ ހަމްދަރުދީއެވެ. ދެކުދިންގެ ހާލުފެނި ކުރެވޭ ހެޔޮ ދުޢާތަކެވެ.
މީހުންތައް އެ ގެއިން ނުކުމެގެން ދިޔައީ އިރުއޮއްސި އަނދިރިވީ ފަހުންނެވެ. އެންމެންގެ ރުހުމާއި ހެޔޮއެދުން ރެހެންދިހާރާއި އާއިލާއަށް ދެމުންނެވެ. ގޭތެރެ ކޮންމެވެސް ވަރަކަށް ހަމަޔަކަށް އެޅުމުންނެވެ.
''ދަރިފުޅާ! ތިކަމުގައި ބައްޕައަށް ކޮށްދެވޭނެ އިތުރު ކަމެއް ނެތް. ތިއީ ދަރިފުޅުގެ ނަސީބު. ކަލާނގެ މިންވަރު ކުރެއްވި ގޮތް. ދަރިފުޅުގެ ބަދަލުގައި ބައްޕައަށް ދެވޭ ނަމަ ބައްޕަ ދިޔައީސް.'' ރެހެންދިހާރު މެޔާ ލައްކޮލަމުން ބައްޕައަށް ބުނެވުނީ އެ ވަރަށެވެ. ފުން ނޭވާއަކާއެކު ރޮމުން ރޮމުން އަނެއްކާވެސް ބައްޕަ ފެއްޓިއެވެ.
''ދަރިފުޅާ! ބައްޕައަށް މަޢާފުކުރޭ! ދަރިފުޅަށް ކައިވެންޏާ ހަމައަށް ނުދެވުނީ ބައްޕައާ ހެދި. އެކަން އަވަސް ކުރެވުނު ނަމަ މިއަދު ސަލާމަތްވީސް..." ބެދިފައިވާ އަޑު ފަޅާލަމުން ބައްޕައަށް ބުނެވުނެވެ.
''ބައްޕާ.......... އަޅެ މިނޫން ގޮތެއް ނޯންނާނެތަ؟ އަހަރެން ބޭނުން މަލުސިރާ ބައްދަލުކުރަން. އަހަރެން ބޭނުން އޭނާއާ ވާހަކަދައްކަން. އަހަރެން ބޭނުން އޭނާއާ ކައިވެނި ކުރަން.'' ގޮތް ހުސްވެފައިވާ ރެހެންދިހާރަށް ބުނެވުނީ އެހިސާބަށެވެ. އަނެއްކާވެސް އޭނާ ބަޑިފަޅައިގެން ދިޔައީއެވެ.
''ހުއްޓާލާ ދަރިފުޅާ! ހުއްޓާލާ. މަލުސިރާ އަދި ބައްދަލުކުރެވޭނެ. ބައްޕަ އެކަން ކޮށްދޭނަން.'' ގައިގައި ބައްދާލައިގެން އޮތް، ދަރިފުޅުގެ ބުރަކަށީގައި ފިރުމާލުމަށްފަހު، ބައްޕަގެ ދެއަތަށް އިތުރު ބާރެއްލަމުން ބައްޕަ ބުނެލިއެވެ. އެ ބައްޕަގެ ހިތުގައި ވަނީ ދަރިފުޅާމެދު އުފެދިފައިވާ ކުލުނެވެ. ވިސްނާނުލައި ކަންތައް ކުރެވުނު ގޮތް ހިތަށް އަރާ ހީވި މޮޔައެވެ. ލިބިފައި ދެ ދުވަސްތެރޭ ދަރިފުޅު އުފަލުގައި ބެހެއްޓުމަށް ކުރެވެން އޮތް ހުރިހާ ކަމެއް ކޮށްދިނުމުގެ އަޒުމެވެ. އެ ދަރިފުޅު މާދަމާ މަރުވާނެކަން އެނގޭއިރު ބަފަޔަކަށް ކެތް ކުރެވޭނީ ކިހިނެއް ހެއްޔެވެ؟ ދެ ދުވަސް ފަހުން އެ ދަރިފުޅު ނުފެންނާނެކަން ޔަގީންވާއިރު ދަރިފުޅެ އެދޭ އެއްވެސް އެދުމެއް ފުއްދައިނުދީ ހުރެވޭނީ ކިހިނެއް ހެއްޔެވެ؟ އެކަމަކު އެކަމެއް ނުވާނެއެވެ. ދެން އެކައިވެންޏެއް ނުކުރެވޭނެއެވެ. އެނޫން ގޮތެއް ނޯންނާނެއެވެ.
ފަންޖިފުޓީގައި ބީހެމުންދާ ވައި ރޯޅިތަކުގެ އަޑު އިވެން ފެށީ ބައްޕަގެ ގިސްލުމުގެ އަޑު ކެނޑުމުންނެވެ. ރެހެންދިހާރާއި ކަމަންހާރަށް އިތުރަށް އަންނާނެ ކަރުނައެއް ނެތުމުންނެވެ.
''ދައްތާ އަހަރެން އެންމެ ލޯބިވަނީ ދައްތަ ދެކެ. ދައްތަ އުފާވެރިކަމާއެކު ދިރިއުޅޭތަން ދެކެން އަހަރެން ބޭނުން. ދައްތަ މަރުވާކަށް އަހެރެން ބޭނުމެއް ނޫން. ދައްތަ މި ދުނިޔެ ދޫކޮށް ދާން އަހަރެންގެ ހިތެއް ނޭދޭ. ދައްތައާ ނުލާ އަހަރެންނަކަށް ނޫޅެވޭނެ.......... ދައްތައާއެކު އަހަރެން ގެންދޭ. މިތާ ހުންނާކަށް އަހަރެން ބޭނުމެއް ނޫން. މީ ކޮން ކަހަލަ ދުނިޔެއެއް.'' ކުރެހިފައިވާ އަޑުން ކަމަންހާރަށް މަޑުމަޑުން ބުނެވުނެވެ.
''ތިޔަ ވާހަކަ ނުދައްކާ ކޮއްކޯ. މިއީ ދައްތަގެ ނަސީބުހުރި ގޮތް. މިދައްތައަށް ދުނިޔޭގެ އުފާ ލިބެންނެތީ. މި ނޫން ގޮތެއް ނެތް.'' ރެހެންދިހާރަށް ރޮއިގަނެވުނެވެ.
