މި މުބާރާތުގައި ވާދަކުރާ އަލްސްޓްރައިކަރ ޓީމަކީ ރާއްޖޭގެ މަޝްހޫރު ފުޓުބޯޅަ ކުޅުންތެރިން އެންމެ ގިނަ ޓީމެވެ. އެ ޓީމުގައި ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގު (ދަގަނޑޭ)އާއި، ސާފްޗެންޕިއަން ޝިޕްގައި ވިދާލި މުޚުތާރު ނަޞީރު (ޓޫކިލޯ) އާއި، ގައުމީ ޓީމަށް ކުޅުނު އިސްމާޢީލް ޢީސާ (މެސީ) އަދި އީގަލްސްއަށް ކުޅުނު އިބްރާހީމް މުބީން (މުއްކި) ފަދަ ތަރިން ހިމެނޭ ވަރުގަދަ ޓީމެކެވެ. އެހެންކަމުން، މި ދެޓީމު ބައްދަލުކުރި މެޗު ފެނިގެން ދިޔައީ ވަރަށް ވާދަވެރި ކުޅުމެކެވެ.
މި މެޗުގެ ފުރަތަމަ އެގާރާގައި އަލްސްޓްރައިކަރގެ ޓޫކިލޯއާއި މެސީއާއި މުއްކި ވެސް ކުޅެން ނުކުމެފައިވާ އިރު މެޗު ފެށުނު އިރު ދަގަނޑޭ އިނީ ބެންޗުގައެވެ. ދެވަނަ ހާފުގައި މުޚުތާރުގެ ބަދަލުގައި ދަގަނޑޭ ވެސް ކުޅުނު މި މި މެޗުގައި ދެ ޓީމުގެ ފަރާތުން ފެނުނީ ހަމަހަމަ ކުޅުމެކެވެ.
މެޗުގައި ފެނުނު ހަމައެކަނި ލަނޑު ފެނިގެންދިޔައީ މެޗުގެ ދެވަނަ ހާފުގެ 67 ވަނަ މިނިޓްގައެވެ. މި ލަނޑު އެފްސީ ބިއްލޫރީގެ ޖާޒީ ނަންބަރު 20، މަޢާދު އަދުނާނު އެ ޓީމަށް ކާމިޔާބުކޮށްދިން އިރު، މި ލަނޑަކީ މެޗުގެ ނަތީޖާ ކަނޑައެޅި ލަނޑެވެ.
މެޗުގެ މޮޅުކުޅުންތެރިޔާ ޝަންވީލު މުހައްމަދު ޓްރޮފީއާ ހަވާލުވަނީ
މި މެޗުގެ މޮޅު ކުޅުންތެރިއަކަށް ހޮވިފައިވަނީ އެފްސީ ބިއްލޫރީގެ ޖާޒީ ނަންބަރު 4، ޝަމްވީލް މުޙައްމަދެވެ.
މުބާރާތުގެ ފަސްވަނަ މެޗުގައި މާދަމާ ބައްދަލުކުރާނީ ކްލަބް ތޮޅިހެލޭ އަދި ކަފަމާ ޔުނައިޓެޑްއެވެ.
