ފުރަތަމަ ކަމަކަށް: ނިޔަތް ޚާލިޞް ކުރާށެވެ.
ތިމާގެ ނިޔަތް ޚާލިޞްކޮށް، ހެޔޮ ޢަމަލު ކުރުންމަތީ ދެމިހުރުމަށް ޢަޒުމު ކަނޑައެޅުން ވަރަށް މުހިންމެވެ. އެހެނީ ތިމާގެ އަޖަލު އައިސް ﷲގެ ޙަޟްރަތަށް ދާންޖެހޭނެ ވަގުތެއް އެއްވެސްމީހަކަށް އެގިގެންނުވެއެވެ. މިފަދަ މަތިވެރި މައްސަރަކާ ކުރިމަތިލައި، ހެޔޮ ޢަމަލުކުރުމަށް ޢަޒުމު ކަނޑައެޅުމަށްފަހު، ތިމާ އެ ޢަމަލުތައް ނުކޮށް އުޅެނިކޮށް ތިމާގެ މަރު އައިނަމަވެސް ކުރުމަށް ޢަޒުމު ކަނޑައެޅި ހުރިހާ ހެޔޮ ޢަމަލެއްގެ ދަރުމައާއި ޘަވާބު ފުރިހަމައަށް އެ މީހަކަށް ލިބޭ ހުއްޓެވެ. މިހެންމިކަން އޮތުމުން އެނގިގެންދަނީ ހެޔޮ ޢަމަލުކުރުމަށް ނިޔަތްގަނެ ޢަޒުމު ކަނޑައެޅުމުގެ މުހިންމުކަމެވެ.
ދެވަނަ ކަމަކަށް : ތެދުވެރި ތައުބާއަކުން ތައުބާވާށެވެ.
ތައުބާވުމަކީ ވާޖިބެކެވެ. އެއީ މި މަހަށް ވަކިން ޚާއްޞަކުރެވިފައިވާ ކަމެއް ނޫނެވެ. އިންސާނާގެ މުޅި ޙަޔާތުގައި އޭނާ ތައުބާވުން މަތީގައި އަބަދުމެ ދެމިހުންނަން ޖެހޭނެއެވެ. މާތް ﷲ ވަޙީ ކުރައްވާފައި ވެއެވެ. : (وَتُوبُوا إِلَى اللَّهِ جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ) މާނައީ: '' އޭ އީމާންވި މީސްތަކުންނޭވެ. ތިޔަބައިމީހުން އެކީ އެކައްޗަކަށް ﷲއަށް ތައުބާވާށެވެ. އެއީ ތިޔަބައިމީހުން ކާމިޔާބުވުމަށް ޓަކައެވެ.''
ތިންވަނަ ކަމަކަށް : ދުޢާކުރުންމަތީ ދެމިހުންނާށެވެ.
ރޯދަމަހުގައި އަޅުކަންތަކުގައި މަޝްޣޫލުވެ އުޅުމުގެ އަދި ރޯދަމަހުގެ ފުރިހަމަ ޘަވާބާއި ދަރުމަ ލިބޭތޯ ކޮންމެ މީހަކުމެ ދުޢާކުރުމަކީ ވަރަށް މުހިންމު ކަމެކެވެ. އިންސާނުންނަކީ ގިނަގިނައިން ހަނދާންނެތޭ، ތަކުރާރުކޮށް ކުށްތަކަށް އަރައިގަންނަ ބައެކެވެ. ވީމާ، ފާފަތައް ފުއްސެވުމަށާއި، ނަރަކައިން ދިންނަވައި ސުވަރުގެ މިންވަރު ކުރައްވާތޯ ގިނަގިނައިން ދުޢާ ކުރާށެވެ.
ހަތަރުވަނަ ކަމަކަށް : މި މަތިވެރި މާތް މައްސަރާ ބައްދަލުވީތީ އެކަމާ އުފާކުރާށެވެ.
އެހެނީ މިއީ ހެޔޮކަމުގެ މޫސުމެކެވެ. ސުވަރުގޭގެ ދޮރުކޮޅުތައް ހުޅުވާލެވޭ މޫސުމެކެވެ. ނަރަކައިގެ ދޮރުތައް ބަންދުކުރެވޭ މޫސުމެކެވެ. ﷲ سبحانه وتعالىގެ ރަޙުމަތް އޮހިގެންދާ މޫސުމެކެވެ. އުފާވެރިކަމާއި، ދީލަތިކަމުގެ މޫސުމެކެވެ.
އިސްވެ މި ދެންނެވުނީ އެންމެ ހެޔޮ މައްސަރުގެ ހެޔޮކަން ލިބިގަތުމަށް ކުރެވިދާނެ މުހިންމު ބައެއް ކަންކަމެވެ. މީގެ އިތުރުން ވެސް ކުރެވިދާނެ އެތައް ހެޔޮ ޢަމަލުތަކެއް އެބަ ހުއްޓެވެ. ވީމާ، ވެވުނު މިންވަރަކުން ހެޔޮ ޢަމަލުކުރުންމަތީ ދެމިހުރެވޭތޯ ބަލާށެވެ. މި މަހުގެ ފުރިހަމަ ސަވާބާއި ދަރުމަ ހޯދުމަށް ގަދައަޅައި ހިތްވަރުކުރާށެވެ.