''ނޫން ދައްތާ! ދައްތަ ގެ އުންމީދުތައް އަހަރެންނަށް އެނގޭ! ދައްތަ ދެކެމުން އައި ހުވަފެންތައް އަހަރެންނަށް ފެނޭ. ދައްތަ މަލުސިރުދެކެ ލޯބިވާވަރު އަހަރެންނަށް ވިސްނޭ. އަހަރެން ބޭނުން ދައްތައަށް އެހީވާން. އަހަރެން ބޭނުން ދައްތައަށް ތިއުފާވެރިކަން ހޯދައިދޭން. ބައްޕަ އެއުޅެނީ ނުނިދިގެން. ބައްޕަ އެހިތާމަ ކުރަނީ ދައްތަގެ ލޯތްބަށް ހުރަސް އެޅުމުން. ދައްތަގެ ކައިވެންޏަށް ބައްޕައަށް ގަބޫލުވެވުނު ނަމަ ކިހާ ރަނގަޅުވީސް. މިހާރު ދައްތަ އުޅޭނީ އުފަލުން. މި ދުވަހެއް ނުފެނުނީސް.'' ކަނު އަނދިރީގައި ބޯ ކަހަމުން ވިސްނަމުން ވާހަކަދައްކަމުން ދިޔަ ކޮއްކޮ ބުނަމުން ދިޔައެވެ.
''ކޮއްކޯ. ދެން ތިވާހަކަތައް ނުދައްކާ. ދައްތައަށް އިތުރު ހިތްވަރު ނުދީ. ދައްތައަށް އެނގޭ މި ނޫންގޮތެއް ނެތްކަން. މިކަމުން މިންޖުވާނެ މަގެއް ނެތްކަން. ކޮއްކޯ؟..... ކޮއްކޮ ދެރަވާނެ ކަމެއް ދައްތައަށް ކުރެވިފައިވާނަމަ މައާފުކުރޭ. ދައްތައަށް ހެޔޮ ދުއާކޮށްދޭތި. ދައްތަ މަތިން އަބަދު ވެސް ހަނދާންކުރާތި. ބައްޕައާމެދު ދައްތަގެ ހިތުގައި އެއްވެސް ހިތްބަރުކަމެއް ނެތް. ބައްޕަ ވެސް ވިސްނީ ދައްތައަށް ރަނގަޅުގޮތް ހޯދައިދިނުމަށް. އެކަމަކު އެކަމަށް ހުރަސް ނޭޅިނަމަ މިއަދު ތިބޭނީ ކައިވެނި ކޮށްގެން. މިދުވަހެއް ނުފެނުނީސް.'' ކޮއްކޮގައި ބައްދާލަމުން ރެހެންދިހާރަށް ބުނެވުނީ އެހިސާބަށެވެ. އޭނާގެ އަޑު ކެނޑުނެވެ. ކުރެހިފައިވާ އަޑުން ދެ މީހުން ގިސްލަމުން ދިޔައެވެ. މިގޮތުގައި އެތައް ވަގުތެއް ހޭދަކުރިއެވެ. އެތައް ވާހަކައެއް ދެއްކިއެވެ. އެތައް ހަނދާންތަކެއް އާ ކުރިއެވެ. އެތައް ޞަފުޙާތަކެއް ހުޅުވިއެވެ.
އާ ދުވަހެއްގެ މުލަ ހާލުގެ އަޑުން ރަށުގެ ހިމޭން މާހައުލު ފޫއަޅުވާލައި ހަލަބޮލިކޮށްލިއެވެ. މާދުރުން އައި އެ އަޑުން ރެހެންދިހާރަށް ލެވުނީ ފުންނޭވާއެކެވެ. އޭނާއަށް ހީވީ ބުދުކޯލަށް ދިއުމަށް ގޮވާލިހެންނެވެ. ދެން އިވެން ފެށި ހާތަކުގެ އަޑުންވެސް އޭނާއަށް ގޮވާހެން ހީވިއެވެ. އެ އަޑުތަކުގެ ތެރެއިން ދެން އިވެން ފެށީ ރެހެންދިހާރަށް މީހަކު ގޮވާއަޑެވެ. އެއަޑު ކަންފަތުގައި ޖެހުމާއެކު ވީނުވީއެއް އޭނާއަކަށް ނޭނގުނެވެ. އެތެރެގޭގައި ހުރި ދެކުނު އެނދުން ފުންމާލުމަށްފަހު ބޭރަށް ނުކުތެވެ. އެއަޑާއެކު ކަމަންހާރާއި ބައްޕައަށްވެސް ދުވެފައި ނުކުމެވުނީ ބޭރަށެވެ.
ފެންކަޅިވެ ރަތްވެފައިވާ ލޮލާއެކު ކުރިމަތީ ހުރީ މަލުސިރެވެ. އޭނާއަށް މަލުސިރުގެ ފުޅާ ބައިމަތީ ބައްދައި ގަނެވުނެވެ. ގެއްލިފައިވާ ލޯބިވެރިޔަކު އެތައް ދުވަހެއް ފަހުން ފެނިގެން ބައްދައި ގަންނަ ގޮތަށެވެ. ދުވަހަކު ވަކިނުވުމަށް އެދި އާދޭސްކުރަމުންނެވެ.
''މަލުސިރު.......... އަހަރެން... ކިހިނެއް ހަދާނީ؟ އަހަރެން ގެންދޭ... އަހަރެން ސަލާމަތްކޮށްދީ..'' މަލުސިރުގައި އޮޅުލައިގެން އޮވެ އޭނާގެ ބުރަކަށީގައި އަތްކާއްތަމުން ރެހެންދިހާރަށް ބުނެވުނެވެ. މަލުސިރަށް ހުރެވުނީ ހުއްޓުން އަރާފައެވެ. އޭނާ އެންމެ ލޯބިވާ ރެހެންދިހާރުގެ ދުލުން ދައްކާ ވާހަކަތަކަށް ދޭނެ ޖަވާބެއް ދުލަށް ނައިސްގެންނެވެ. ހަށިގަނޑުގައި ހިނގަމުން ދާ ލޭގެ ދައުރުވުން އަވަސްވެ ހޫނުވަމުން ދާތީ އެކަމަށް ވަގުތުކޮޅެއް ނެގުމުންނެވެ.
''އަހަރެންނަށް މައާފުކުރޭ. ކުށްވެރިއަކީ އަހަރެން. އަހަރެންގެ ބަދު ނަސީބުކަން. މަލުސިރަށް މިފަދަ ހިތާމައެއް ކުރިމަތި ކުރެވުނީތީވެ އަހަރެން ދެރަވަން.'' ކޮންމެ ޖުމުލައަކަށް ފަހު ރެހެންދިހާރަށް ގިސްލެވެމުން ދިޔައެވެ.
''ނޫން. ނޫން... ރެހެންދިއަކީ ކުށްވެރިއެއް ނޫން... ތިއީ ކުށްވެރިއެއް ނޫން. ކުށްވެރިންނަކީ އަންހެން ކުދިން ބުދުކޯލަށް ގެންދާ މީހުން. މިކަންކަން ރާވާ މީހުން. ކީއްވެތަ ހަމައެކަނި އަންހެންކުދިން ގެންދަންވީ؟ ކީއްވެތަ އަހަރެމެން މިހެން ތިބެންވީ؟ ކީއްވެތަ ވަކި ބަޔަކު ގެންދަންވީ؟'' މަލުސިރުގެ ލޭ ކެކެންފެށިއެވެ. އޭނާގެ އަޑު ގަދަވާން ފެށިއެވެ. ހެނދުނުގެ އަޅުކަމަށް ތެދުވެ އުޅުނު ދުވަސްވީ މީހުންތައް ގޭދޮށަށް ޖަމާވާން ފެށިއެވެ.
