މި އިޢުލާނު ކޮށްފައިވަނީ މާލެ ސަރަޙައްދުގައި ކުރަންޖެހޭ ބައެއް މަސައްކަތްތައް ކުރުމަށާއި، އަވަހަށް ހޯދަންޖެހޭ މުހިންމު ތަކެތި ހޯދައި، ރަށަށް ދަތުރުކުރާ އުޅަނދުފަހަރުގައި ފޮނުވައިދޭނެ ފަރާތެއް ހޯދުމަށެވެ.
މި މަޤާމަށް ހޮވޭ ފަރާތުގެ މަސްއޫލިއްޔަތުތަކުގެ ތެރޭގައި މާލެ ސަރަޙައްދުގެ ފިހާރަތަކުން އަގުބަލަންޖެހޭ ތަކެތީގެ އަގު ބެލުމާއި، މާލޭ ސިޓީގެ އޮފީސްތަކާއި ފިހާރަތަކުން ނަގަންޖެހޭ ތަކެއްޗާ ހަވާލުވެ އެ ތަކެތި ކައުންސިލަށް ފޮނުވުން ހިމެނެއެވެ. މީގެ އިތުރުން، ޑީ.އެން.އާރުން ނަގަން ޙަވާލުކުރެވޭ އައިޑީ ކާޑު ނަގައި ކައުންސިލަށް ފޮނުވުމާއި، ސައިކަލުގައި ނުއުފުލޭ މުދާ އުފުލުމަށް ކުރާ ދަތުރުގެ ބިލް ކައުންސިލަށް ފޮނުވުން ފަދަ މަސައްކަތްތައް ވެސް ކުރަންޖެހުން ފަދަ ކަންކަން ވެސް ހިމަނާފައިވެއެވެ.
މި މަޤާމަށް ހޮވޭ ފަރާތަށް މަހަކު 2000 ރުފިޔާގެ އުޖޫރައެއް ލިބޭނެއެވެ. އަދި މި ވަޒީފާގެ މުއްދަތަކީ 12 މަސް ދުވަހެވެ. މި މަޤާމަށް ކުރިމަތިލާ ފަރާތްތަކުގެ ތެރެއިން، ލިބިފައިވާ ތަޢުލީމާއި، ތަޖުރިބާ އަދި އިންޓަވިއުއިން އެންމެ މަތިން ޕޮއިންޓް ލިބޭ ފަރާތެއް ހޮވޭނެކަމަށް ކައުންސިލުން މަޢުލޫމާތު ދީފައިވެއެވެ.
މި މަޤާމަށް ކުރިމަތިލާން ބޭނުންވާ ފަރާތްތަކުން 2025 ވަނަ އަހަރުގެ ޖޫން މަހުގެ 19 ވަނަ ދުވަހުގެ 14:00 ގެ ކުރިން ލިޔެކިޔުންތައް ހުށަހަޅަން އެ އިޢުލާންގައި ވެއެވެ. މީގެ އިތުރުން މަސައްކަތް ކޮށްދިނުމަށް އެދި ހުށަހަޅާ ސިޓީއާއެކު ދިވެހި ރައްޔިތެއްކަން އަންގައިދޭ ކާޑުގެ ދެ ފުށުގެ ސާފު ކޮޕީ އާއި މި ދާއިރާއިން ލިބިފައިވާ މަސައްކަތުގެ ތަޖުރިބާގެ ލިޔުން ހިމަނަން ޖެހެއެވެ.
އިތުރު މަޢުލޫމާތު ހޯދުމަށް 6600006 ނަންބަރާ ގުޅުމަށް ކައުންސިލުން އަންގާފައިވެއެވެ.
