1994ވަނަ އަހަރުގެ ނޮވެންބަރު މަހުގެ 14ވަނަ ދުވަހު އުފަންވެ ވަޑައިގެންނެވި ޑރ. އުޛައިން، ޕްރީސްކޫލް ތައުލީމު ފުރިހަމަ ކުރެއްވީ އަހުމަދިއްޔާ އިންޓަރނޭޝަލް ސްކޫލުންނެވެ. ޖަމާލުއްދީން ސްކޫލުން ޕްރައިމަރީ ތަޢުލީމް ފައްޓަވައި ގްރޭޑް 2 ނިންމެވުމަށް ފަހު، ގްރޭޑް 4،3 ގެ ކިޔެވުން ފުރިހަމަ ކުރެއްވީ ސްރީލަންކާގެ ކެންޑީގައި ހުންނަ ގޭޓްވޭ އިންޓަނޭޝަނަލް ސްކޫލުންނެވެ. އެއަށް ފަހު ދެވަނަ ފަހަރަށް ޖަމާލުއްދީން ސްކޫލާ ގުޅިވަޑައިގެން ގްރޭޑް 5، 6 ގެ ކިޔެވުން ނިންމެވީ ޖަމާލުއްދީން ސްކޫލުންނެވެ. އެއަށް ފަހު ރާއްޖެއިން ބޭރަށް ވަޑައިގެން، ގްރޭޑް 7ން ފެށިގެން އޯލެވަލް ނިމެންދެން ކިޔަވައި ވިދާޅުވީ އޭޝިއަން އިންޓަރނޭޝަނަލް ސްކޫލުގައެވެ.
މާސްޓަރސް ނިންމެވުމަށް ފަހު މަންމައާ ބައްޕައާ އެކުގައި
ޑރ. އުޛައިން، އެންމެ ކުޑައިރު ވެސް ބޭނުންފުޅުވީ ޕައިލެޓަކަށް ވާށެވެ. އެހެނަސް އުމުރުގެ ކުރީކޮޅުގައި ފާހަގަ ކުރެވުނު ޞިއްހީ ބައެއް ކަންކަމާ ގުޅިގެން އެ ދާއިރާއިން ކުރިއަށް ވަޑައިގަތުމުގެ ވިސްނުން ބަދަލުކުރެއްވީއެވެ.
"ކުޑައިރު އެންމެ ބޭނުންވީ ޕައިލެޓަކަށް ވާން. އެހެނަސް އަޅުގަނޑުގެ އެއް ލޮލުގައި، ފެނުމުގެ މައްސަލަ އުޅޭތީ ޓޫރިޒަމް ދާއިރާ އިޚްތިޔާރުކުރީ. އޭރުވެސް ބައްޕަ ބޭނުންފުޅުވަނީ ލޯ ކިޔަވަން. އެހެންވެ މެލޭޝިޔާގެ އިސްލާމިކް ޔުނިވަރސިޓީވެސް ބެލިން. އެކަމަކު އެވަގުތު އަޅުގަނޑުގެ ޝައުގުހުރީ ޓޫރިޒަމް ދާއިރާއަށް ކަމުގައިވާތީ، ޓެއިލާސް ޔުނިވަރސިޓީ އިޚުތިޔާރު ކުރީ" ޑރ. އުޛައިން ވިދާޅުވިއެވެ.
2010 ވަނަ އަހަރު މެލޭޝިޔާގެ ޓެއިލާސް ޔުނިވަރސިޓިއާ ގުޅިވަޑައިގެން، ޑިޕްލޮމާ ފުރިހަމަކުރެއްވެވީ ކަލިނަރީ ދާއިރާއިންނެވެ. އެއަށްފަހު ޑިގްރީ ހެއްދެވީ ހޮސްޕިޓަރލިޓީ އެންޑް ޓޫރިޒަމް ދާއިރާއިންނެވެ. ހޮޓެލް މެނޭޖްމަންޓުން މާސްޓާސް ފުރިހަމަ ކުރެއްވުމަށް ފަހު ޑރ. އުޛައިން، ޕީ.އެޗް.ޑީ ހާސިލްކުރައްވާފައިވަނީ ސަސްޓެއިނަބަލް ޓޫރިޒަމް އިންނެވެ.