އެންމެންގެ މޫނުމަތިން ފެންނަމުން ދިޔައީ ނުތަނަވަސްކަމެވެ. އޭނާ ދައްކާ ވާހަކަތައް، ހިތާއި ނަފުސުން ގަބޫލުކުރެވުނަސް އެނޫން ގޮތެއް ނެތެވެ. އެކަމާ ދެކޮޅަށް ތެދުވި މީހުންނަށް ވީގޮތް އެންމެންނަށް އެނގެއެވެ. އެތައް ބައްޕައަކާއި ބޭބެއެއްގެ ފުރާނަ ނެތިގެން ދިޔައީ އެކަމާދެކޮޅަށް ތެދުވެގެންނެވެ. އެކަމުން ކުރި ލިބޭގޮތް ނުވެގެންނެވެ. މިއަދު ކިތަންމެވަރަކަށް އަޑުލީ ނަމަވެސް އެއީ މޮޔަކަމެއްކަން އެންމެންނަށް ގަބޫލުކުރެވެއެވެ. ދީނީގޮތުން އަދާކުރަންޖެހޭ ފަރުޟަކާ ދެކޮޅަށް ވާހަކަދެއްކުމަކީ ކުށެކެވެ. ފައްޅީގެ ހާމުއެދުރުންނާ ދެކޮޅަށް އަޑުލުމަކީ މައާފުކުރެވެން ނޯންނާނެ އަދަބު ހައްގުވާ ކުށެކެވެ. އެހެންވެ މަލުސިރަށް ވިސްނައިދެވޭތޯ މަހާސަރު މަސައްކަތް ކުރިއެވެ. އޭނާ ހަމައަކަށް އެޅުވޭތޯ ތަންގަނޑު މީހުން އުޅުނެވެ. ނަމަވެސް އެންމެފަހުން ޖެހުނީ މަލުސިރު އެހިސާބުން ފޮނުވާލާށެވެ. ދަރިފުޅާ ވަކިކުރުވާށެވެ.
ރެހެންދިހާރު ބުދުކޯލަށް ގެންދިއުމުގެ ވަގުތު ކުޑަތަންވެއްޖެއެވެ. މަހާސަރުގެ ދެލޮލުން ކަރުނައެއް ނުހިކެއެވެ. އޭނާގެ ދަރިޔަކު ޒީނަތްތެރިވެފައިވާ މަންޒަރު ފެނުމުން ލިބުނު ހިތާމަ މިއަދުވީ އިތުރެވެ. އަނދެގެން ހުރި ކަނޑިއްކާއި ލައިގެން ހުރި ލިބާހާއި ބޮލުގައި އަޅާފައިވާ ރުމާފަޅިން ހަނދާންކޮށްދިނީ އެ ކުދިންގެ މަންމަމަތިންނެވެ. އެ ދަރިންނަށް ރައްކާތެރިވުމަށް އަންހެނުން ކުރި ވަސިއްޔަތް މަތިންނެވެ. އެ ހަނދާންތަކުގެ ތެރެއަށް ފީނައިގަތުމަށް މަހާސަރަކަށް ވަގުތެއް ނުދިނެވެ.
''ބައްޕާ! ދެރަނުވޭ. މިއީ ބައެއް ކުދިންގެ ނަސީބު. ނަސީބަކީ ބައެއް ފަހަރު ވަރަށް ހިތި އެއްޗެއް. އެކަމަކު އެ ހިތިކަމުން ބައެއް މީހުން ސަލާމަތްވޭ. އަހަރެން ކެތްތެރިވާނަން. ބައްޕައަށް އަބަދުވެސް މައާފުކުރާނަން. ބައްޕައަކީ ކުށްވެރިއެއް ނޫން. ކުށްވެރިއަކީ އަހަރެން. އަހަރެންގެ ކުށަކީ ބައްޕަ ދޫކޮށްފައި ދާކަން. ބައްޕައަކީ އަހަރެންނަށް މި އޮތްހައި ދުވަހު ލޯބިދިން ފަރާތް. ބައްޕަ ނެތްނަމަ މިހާ ދުވަހު، މިހާ އުފަލުން އަހަރެންނަކަށް ނުއުޅެވުނީސް. ބައްޕާ! އަހަރެން އަބަދުވެސް ބައްޕަ ދެކެ ލޯބިވޭ. އެކަމަކު އެންމެ ލޯބިވަނީ ކާކުދެކެކަން ބައްޕައަށް އެނގޭނެ. އަހަރެން މިދަނީ ގުރުބާންވާން. އަހަރެން ގަބޫލުކުރަނީ އަހަރެންގެ ހެޔޮކަން ބައްޕައަށް ލިބޭނެކަމަށް'' ރޮމުން ގިސްލަމުން ދިޔަ ބައްޕަގައި އޮޅުލައިގަންނަމުން ރެހެންދިހާރު ވާހަކަދައްކަމުން ދިޔައެވެ. އެ މަންޒަރު ބަލަހައްޓައިގެން ކަމަންހާރަކަށް ނުހުރެވުނެވެ. އޭނާ، ދައްތަގައި ބައްދައިގަތެވެ.
''ދެރަނުވާތި... މިއަދު އެތަނަށް ދެވޭތީ އަހަރެން މި ވަނީ އުފާ.. ދެރަ ނުވާތި. މިހިތުގައި އަބަދުވެސް ވަނީ ލޯބި. އެލޯތްބަށް ބަދަލެއް ނާންނާނެ..... އަހަރެމެންގެ ސިއްރުތައް ފޮރުވާތި. އެ ސިއްރުތަކަށް ރައްކާތެރިވާތި.'' ވައި އަޑުން ދައްކަމުން ދިޔަ ވާހަކަތަކުން ދެ މީހުންގެ ގައިން ހީބިހި ނަގަމުން ދިޔައެވެ.
" އަހަރެން ބިރުގަނޭ...... ފަހުން ވާނެ ގޮތެއް ނޭނގޭ..... އަހަންނަށް މަޢާފުކުރޭ. ތިއީ ކެތްރިއެއް. ލޯބިވާ ފަރާތެއް." ކަމަންހާރަށް ބުނެވުނީ އެހިސާބަށެވެ. ބޭރުން އިވެންފެށި ސަންގާއެކު އެންމެ ފަހުގެ ބޮސްދިނުން ކަމަންހާރުގެ ނިތްކުރިއަށް ދިނީ ރެހެންދިހާރެވެ. އެއަށްފަހު ކަރުގައި އޮތް ފަށް ނަގާ ކަމަންހާރުގެ ކަރުގައި އަޅުވާލުމަށްފަހު ގެއިން ނުކުންނަން ރެހެންދިހާރު ހިގައިގަތެވެ.
