މިހާ ހިސާބުން ވިސްނާލަންޖެހެނީ ސަލާމަތުގެ އައްސޭރިއަކަށް ވާސިލުވާނެ މަގެއް ހޯދުމަށެވެ. ކުރިމަތިން ފެންނަން އޮތީ ކީރިތި ޤުރްއާނެވެ. ސަލާމަތްކަން އޮތީ ކީރިތި ޤުރްއާނަށް ރުޖޫޢަވެގެންނެވެ. އެހެނީ ކީރިތި ޤުރްއާނަކީ އިސްވެ ދެންނެވުނު ހުރިހައި ނުބައި ސިފަތަކެއްގެ ހަގީގީ ފަރުވާ، އެންމެ ފުރިހަމަ ގޮތުގައި ބަޔާންކޮށްދީފައިވާ މަސްދަރުކަމުގައި ވާތީއެވެ. އަދި މަތިވެރި އަޚުލާގީ މަފުހޫމްތަކުގެ ސަބަބުން އެންމެ ފުރިހަމަ ގޮތުގައި، ކުރިން ދެންނެވި ކަންކަމަށް ދޭންޖެހޭ "ވެކްސިންގެ ޑޯޒްތައް"، ބަލާޣާތްތެރިކަމުން ފުރިގެންވާ ޢިބާރާތްތަކުން ބަޔާންކޮށްދެއްވާފައި ވާތީ ވެސް މެއެވެ.
އަދި ވަރަށް މުހިންމު އެހެން ކަމެއްގެ ވާހަކަ ވެސް ދަންވާލާ ހިތްވެއެވެ. އީމާންކަމާއި އަޚުލާޤާ ގުޅިފައި ވަނީ ވަރަށް މަތިވެރި ދަރަޖައަކަށެވެ. ހަގީގީ އީމާންކަން ފުރިހަމަ ވާނީ އަޚުލާޤުގެ މަތިވެރި ސިފައިން ސިފަ ލިބި ޒީނަތްތެރިވެގެންނެވެ. ކީރިތި ރަސޫލާގެ ހަދީސް ބަސްފުޅެއްގެ މާނައިގައި ވެއެވެ.
"އީމާންކަމަކީ ދުލުން ބުނެވޭ ބަހާއި ހިތުން ގަބޫލުކުރާ ގަބޫލުކުރުމާއި ކުރެވޭ ޢަމަލުތަކެއްގެ މައްޗަށް ބިނާވެފައިވާ ކަމެކެވެ."
ހަމައެފަދައިން ކީރިތި ޤުރްއާނުގެ މޫރިތި އެތައް އާޔަތްތަކުން ވެސް މި ކަމަށް ދަލީލު ލިބެއެވެ. އަލްޤަލަމު ސޫރަތުގެ 4ވަނަ އާޔަތުގައި ވަޙީކުރައްވާފައި ވެއެވެ. "﴿وَإِنَّكَ لَعَلَىٰ خُلُقٍ عَظِيمٍ ٤﴾" (އަދި ހަމަކަށަވަރުން، ކަލޭގެފާނު ވަނީ މާތްވެގެންވާ ޚުލުޤުފުޅެއްގެ މަތީގައިކަން ކަށަވަރެވެ.)
މި އާޔަތުން ދޭހަވާ ގޮތުގައި އަޚުލާގަކީ އީމާންކަން ފުރިހަމަވުމުގެ އެންމެ މުހިއްމު އެއް އަސްލެވެ. އިޖުތިމާޢީ އަޚުލާޤިއްޔާތާ މެދު ކީރިތި ޤުރްއާނުގައި އައިސްފައިވާ ބައެއް އާޔަތްތައް ބަޔާންކޮށްލުމަކީ މުހިއްމު ކަމެއް ކަމަށް ދެކެމެވެ.
ފަރުދުންގެ މެދުގައި މުޢާމަލާތްކުރުމާ ގުޅޭގޮތުން ކީރިތި ޤުރްއާނުގައި ވަރަށް ޞަރީހަކޮށް އިރުޝާދުތައް ދެއްވާފައި ވެއެވެ. އެއީ ޢާއިލީ ގުޅުން ކަމަށް ވިޔަސް ނުވަތަ މުޖުތަމަޢުގެ އެހެނިހެން ފަރުދުންނާ އެކު އޮންނަންޖެހޭ ގުޅުން ކަމަށް ވިޔަސް ވެސް ނުވަތަ ގުޅިލާމެހިފައިވާ ވަރުގަދަ ގުޅުމެއް ގާއިމުކޮށްދިނުމުގެ މަގުޞަދުގައެވެ. އަދި ދީނީ މަޒުހަބީ ތަފާތުވުމެއް ނެތިއެވެ.