ޕީ. އެޗް. ޑީ ގެ ސުޕަވައިޒަރު ޕްރޮފެސަރ ކާޝިފްއާ އެކު
ޑރ. އުޛައިންގެ ރިސާޗް ބިނާ ކުރައްވާފައިވަނީ، ބ. އަތޮޅުގައި ދެމެހެއްޓެނެވި ގޮތެއްގައި ފަތުރުވެރިކަން ކުރިއެރުވުމާ ގުޅޭގޮތުން ސްޓޭކް ހޯލްޑަރުންނާއި އާންމު ރައްޔިތުންނާއި ފަތުރުވެރިން އަދި މުވައްޒަފުން ދެކޭގޮތުގެ މައްޗަށެވެ. އެގޮތުން ބ. އަތޮޅުގެ މީހުން ދިރިއުޅޭ ހުރިހާ ރަށަކަށް ޒިޔާރަތްކޮށް 650 މީހުންނާ އިންޓަވިއު ކުރެއްވެވިއެވެ. އެ މަސައްކަތް ކުރެއްވި އިރު، ބ. އަތޮޅު ކައުންސިލުންނާއި އެ އަތޮޅު ރަށްރަށުގެ ކައުންސިލްތަކުންނާއި، އާންމު ރައްޔިތުންގެ ފަރާތުން ދެއްވި އެހީތެރިކަން ޑރ. އުޛައން ފާހަގަކުރެއްވެވިއެވެ.
"ބ. އަތޮޅު ކައުންސިލުންނާއި، ރަށްރަށުގެ ކައުންސިލްތަކުންނާއި، އާއްމު ރައްޔިތުންގެ ފަރާތުން ވެސް މިކަމުގައި ވަރަށް ބޮޑު އެހީތެރިކަމެއް ލިބުނު. އެ ހުރިހާ ފަރާތްތަކަށް މި ފުރުޞަތުގައި ޝުކުރު އަދާކުރަން. ވަކިން ޚާއްޞަކޮށް، ހުސައިން ރަޝީދު ޓީޗަރު މި ކަމުގައި ވެދެއްވި އެހީތެރިކަން ފާހަކޮށް އެފަރާތަށް ޝުކުރު ދަންނަވަން. މީގެ އިތުރުން ހިތާދޫ ޢަބްދުއްރަހީމް ގާސިމާއި ރާއްޖޭގެ އެންމެ ތަޖުރިބާކާރު އަދި އެންމެ މަޝްހޫރުޑައިވަރުންގެ ތެރޭގައި ހިމެނިވަޑައިގަންނަވާ، ހުސައިން ރަޝީދު (ސެންޑީގެ) ނަން ފާހަގަކޮށްލަން" ޑރ. އުޛައިން ވިދާޅުވިއެވެ.
ޑރ. އުޛައިން ވިދާޅުވިގޮތުގައި ޕީ.އެޗް.ޑީގެ ރިސާރޗް ހެދުމުގައި ބ. އަތޮޅު ޚިޔާރު ކުރެއްވެވީ، އެ އަތޮޅުގައި އޮންނަ ހަނިފަރު ބޭރުގެ މުހިންމުކަން ބޮޑުވުމާ އެކު އެ ތަނަކީ ގުދުރަތީ ރީތި ސިފަތަކާއެކު، ގިނަޒަމާންތަކަކަށް ދަމަހައްޓަންޖެހޭ ވަރަށް މުހިންމު ތަނަކަށްވާތީއާއި އަދި ޑރ. އުޛައިންގެ ބައްޕަގެ އުފަން އަތޮޅަކީ ޑރ. އުޒައިނަށް ވެސް ވަރަށް ޚާއްސަ އަތޮޅެއް ކަމުގައި ދެކޭތީއެވެ. އަދި އޭގެ އިތުރުން މުޅި ބ. އަތޮޅަކީ ވެސް ގުދުރަތީގޮތުން ވަރަށް ރީތި ސިފަތަކެއް ލިބިފައިވާ އަތޮޅަކަށްވެފައި އެ އަތޮޅަކީ ފަތުރުވެރިކަމަށް ފައްކާވެފައިވާ އަތޮޅަކަށް ވާތީކަމަށް ވެސް ޑރ. އުޛައިން ވިދާޅުވިއެވެ.
ޕީ.އެޗް.ޑީ ނިންމެވުމަށް ފަހު މަންމައާ ދެ ކޮއްކޮއާ އެކުގައި
ޑރ. އުޛައިންގެ މި މުހިންމު މަސައްކަތް ފުރިހަމަ ކުރެއްވުމުގައި ތަފާތު ގޮންޖެހުންތަކާ ކުރިމަތިލައްވަން ޖެހިވަޑައިގެންނެވި ކަމަށް ވެސް އޭނާ ވިދާޅުވިއެވެ.
