ފޯރިގަދަ މި މެޗުގެ ފުރަތަމަ ލަނޑު ކުލަބް ތޮޅިހެލޭއަށް ކާމިޔާބުކޮށްދިނީ މެޗު ފެށިގެން 17ވަނަ މިނެޓުގައި އެ ޓީމުގެ ޖާޒީ ނަންބަރު 5 އިބްރާހީމް ރަފާހެވެ. އޭގެފަހުން، މެޗުގެ 43ވަނަ މިނިޓުގައި ކުލަބް ތޮޅިހެލޭގެ ދެވަނަ ލަނޑު ޖަހައިދިނީ އެ ޓީމުގެ 11 ނަންބަރު މައިސާން މުޙައްމަދު ނަސީރެވެ. މި ލަނޑާއެކު ފުރަތަމަ ހާފު ނިމިގެންދިޔައީ ކުލަބް ތޮޅިހެލޭ 2-0 ގެ ނަތީޖާއަކުން ކުރީގައި އޮވެގެންނެވެ.
ދެވަނަ ހާފުގައި އެފްސީ ބިއްލޫރިން ނަތީޖާ ހަމަހަމަކުރުމަށް މަސައްކަތްކުރަމުން ދަނިކޮށް، މެޗުގެ އިތުރު ވަގުތުގެ ތެރޭގައި އެ ޓީމުގެ ހަމައެކަނި ލަނޑު ކާމިޔާބުކޮށްދިނީ ފަހަތަށް ކުޅޭ ޖާޒީ ނަންބަރު 4، ޝަމްވީލް މުޙައްމަދެވެ. މެޗު ނިމިގެން ދިޔައީ ކުލަބް ތޮޅިހެލޭ 2-1 ގެ ނަތީޖާއަކުން މޮޅުވެގެންނެވެ.
މި މެޗުގެ މޮޅު ކުޅުންތެރިއަކަށް ހޮވުނީ ކުލަބް ތޮޅިހެލޭގެ ފުރަތަމަ ލަނޑު ޖަހައި، މޮޅު ކުޅުމެއް ދެއްކި ޖާޒީ ނަންބަރު 5 އިބްރާހީމް ރަފާހެވެ.
މިއަދު ކުޅެވުނު މެޗުގެ މޮޅު ކުޅުންތެރިޔާއަށް ހޮވުނު އިބްރާހީމް ރަފާހު ޓްރޮފީއާ ހަވާލުވަނީ
މި މުބާރާތުގެ ސެމީ ފައިނަލްގެ ދެވަނަ މެޗު މާދަމާ ކުޅެވޭނެއެވެ. މި މެޗުގައި ބައްދަލުކުރާނީ ޓާގެޓް ފުޓްބޯޅަ ޓީމާއި ދެކުނު ކަންމަތި ޓީމެވެ. މި ދެ ޓީމުގެ ތެރެއިން މޮޅުވާ ޓީމަށް ފައިނަލުގައި ކުލަބް ތޮޅިހެލޭއާ ބައްދަލުކުރަން ފުރުސަތު ލިބޭނެއެވެ.