އޭރު ގޭ ދޮށުގައި ކަޅު، ވަރުގަދަ 8 ފިރިހެނުން ތިއްބެވެ. ހަތަރެސްކަނަށް ވާގޮތަށް މަތި ހިޔާކޮށްފައިވާ ހުދު ތުނި ފޮތީގެ ފޭލިގެއެއް ގޭ ދޮރުމަތީ ބެހެއްޓިފައިވެއެވެ. ކީމަކޮޅެއް ކަހަލަ އެ ފޭލިގޭގެ މަތީ ކައިރިފަށް ވިހޭފަށުން ޒީނަތްތެރިކުރެވިފައިވާ އިރު އޭގެ ތެރޭގައި އިށީނުމަށް ގޮނޑިއެއް ހުއްޓެވެ. ރެހެންދިހާރު ގޮސް އެގޮނޑީގައި އިށީނުމާއެކު ފުމެންފެށި ސަންގުން ފޭލިގޭގެ ހަތަރުކަނަށް ހަތަރު މީހުން ލެފިލުމަށްފަހު އުފުލައިލިއެވެ. އެއަށް ފަހު ދިމާ ކުރިމައްޗަށް އޮތް ބޮޑުމަގުން ހިނގައިގަތެވެ. ރެހެންދިހާރަށް ބަލައިލެވުނީ އޭނާގެ ކޮށްކޮއާ ދިމާއަށެވެ. އެންމެ ފަހު ނަޒަރު ހުއްޓާލީ އޭނާގެ ބައްޕައާ ދިމާއަށެވެ. ދަތްދޮޅީގައި އަތްވިދިފައިވާ ބައްޕައަށް ބޯޖަހާލީ ވަރަށް ހިތްވަރުންނެވެ. އެހިނދު އޭނާގެ ހިތް ބާރުބާރަށް ރޯންފެށިއެވެ. ނަމަވެސް ކެތްކުރީއެވެ. ގުރުބާންވުމަކީ ވާޖިބެއްކަމަށް އޭނާ ގަބޫލުކުރީއެވެ.
މަންޒަރު ބަލަން މަގުތަކަށް މީހުން ޖަމާވެފައި އޮތެވެ. އެންމެންގެ ލޮލުން ދަނީ ކަރުނަ ނީރެމުންނެވެ. މަރުވުމަށް ތައްޔާރަށް ދާ ކުއްޖެއްކަން އެންމެންނަށް އެނގެއެވެ. ދެން ފެންނާނީ އޭނާގެ މަސްގަނޑުކަން އެންމެން ދަނެއެވެ. މާދަމާ، އެއިން މީހެއްގެ ދަރިޔަކަށް އެކަން ދިމާވެދާނެކަން އެންމެން ގަބޫލުކުރެއެވެ. ކޮންމެ މީހަކުވެސް އަންހެން ކުއްޖާއަށް ބަލައިލުމަށްފަހު ހިންދުރުވާލަނީއެވެ. އެދަރިންގެ ކެތްތެރިކަމަށް ބޯޖަހާލަނީއެވެ.
ތިން މަސް ފަހެވެ. ގޭތެރެއަށް އެއްވެސް ދިރުމެއް ނާދެއެވެ. މަހާސަރު ބަލަމުން ދިޔައީ ދަރިފުޅު ކަމަންހާރު ހަމައަކަށް އެޅުވޭތޯއެވެ. އޭނާއަށް ލިބިފައިވާ މާޔޫސްކަން ފޮރުވުމަށްފަހު ދަރިފުޅުގެ ހިތް ހަމަޖައްސައިދެވޭތޯ އެވެ.
''ދެން ދަރިފުޅު އެކަމާ ނުވިސްނާ. އަބަދު ދައްތަގެމަތިން ހަނދާން ނުކުރޭ. އެ ޚިޔާލުތަކާ ދުރުވެވޭތޯ ބަލާ. ދައްތަ އެ ގުރުބާންވީ އަހަރެމެންނަށް." ބައްޕަގެ ވާހަކަތަކަށް ކަމަންހާރު ބޯޖަހާލިއެވެ.
" ތެދެއް އެއީ ގުރުބާނީ އެއް. ބައްޕައާއި އަހަރެންނަށްވީ ގުރުބާނީއެއް. ކިހިނެއް އަހަރެން ހަނދާން ނައްތާލާނީ؟ ކިހިނެއް އެ ހަނދާންތަކާ ދުރުވާނީ......؟ ހުވަފެނުންވެސް ފެންނަނީ.... މިހާރުވެސް ހަނދާންވަނީ..." ކަމަންހާރަށް ރޮވޭގޮތްވިއެވެ. ބައްޕަ ދަރިފުޅާ ގާތްވެލިއެވެ. ދަރިފުޅަށް ވިސްނައިދެވޭތޯ މަސައްކަތްފެށިއެވެ.
" ދަރިފުޅާ ކަމަންހާރު! އަވަހަށް މީހަކާ އިންނަންވީ. އެހެން ނޫންނަމަ ދައްތައަށް ދިމާވި ގޮތް ދިމާވެދާނެ. ދަރިފުޅު ކޮންމެ މީހަކާ އިނަސް ބައްޕަ ގަބޫލުވާނަން. މިއަދުން މިއަދަށް އެކަމާ އުޅެދޭނަން'' މަލުސިރުގެ ލޯތްބާމެދު ކަންތައް ކުރެވުނުގޮތް ބައްޕަގެ ހިތުން ފިލައިގެން ނުދާކަން ކަމަންހާރަށް ފާހަގަކުރެވުނެވެ.
''ނޫން ބައްޕާ. އަހަރެން މީހަކާ ނުއިންނާނަން. އެކަމެއް ނުކުރާނަން. އެހިތްވަރެއް ނެތް. އަހަރެން އެއްވެސް މީހަކު ދެކެ ލޯތްބެއް ނުވޭ.'' ފެންކަޅިވެފައިވާ ކަމަންހާރަށް ބުނެވުނެވެ.
''ނޫން ދަރިފުޅާ! ދައްތައަށް އެހެންވީ ބައްޕަގެ އިހުމާލުން. އަނެއްކާ ދަރިފުޅު...... އޭރުން މާދެރަވާނެ. ދައްތަގެ ގުޅުމަށް ނޫނެކޭ ބުނެވުނީތީ މިއަދު ބައްޕަ ދެރަވޭ. އެކަނިވާ ކޮންމެ ވަގުތަކު އެކަމާ ހިތާމަކުރެވޭ. ރޮވޭ. އަސަރުކުރޭ.'' ބެދިފައިވާ އަޑަކުން ބައްޕައަށް ބުނެވުނެވެ.
''އެންމެ ރަނގަޅު. އެހެންވެއްޖިއްޔާ އަހަރެން ދައްތަގެ މަލުސިރާ...'' އެހިސާބަށް ބުނެވުނުތަނާ އެ އިންތަނުން ބައްޕައަށް ތެދުވެވުނެވެ. ދަރިފުޅުގެ މޫނަށް ވަރަށް ރަނގަޅަށް ބަލައިލިއެވެ. ކަމަންހާރަށް ތެޅިގަނެވުނެވެ.