"މި މަސައްކަތުގައި ދިމާވި އެންމެ ބޮޑު ގޮންޖެހުމަކަށްވީ، ކޮވިޑުގެ އާލަމީ ވަބާ. އެ ދުވަސްވަރު މަސައްކަތް ކުރުމަށް ވަރަށް ދަތިވި. ވަރަށް ގިނަ ވަގުތު ހޭދަކުރަންޖެހުނު. އަދި އެ ދަތި އުނދަގޫ ވަގުތު، މަންމަ ފަރާތުގެ ކާފަގެ ބަލިހާލު ބޮޑުވެގެން މަންމަ އާ ބައްޕަ ނެތި، ގިނަދުވަސްތަކެއް ވުމާ، ހަމަ އެ ދުވަސްކޮޅުގެ ތެރޭގައި ބައްޕަ ފަރާތުގެ ކާފައާއި މަންމަ ފަރާތުގެ ކާފަ ނިޔާވުމާއި ބައްޕަ ފަރާތުގެ މާމަ ވެސް އެ މުއްދަތުގެ ތެރޭގައި ނިޔާވުމަކީ އަޅުގަނޑަށް ކުރިމަތިވި ވަރަށް ހިތްދަތި ދުވަސްކޮޅެއް" ޑރ. އުޛައިން ވިދާޅުވިއެވެ.
މިފަދަ ކޮންމެ ކަމެއް ކުރެވެނީ އާއިލާގެ ވަރަށް ބޮޑު އެހީތެރިކަމާ އެކުގައި ކަމަށާއި މި މަސައްކަތެއްގައި ވެސް ޢާއިލާގެ އެހީތެރިކަން ވަރަށް ބޮޑަށް ލިބިވަޑައިގަންނެވި ކަމަށް ވެސް ޑރ. އުޛައިން ވިދާޅުވިއެވެ.
ޕީ.އެޗް.ޑީ ނިންމެވުމަށް ފަހު އާއިލާއާއި ރަށްޓެހިންނާ އެކުގައި
"އަޅުގަނޑުގެ ދެ ފަރާތުގެ ޢާއިލާގެ ފަރާތުން ވެސް މި ކަމުގައި ވަރަށް ބޮޑު އެހީތެރިކަމެއް ލިބުނު. އެންމެ ބޮޑު އެއްބާރުލުމެއް ލިބުނީ މަންމަ އާ ބައްޕަގެ ފަރާތުން. އަދި މަންމަގެ ބޮޑުބޭބެ ވަހީދުއްދީންގެ ފަރާތުން ވަރަށް ބޮޑު އެހީތެރިކަމެއް ލިބުނު. ބަނޑޮހުންނާއި ބަނޑޮހުގެ ސްޓާފުންގެ ފަރާތުން ލިބުނު އެހީތެރިކަން ފާހަގަކުރަން. ރިސާރޗް މަސައްކަތުގައި ބ. އަތޮޅުގައި ހޭދަކުރި ދުވަސްތަކުގައި ބައްޕަގެ އުފަން ރަށް ތުޅާދޫ މީހުންގެ ފަރާތުން ވެސް ވަރަށް ގިނަގުނަ އެހީތެރިކަން ލިބުނު. ތުޅާދޫ މީހުންނަކީ ވަރަށް ހެޔޮ ބައެއް. އަޅުގަނޑު އަބަދުވެސް ދެކެނީ ތުޅާދޫއަކީ އަޅުގަނޑުގެ އަމިއްލަ ރަށްކަމުގައި. އެހެންކަމުން އަޅުގަނޑަށް ލިބުނު މި ކާމިޔާބީ، ތުޅާދޫއާއި ބ. އަތޮޅުގެ ރައްޔިތުންނާއެކު ހިއްސާކުރާ ވާހަކަ ދަންނަވާލަން" ޑރ. އުޛައިން ވިދާޅުވިއެވެ.
ޑރ. އުޛައިން ހޯއްދެވި ފުރިހަމަ ކާމިޔާބީއަށް، ތަހުނިޔާ ފަށްފަށް ކުރަމެވެ. ތުޅާދޫ ޓައިމްސް ގެ ފަރާތުން ޑރ.އުޛައިނަށް އެދެނީ އިތުރު ކުރިއެރުމާއި ކާމިޔާބީއެވެ.