އަދި ޢާއިލީ ގުޅުން ދަމަހައްޓަންޖެހޭ ގޮތާ މެދު އައްނިސާ ސޫރަތުގެ 19 އާޔަތުގައި ވަޙީކުރައްވާފައި ވެއެވެ.
"وَعَاشِرُوهُنَّ بِالْمَعْرُوفِ ۚ" މާނައީ: (އަދި، ހެޔޮގޮތުގައި އެކަނބަލުންނާ އެކު އުޅޭށެވެ!)
ޒަވާޖީ ހަޔާތް ވާންޖެހޭނީ އެކަކު އަނެކަކަށް އިޙުތިރާމްކުރާ، އެކަކު އަނެކަކުގެ ބޭނުންތައް ދެނެގަނެ، ދެ ފަރާތުގެ މެދުގައި އިތުބާރު ޤާއިމުވެފައިވާ ހަޔާތަކަށެވެ. އަމާނާތްތެރިކަމާއި ޢަދުލުވެރިކަމަށް ޢިޝާރާތްކުރައްވައި އައްނިސާ ސޫރަތުގެ 58 ވަނަ އާޔަތުގައި ވަހީކުރައްވަނީ " إِنَّ اللَّهَ يَأْمُرُكُمْ أَن تُؤَدُّوا الْأَمَانَاتِ إِلَىٰ أَهْلِهَا وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ ۚ " މާނައީ، (ހަމަކަށަވަރުން، އަމާނަތްތައް، އޭގެ އަހުލުވެރިންނަށް އަދާކުރުމަށް، ﷲ ތިޔަބައިމީހުންނަށް އަމުރު ކުރައްވަތެވެ. އަދި، މީސްތަކުންގެ މެދުގައި ތިޔަބައިމީހުން ޙުކުމް ކުރާ ނަމަ، ޢަދުލަށް ޙުކުމް ކުރުމަށް ވެސް، އަމުރު ކުރައްވަތެވެ.)
މީސްތަކުންގެ މެދުގައި އޮންނަންޖެހޭ ހަމަހަމަކަމާއި ކަރާމާތްތެރިކަމާއި އިޙުތިރާމް ބަޔާންކޮށްދެއްވައި އަލްޙުޖުރާތު ސޫރަތުގެ 13 ވަނަ އާޔަތުގައި އަންގަވަނީ، " ﴿يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ ١٣﴾" މާނައީ، (އޭ މީސްތަކުންނޭވެ! ހަމަކަށަވަރުން، ތިމަންރަސްކަލާނގެ ތިޔަބައިމީހުން ހެއްދެވީ، ފިރިހެނަކާއި، އަންހެނެއްގެ ކިބައިންނެވެ. (އެބަހީ: އާދަމުގެފާނާއި، ޙައްވާގެފާނުގެ ކިބައިންނެވެ.) އަދި ތިމަންރަސްކަލާނގެ ތިޔަބައިމީހުން ތަފާތު ޤައުމުތަކަށާއި، ޤަބީލާތަކަށް ލެއްވީ، ތިޔަބައިމީހުން އެއްބަޔަކު އަނެއްބަޔަކަށް ތަޢާރަފް ވުމަށް ޓަކައެވެ. ހަމަކަށަވަރުން، ﷲގެ ޙަޟްރަތުގައި ތިޔަބައިމީހުންކުރެ އެންމެ މާތްކަންބޮޑީ، ތިޔަބައިމީހުންކުރެ އެންމެ ތަޤްވާވެރި މީހާއެވެ. ހަމަކަށަވަރުން، ﷲއީ، މޮޅަށް ދެނެވޮޑިގެންވާ، ޚަބީރުވަންތަ ރަސްކަލާނގެއެވެ.)
ކީރިތި ޤުރްއާނާމެދު ވިސްނާ ފިކުރު ކުރައްވާށެވެ! (ނުނިމޭ)