'' ބަލަ ދަރިފުޅާ! އޭރުން މީހުން ކިހައި މަލާމާތެއް ކުރާނެ. އަދި މިވީ ތިން މަސް. އަނެއްކާ ދަރިފުޅު ވީ މަލުސިރާ ގުޅެން. މީހުން ހީކުރާނީ ދައްތައަށް އެހެންވީ ދަރިފުޅުގެ ބަދު ދުއާއިން ކަމަކަށްނު.'' ބައްޕަ ވިސްނީ މީހުންކިޔާފާނެ އެއްޗަކަށެވެ. ބޭނުންވީ އެކަން ދަރިފުޅަށް ވިސްނައި ދިނުމަށެވެ.
''ނޫން ބައްޕާ! އަހަރެންނަށް އެކަން ކޮށްދީ! އަހަރެން ބޭނުން މަލުސިރަށް އުފާވެރިކަން ހޯދައިދެން. ދައްތަގެ ބަދުނަސީބުން މަލުސިރަށް އެލިބުނު ހިތާމަތައް ފިލުވައިލަ ދޭން.'' ކަމަންހާރު ދައްކާ ވާހަކަތަކަށް ބައްޕައަށް މަޖުބޫރުވީ އިޖާބަދޭށެވެ. އެނޫން ގޮތެއް ނެތިގެންނެވެ. އަމިއްލަ ގަދަރާއި ދަރަޖަ ދޫކޮށްލައިގެންވެސް ދަރިފުޅުގެ އެ އެދުން މުހިންމުވުމުންނެވެ.
ދަރިފުޅުގެ އެ އެދުން ފުރިހަމަކުރުމަށް މަލުސިރާ ބައްޕަ ބައްދަލުކުރިއެވެ. އެކަން ބޭނުންވާކަމަށް އެދުނެވެ. ކުރިން ވީކަންތައްތައް ހަނދާން ނައްތާލުމަށް ބުންޏެވެ.
''ނުވާނެ ތިކަމެއް. ދުވަހަކުވެސް ތިކަމެއް ނުކުރާނަން. ތިޔަ އުޅެނީ އަހަރެން އިމްތިހާނުކުރަންތަ؟ ދުވަހަކުވެސް ރެހެންދިހާރު ނޫން މީހަކާ ނުއިންނާނެކަމަށް އަހަރެންވާނީ ވަޢުދުވެފައި. ޚުދު ކަމަންހާރަށް ވެސް އެކަން އެނގޭނެ. ތިކަމެއް ނުވާނެ. މި ބުނީނު ނުވާނޭ.'' މާޔޫސްވެފައިވާ މަލުސިރަށް ވާހަކަދެއްކުނީ މާބާރަށްކަން އެނގުނީ މާ ފަހުންނެވެ.
''މައާފުކުރޭ. އަހަރެންނަކަށް ތިކަމެއް ނުވާނެ.'' މަލުސިރުގެ ޖަވާބާއެކު ފެންކަޅިވި މަހާސަރު އަމިއްލަގެއާ ދިމާއަށް ހިނގައިގަތެވެ. އޭރު ރަށުތެރޭގައި މީހުންތައް ދުވެ ނަގަނީއެވެ. އެއްބަޔަކު ސަލާމަތްވެއްޖެޔޭ ގޮވާ ހަޅޭއްލަވަނީއެވެ. އަނެއްބަޔަކު ދެން ރަންނަމާރިއެއް ނާރެނެޔޭ ކިޔައި ގޮވަނީއެވެ. ކަމުވޮށިވެގެންވާ މީހުން ރަސްގެފާނުގެ ގަނޑުވާރާ ދިމާއަށް ދުވަނީއެވެ. ރަށުތެރެއަށް ވެރިވެފައިވާ ހިރަފުހުގެ ފުސްކަމުގެ ތެރޭގައި ކުޑަކުދިންނާއި ޒުވާނުންވެސް މަގުތަކަށް ޖަމާވަމުންދެއެވެ. އެއްބަޔަކު ގޮވަނީ އެމީހުންގެ ދަރިން ގުރުބާން ކުރެވިއްޖެ ކަމަށެވެ. އަނެއް ބަޔަކު ގޮވަނީ މި ބަލާ މުސީބާތުން ފިއްލަވައިފި ކަމަށެވެ. ދެންތިބި މީހުން ބުނަނީ ފައްޅިތަކާއި ވިހާރަތައް ނައްތާލަންވީ ކަމަށެވެ. ހަގީގީ ދީން އެނގިއްޖެކަމަށް ބަޔަކު ބުނަމުން ދާއިރު، އަނެއް ބަޔަކު ބުނަމުންދިޔައީ ހިދާޔަތުގެ ނޫރުން މުޅިތަން އަލިކޮށްފި ކަމަށެވެ.
މަހާސަރަށް ހުރެވުނީ ހުއްޓުން އަރާފައެވެ. ގެއިން ނުކުތް ބޭނުން ހަނދާން ނެތިފައެވެ. އަމިއްލަ ހިތުން ސިކުނޑިއަށް ކުރާ ސުވާލުތަކާ ހެދި އުނދަގޫވެފައެވެ. އޭނާގެ ދޮށީ ދަރިފުޅު ގުރުބާންކުރަން ޖެހުނީ ކީއްވެހެއްޔެވެ؟ ދީނީގޮތުން އެކަން މަނާ ނުކުރަންވީ ކީއްވެހެއްޔެވެ؟ އެތައް އަންހެން ކުދިންނެއްގެ ހައްގު ނިގުޅައިގަންނަމުން ދިޔައިރު ފައްޅިތަކުގައި އެތިބި ހާމުއެދުރުން ކުރީ ކޮންކަމެއް ހެއްޔެވެ؟ ރަނގަޅު ދީނެއްނަމަ އެހެނެއް ނުވާނެވެ. މަހާސަރުގެ ހިތުގައި ހުރި އުދާސްތައް އެހެން މީހުންގެ ދުލުން ބޭރުކުރާތަން ފެނުމުން އޭނާއަކަށް ނުހުރެވުނެވެ. އޭނާ އިސްވީ އެ ބުނާ މީހަކާ ބައްދަލު ކުރުމަށެވެ. އެ ބުނާ ދީނެއް ޤަބޫލުކުރުމަށެވެ. އެފަދަ ބޮޑު މުސީބާތަކުން ސަލާމަތްވީތީ އެ ދީނުގެ ހަގީގަތް ހޯދުމަށެވެ. މަހާސަރުވެސް މިސްރާބުޖެހީ ރަސްގެފާނުގެ ގަނޑުވަރާ ދިމާއަށެވެ.
އެންމެފަހުން ހަގީގީ ދީން މަހާސަރު ގަބޫލުކުރިއެވެ. ޝަހާދަތްކިޔައި އެދީނަށް ވަނެވެ. އެދީނުގެ ރުކުންތައް ދަސްކުރިއެވެ. ރަސްގެފާނާއެކު ރައްޔިތުންގެ ތެރެއިން ގިނަ ބަޔަކު އިސްލާމުވުމާއެކު މުޅިރަށަށް އުފާވެރިކަންލިބިގެން ދިޔައެވެ. އެއުފަލުގައި ކަމަންހާރު ބައިވެރިވިއެވެ. އެދީނުގެ ހިދާޔަތު ހޯދިއެވެ. އެ ހިދާޔަތާއެކު ކަމަންހާރުގެ ބިރު ފިލައިގެން ދިޔައެވެ. ދިރިއުޅުމުގެ ދަތުރު ފެށުމަށް ބޭނުންވިއެވެ. އެނިޔަތުގައި މަލުސިރާ ބައްދަލުކުރަން ބޭނުންވިއެވެ. އެހެންވެ ބައްޕައާއެކު އެގެއަށް ދިއުމަށް އެދުނެވެ.
''ނޫން ދަރިފުޅާ! މަލުސިރު ތިކަމެއް ނުކުރާނެ. ދަރިފުޅުގެ ދައްތަ ގާތު އެހެން މީހަކާ ނުއިންނާނެކަމަށް އޭނާ ވަނީ ވަޢުދުވެފައި. ތި ކަމެއް އޭނާއެއް ނުކުރާނެ.'' ވަރަށް ނުބުނަން އުޅެފައިވެސް ބައްޕަގެ ދުލުން އެވާހަކަ ބުންޏެވެ. ކަމަންހާރަށް ހުއްޓުން އެރިއެވެ.
''ތިހެން އޭނާ ބުނިތަ؟ ...... ކަލާނގެ ގަންދީ ހުވާކުރަން. އެއީ ތެދުހަދާ ފަރާތެއް. ވައުދަށް ކަމޭހިތާ މީހެއް. ބައްޕާ އަހަރެންނާއެކު އެގެއަށް ހިނގާބަލަ! އަޅެ ބައްޕާ ހިނގާބަލަ! އަހަރެން ބޭނުން ދާން. ހަމަ މިހާރު ދާން..'' އެންމެ ފަހުން ކުރުނުކޮށްގެން ބައްޕައަށް މަޖުބޫރުވީ މަލުސިރުގެ ގެއަށް ދާށެވެ. އޭރު މަލުސިރެއް ގެއަކު ނޫޅެއެވެ. އޭނާ ވީ ބޭރުގައެވެ.
އެންމެ ފަހުން ކަމަންހާރާއި ބައްޕަ ދިޔައީ ބޮޑުވޭރާ ދިމާއަށެވެ. އަޅުކަމުގެ މައި ކިއްލާ މިއަދު އެވަނީ ފަޅުވެފައެވެ. ވަށްބައްޓަމަށް ހުރި ބޮޑު ދާގަބައާއި ހަތަރެސްކަނުގެ ބޮޑު ވިހާރައިގެ ބޭރުގައި އެކަކުވެސް ނެތެވެ. ފެންގަނޑުތައް ދޮށުގައި ފެންވަރަން އުޅޭ ތެދިން މީހުން ފިޔަވާ އިތުރު މީހެއްގެ ހިލަމެއް ނުވެއެވެ. މުޅި ތަނަށް ވެރިވެފައި ވަނީ ހިމޭންކަމާއި އަމާންކަމެވެ. ފައްޅީގެ ރާގުތައް ވަނީ ކެނޑިފައެވެ. އެ ބިރުވެރިކަން ވަނީ ފިލައިފައެވެ. ބައްޕަގެ ފަހަތުގައި ހުރެފައި ކަމަންހާރަށް ދުއްވައި ގަނެވުނީ ކުރިއަށެވެ. ކުރިމަތިން ފެނުނު މަލުސިރާ އަރާހަމަވެ އޭނާގައި ބައްދައިގަނެވުނެވެ. މަލުސިރަށް ހުރެވުނީ ހައިރާންވެ ބަސް ހުއްޓިފައެވެ. ބައްޕައަށް ހުރެވުނީ އާ ޝޯޚްވެފައެވެ.
''މިއީ ރެހެންދިހާރު..... ހުވާކޮށްފައި ބުނަން. ގަބޫލުކުރޭ! މިއީ މަލުސިރުގެ ރެހެންދި.'' ހައިރާންވެފައިވާ މަލުސިރަށް ނޫނެކޭ ބުނެ ބޯ ހޫރާލެވުނެވެ.
''ދަރިފުޅާ! ކިހިނެއް ތިއުޅެނީ....'' ބައްޕަ ހިތްހަމަނުޖެހުނީ ކަމަންހާރު އުޅުނު ގޮތުންނެވެ.
''ބައްޕާ. ގަބޫލުކުރޭ މިއީ ރެހެންދިހާރު. މިއީ ރެހެންދިހާރު. ކިހިނެއް އަހަރެން ބުނާނީ. ނިކަން އަހަރެން ކަރުގައި މިއޮތް ފަށަށް ބަލާބަލަ. އެންމެ ތިން ހަތަރު މަހުން މިފަށް ކަރުގައި ޖެހޭ ރޮނގު އެނގޭނެތަ؟ މިރޮނގު މިހާ ފާޅުކޮށް ފެންނާނެތަ؟ ނުފެންނާނެ'' ކަރުގައި އޮތް ފަށް ހިތްލައިލަމުން ބައްޕައަށާއި މަލުސިރަށް އޭނާގެ ކަރު ދައްކަން ފެށިއެވެ.
''ނުކުރާނަން ގަބޫލެއް. ތިއީ ރެހެންދިއެއް ނޫން.'' މަލުސިރަށް ބުނެވުނެވެ.
''ނޫން މަލުސިރު.. މިއީ ރެހެންދި. ހިނގާ ކައިވެނިކުރާ ދުވަހު އެޅުމަށް ވަޅުލި އަނގޮޓި ނަގަމާ.'' މަލުސިރު އަތުގައި ހިފުމަށްފަހު ކަމަންހާރު ހިނގައިގަތީ އެތާ ދުރުގައި ހުރި ބޮޑު ބޮއިގަހާ ދިމާއަށެވެ. މަލުސިރަށް ލިބެމުން ދިޔަ ހައިރާންކަން ވީ އިތުރެވެ. އެ އަނގޮޓި ވީތަން އެހެން އެކަކަށްވެސް ނޭނގޭނެތީއެވެ. ސީދާ އެ ތަން ފާހަގަކުރަން ރެހެންދިއަށް ނޫނީ ނޭނގޭނެތީއެވެ. ކަމަންހާރު ގޮސް އަނގޮޓި ވަޅުލިތަނަށް ތިރިވެ ކޮންނަން ފެށްޓިއެވެ.
''އެ އަނގޮޓި އޮންނާނީ ހިރިގަލު ދަޅެއްގައި.'' ކަމަންހާރު ދައްކަމުންދާ ވާހަކަތަކުން މަލުސިރަކަށް ނުހުރެވުނެވެ. އޭނާއަށް ޔަގީން ކުރެވުނެވެ. ދައްކަމުން ދިޔަ ވާހަކަތަކުން އެއީ ރެހެންދިކަން އެއްވެސް އޮޅުމެއްނެތި ގަބޫލު ކުރެވުނެވެ.
''މިއޮތް ހުރިހާ ދުވަހު ކީއްވެތަ ތިވާހަކަ ނުބުނެ ތިހުރީ؟ ކީއްވެތަ ތިކަން ސިއްރު ކުރީ؟ ކީއްވެތަ މަށާ ވަކިން ތި އުޅުނީ؟'' ރެހެންދިހާރުގެ ދެކޮނޑުގައި ހިފައި ކޮޅަށް ނަގަމުން ލިބެމުންދިޔަ އުފަލާއެކު މަލުސިރު އަމުނާލެވުނީ ސުވާލުފައްޗެކެވެ.
''ކިހިނެއް އަހަރެންނަށް ކެރޭނީ އަހަރެންނަކީ ރެހެންދިހާރޭ ބުނަން. އެކަން އެނގިއްޖެނަމަ އަހަރެންނަށް އަންނާނެ އަދަބު ކާކަން އެނގެނީ؟ މިކަން އޮޅުވާލިކަން އެނގޭނަމަ އަހަރެންގެ އާއިލާއަށް ކޮންމެ ފަދަ ގޮތެއްވެސް ހަދާފާނެ. އެހެންވީމާ އަހަރެންނަށް މަޖުބޫރުވީ ސިއްރުކުރަން. އަހަރެންނަށް މަޖުބޫރިވީ. އެނޫންގޮތެއް ނެތުނީ. މަލުސިރު ފެންނަ ހިސާބަށް ނުދިއުމަށް އަހަރެންނަށް މަޖުބޫރުވީ. ހިނގައްޖެނަމަ ކެތް ނުވާނެކަން އަހަރެންނަށް އެނގޭ. މިކަން ފަޅާއަރާނެކަމުގެ ބިރު އަހަރެންނަށް ހީވޭ.....'' ރޮމުން ރޮމުން ދައްކަމުން ދިޔަ ވާހަކަތައް ބައްޕައަކަށް ގަބޫލެއް ނުކުރެވުނެވެ.
ދަރިފުޅުގެ ފައިތިލަ ދަށަށް އެ ބައްޕަ ވެއްޓިގަތެވެ. އެދަރިފުޅުގެ ކަށިމަތީގައި ލަކުނެއް ހުރިތޯ ޔަގީންކުރަން ބޭނުންވިއެވެ. އެ ލަކުނު ފެނުމާއެކު ބައްޕައަށް ދަރިފުޅުގައި ބޮސްދެވުނެވެ.
''މިއީ ރެހެންދިހާރު. ހަމަޔަގީން މިއީ ރެހެންދިހާރު. މިއީ ގޭގެ ބޮޑުއަށިން ވެއްޓިގެން ރެހެންދިހާރުގެ ކަށިމަތީ ލީ ލަކުނު. ކަމަންހާރު ފަޔަކު މިލަކުނެއް ނުހުންނާނެ.'' އެއީ ރެހެންދިހާރުކަން ބައްޕަ ޔަގީން ކުރިއެވެ. ބައްޕައަށް ގިސްލެވެންފެށީ އެހިސާބުންނެވެ.
" ދަރިފުޅާ ކިހިނެއް ތިހެދީ! ކޮއްކޮ ދިޔައީ ކީއްވެ؟ ކީއްވެ ބައްޕައަށް އޮޅުވާލީ؟ ކީއްވެ މިއޮތް ހުރިހާ ދުވަހު ބައްޕައަށް މި ކަން ސިއްރުކުރީ؟" ރޮމުން ރޮމުން ބައްޕަވެސް ކުރީ ސުވާލުތަކެވެ.
''ބައްޕާ އަހަރެންނަށް މައާފުކުރޭ. މި އޮތް ހުރިހާ ދުވަހު ސިއްރުކޮށްގެން އުޅެން ޖެހުނީތީ އަހަރެންނަށް މަޢާފުކޮށްދީ! މިއީ ކޮއްކޮގެ ވަސިއްޔަތެއް. ކޮއްކޮ ބޭނުންވި ގޮތް. ކޮއްކޮ ބޭނުންވީ ބައްޕައަށްޓަކައި ގުރުބާންވާން. ކޮއްކޮއަށް ގަބޫލުކުރެވުނީ އަހަރެން ބުދުކޯލަށް ދާންޖެހުނީ ބައްޕަގެ ސަބަބުންކަމަށް. ބައްޕަ އަހަރެމެންގެ ގުޅުމަށް ނޫނެކޭ ބުނުމުންކަމަށް. އެހެންވެ އެއީ އަހަރެން މަރުވުމަށް މެދުވެރިވި ސަބަބުކަމަށް ވާން ކޮއްކޮ ނޭދުނީ. އެހިތާމަ އުމުރަށް އުފުލަން ބައްޕައަށް ޖައްސަން ކޮއްކޮ ބޭނުން ނުވީ. ކޮއްކޮ ގުރުބާންވީ އަހަރެންނަށްޓަކައި. އަހަރެންގެ ލޯތްބަށްޓަކައި. ތި ބައްޕައަށްޓަކައި. ބައްޕާ! އަހަރެންނަށް މަޢާފުކުރޭ.'' ބައްޕަގައި ބައްދައިގަނެގެން އޮވެ ރެހެންދިހާރު ގިސްލަމުން އޭނާގެ ބައްޕައާ ވާހަކަދައްކަމުން ގެންދިޔައެވެ. ބައްޕަގެ ހަނދާނަށް އައީ ބުދުކޯލަށް ގެންދިޔަ ދުވަހު އެ ދަރިފުޅުގެ ދުލުން ބައްޕަގާތު ދެއްކި ވާހަކަތަކެވެ. ނަޞީބުގެ ހިތިކަމުގެ ވާހަކައެވެ. ކުށްވެރިއަކީ އޭނާކަމަށް ބުނެ ދެއްކި ވާހަކަތަކެވެ. އޭނާގެ ކުށަކީ ބައްޕަ ދޫކޮށް ދާދިއުންކަމަށް ބުނި ބުނެމެވެ. އޭނާ އެންމެ ލޯބިވާ ފަރާތް ބައްޕައަށް އެނގޭނެކަމަށް ބުނިބުނުމެވެ. ތެދެކެވެ.
"ކޮއްކޮ ބުނީ ކޮއްކޮ އެންމެ ލޯބިވަނީ ބައްޕަދެކެކަމަށް. ބައްޕައަށްޓަކައި ކޮންމެ ފަދަ ގުރުބާނެއްވެސް ވެދާނެކަމަށް. އެހެން ބުނުމަށްފަހު އަހަރެން ކަރުގައި އޮތް ފަށް އެރޭ ނެގީ. އަދި އެ ފަށް އެޅުމަށްފަހު ކޮއްކޮ ރޯން ފެށި. އޭރު ބައްޕަ ގިސްލާ އަޑު އިވޭ. ބައްޕަ ގިސްލަނީ ބައްޕައަށް ކަންތައް ކުރެވުނު ގޮތުންކަމަށް ކޮއްކޮ ބުނި. އެހެންކަމުން އެއީ ސަބަބެއްކަމަށް ވާން ކޮއްކޮ ނޭދޭކަމަށް ބުނި. އަދި އަހަރެންގެ ބަދަލުގައި ކޮއްކޮ ބުދުކޯލަށް ދާން ނިންމި. އަހަރެން އެކަމާ ދެކޮޅު ހެދިން. ކޮއްކޮ މަރުވާން އަހަރެން ބޭނުން ނުވާކަމަށް ބުނިން. ނަމަވެސް ކޮންމެ ކުއްޖަކު މަރުވިނަމަވެސް ބައްޕައަށް ލިބޭނެ ލުޔެއް ނޯންނާނެކަމަށް ކޮއްކޮ ބުނި. އެކަމަކު އަހަރެން މަރުވެއްޖެނަމަ އެއީ ބައްޕަގެ ސަބަބުން ވީކަމެއްކަމަށް ހިތާ އުމުރު ދުވަހު އެ ހިތާމަކުރާނެކަމަށް ކޮއްކޮ ބުނި. އެހެންވެ ކޮއްކޮ ބޭނުންވީ އެ ގުރުބާން ވާން." ކަންތައް ވީގޮތް ރޮމުން ރޮމުން ރެހެންދިހާރު ކިޔައިދެމުން ދިޔައެވެ. އެއަޑު އިވެމުންދިޔަވަރަކަށް ބައްޕަގެ ގިސްލުންވީ އިތުރެވެ. މަލުސިރު ކޯތާފަތްމަތި ތެމުމުން ދިޔައީ އޭނާ އެންމެ ލޯބިވާ ރެހެންދި ދައްކަމުންދިޔަ ވާހަކަތަކުން ހިތަށް ކެތް ނުވެގެންނެވެ. ކޮއްކޮގެ ހެޔޮކަމާއި ރަނގަޅުކަން ހިތަށް އަރާފައެވެ.
''ދަރިފުޅާ! ބައްޕައަށް މަޢާފުކުރޭ! ދަރިފުޅުގެ ކައިވެންޏަށް ބައްޕައަށް ނުގަބޫލުވެވުނީ އޭރު ވިސްނާނުލެވުމުން. އެކަމާ ބައްޕަ ވަރަށް ދެރަވި. އުމުރު ދުވަހު އެ ހިތާމަކުރީސް.'' ދަރިފުޅުގެ ބުރަކަށީގައި އޮތް އަތް ދެ ފަހަރަކު ކާއްތާލަމުން ބައްޕަ ބުންޏެވެ.
''ކޮއްކޮ އެވީ މަތިވެރި ގުރުބާނެއް. މަތިވެރި ގުރުބާނެއް. މި ބައްޕައަށްޓަކައި ވީ ގުރުބާނެއް.'' ނީރެމުން ދިޔަ ކަރުނަތަކާއެކު ތުރުތުރު އަޅަމުންދިޔަ ބައްޕަ ބުންޏެވެ.
''އެއީ އަހަރެންނަށްޓަކައިވެސް ވީ ގުރުބާނެއް. ބައްޕާ! އެކަމަކު މިއީ ސިއްރެއް. މި ވާހަކަ އިތުރު މީހެއްގެ ގާތު ނުބުނާތި. މި ކަން އެނގޭނީ ބައްޕައާއި މަލުސިރަށް. މިކަން ދާއިމީ ސިއްރެއްގެ ގޮތުގައި ބޭއްވުމީ ކޮއްކޮގެ ވަސިއްޔަތެއް. އަހަރެން މަލުސިރާ ކައިވެނި ކުރުމަކީ ކޮއްކޮގެ އެދުމެއް. '' ރެހެންދިހާރު ދެއްކި ވާހަކަތައް އަޑުއަހަމުން ބައްޕަ ބޯޖަހާލިއެވެ.
''މިއޮތީ އަނގޮޓި. މިއީ ރަން.'' ގަލުން ހަދާފައިވާ ކުޑަ ދަޅުގެ މަތި ހިއްލައިލަމުން މަލުސިރު ބުންޏެވެ.
''ތި އަނގޮޓި ދަރިފުޅުގެ އިނގިލީގައި އަޅުވާ!'' ހިނިތުންވެ ހުރެ ބުނި ޖުމުލައަށްފަހު ބައްޕަ ހިނގައިގަތެވެ. އެއާއެކު ރެހެންދިހާރުގެ ކަށި އިނގިލީގައި އަނގޮޓި އެޅުވުމަށްފަހު މަލުސިރު އޭނާގެ ގައި ބައްދާލިއެވެ. އެއަށްފަހު ބައްޕަގެ ފަހަތުން ހިނގައިގަތެވެ. ދެމީހުންގެ ހިތުގައި ބޮޑު ސިއްރެއް ވަޅުލަމުންނެވެ. އެހެން އެއްވެސް މީހަކަށް އެ ކަން ނޭނގުމަށް ވަޢުދު ވަމުންނެވެ. ދުވަހަކުވެސް ދުލުން އެ ވާހަކަތައް ނުބުނާނެކަމުގެ ޔަގީންކަން ދެމުންނެވެ.
''ދެން އަހަރެން ކިޔަންވީ ކަމަންހާރުދޯ؟ މިނަން މާރީތި. މިއީ މިހާރު މަގޭ ކަމަންހާރު.'' ހިނިތުންވެލަމުން މަލުސިރު ބުންޏެވެ.
'' ނޫން. ކަމަންހާރުވެސް ރެހެންދިހާރުވެސް ކިޔާކަށް ނުޖެހޭނެ. އިރާދަކުރެއްވިއްޔާ އަހަރެންނަށް ދެން ގޮވާނީ އެހެން ނަމަކުން. އަހަރެން އިސްލާމުވެއްޖައިން. މި ހިތްވަރު ލިބުނީ އެ ދީނުން. އެކަމަކު މިއީ މިހިތުގައި އަބަދުވެސް ދިރުވަން މަޖުބޫރު ނަމެއް.'' ރެހެންދިހާރުގެ ބުނުމަށް މަލުސިރު ބޯޖަހާލީ ހިތާ ރޫހުން އެކަމަށް އެއްބަސްވަމުންނެވެ. އެގުރުބާނީގެ އަގު އަދާ ނުކުރެވޭނެކަން ހިތަށް ގެންނަމުންނެވެ.
