ފެންވަޅު

ކުއްލިއަކަށް އެ ކުދީންގެ ތެރެއިން ކުއްޖަކު ޖެހި ހަން ބޯޅަ އައިސް ވެއްޓުނީ މަގުގެ މެދުގައި ފެންފުރަން އިން ސާނިހާގެ ވަޅަށެވެ. ސާނިހާގެ ތޫނު ކަޅި، ކުޅެން ތިބި ކުދިންނަށް އަމާޒުވީ އެ ހިސާބުންނެވެ. އޭނާގެ މޫނުގެ ކުލަވަރު ބަދަލުވެ ދެ ފަރާތަށް މޫނު ހޫރާލެވުނެވެ.

"ކިތައް ދުވަހު ބުނެފިން މިތަނަށް ބޯޅަ ނުޖެހާށޭ. މި ވަޅާ ދުރުގައި ތި ކުޅޭ ކުޅިވަރެއް ކުޅޭށޭ. ދެން ކިހައި ބޮޑުވެއްޖެ ކަމެއް މީ! މީހަކަށް ފެންފޮދެއް ފުރާލެވޭކަށް ވެސް ނޯންނާނެ." ސާނިހާގެ ނުރުހުމުގެ ބަސްތައް އިއްވީ ވަޅުކައިރިއަށް ބޯޅަ ބަލަން އައި ދެ ކުދިންނަށެވެ.

"މިހާރު މިއީ ތި ގޮތަށް ބޯޅަ ވެއްޓޭ ތިން ވަނަ ފަހަރު. ކޮންމެ ފަހަރަކު ތި ބޯޅަ ވެއްޓުމުން ނަގަން މިޖެނީ އެހައި ހާލުން. ބޯޅަ އޮންނަނީ ވަޅަށް ފެތިފައި. ފިތި ބާރުވެފައި. މީ ދެން ކިހައި ދެރަކަމެއް. ދެން މި ވަޅަށް ބޯޅަ ވެއްޓިއްޖެއްޔާ އެޔެއް ނުދޭނަން. ހަނދާން ބަހައްޓާތި." ވެއްޓުނު ބޯޅަ ނަގާދިނުމަށް ފަހު ސާނިހާގެ ފަހު ބަސް އެ ކުދީންނަށް އިއްވިއެވެ.

ސާނިހާއަކީ ރަށުގެ އާދައިގެ އާއިލާއެއްގެ ޒުވާން ޖިންސުއްލަޠީފެކެވެ. ފެންފުރުމުގެ މަސައްކަތުގައި  ރަށުގައި އެންމެ ޙަރަކާތްތެރި އެކަކެވެ. އޭނާއަކީ ބޮޑުމަގުގައި އަމިއްލަ ވަޅެއް ކޮނެ، މިލްކު ކޮށްގެން އުޅޭ ޒުވާނެކެވެ. އޭނާގެ ބެލުމުގެ ދަށުގައިވާ ވަޅުގެ ފެނަކީ މީރުކަމާއި ސާފުކަމުން މުޅި ރަށަށް މަޝްހޫރު ފެނެކެވެ. ރަށުގެ ގިނަ ބަޔަކު އެ ވަޅަށް ހަސަދަވެރިވާ ވެސް ވަޅެކެވެ.   

ސާނިހާ ގަބޫލުކުރާ ގޮތުގައި އެކި މީހުންނަށް ލިބެނީ އެކި ނަސީބެވެ. އޭނާއަށް ލިބިފައިވާ ވަޅާއި އެ ވަޅުގެ ފެނަކީ އޭނާގެ ނަސީބެވެ. އެހެން މީހުންނަށް އެވަޅު ނު ލިބުނީ ނަސީބު ނެތުމުންނެވެ. މިންވަރުފުޅުގައި އެކަން ވާން ނެތުމުންނެވެ. ސާނިހާގެ ފެންވަޅާ ވަރަށް ކައިރީގައި ދެ ފަރާތުގައި ދެ ވަޅެއް ހުރެއެވެ. ނަމަވެސް އެ ދެ ވަޅުގެ ފެނާ އަޅާބަލައި އިރު ސާނިހާގެ ވަޅުގެ ފެން މާ މީރެވެ. މާ ސާފެވެ. މާ ބޮޑަށް ވެސް ތަފާތެވެ. އެ ތަފާތުގެ ވާހަކަ އެންމެ ފާޅުކަން ބޮޑު ގޮތެއްގައި މީހުންގެ ތެރޭގައި ދައްކަނީ ސާނިހާއެވެ. އެހެން މީހުންގެ ގާތުގައި އެ ވަޅުގެ ފެނުގައި ޚާއްޞަ ކަމެއް ހުންނަކަމަށް ބުނަނީ ވެސް ހަމަ އޭނާއެވެ. ބައެއް މީހުން އެކަން ގަބޫލުކުރަން ބޭނުން ނުވިޔަސް އެއީ ހަމަ ހަގީގަތެވެ. އެ ވަޅުގެ ފެން ރަހަ ބެލި ކޮންމެ މީހަކު ވެސް އެކަމަށް ހެކިވެއެވެ.

މިއަދު ވެސް ހަވީރުވުމާ އެކު ނަލަ ހެދިލައިގެން ސާނިހާ މިސްރާބު ޖެހީ ރަށުގެ ބޮޑު މަގާ ދިމާއަށެވެ. އޭރު މަގުގެ އެކި ހިސާބުތަކުގައި ފެންފުރުމުގެ މަސައްކަތުގައި އަންހެންވެރީން ޙަރަކާތްތެރިވަމުން ދެއެވެ. އެއްބަޔަކު އެ މީހުންގެ ވަޅުން ފަސްކޮންނަ އިރު އަނެއް ބަޔަކު އެކަން ނިންމުމަށް ފަހު އަތުގައި އޮތް ތުޅާއިން ބަނޑިޔަލަށް ފެންފުރުމުގެ މަސައްކަތް ކުރަމުން ދަނީއެވެ.

ސާނިހާއަށް އާދެވުނީ ތަންކޮޅެއް ލަހުންނެވެ. އޭރު ސާނިހާގެ ވަޅާ ޖެހިގެން ހުރި ދެ ވަޅުގައި ދެ މީހުން ފެން ފުރާން ތިއްބެވެ.

"އައްދޭ ހާދަ އަވަހަކަށް އައިސް ތި ތިބީ. އަނެއްކާ ކަމެއް އޮތީތަ؟" އަވަސް ޙަރަކާތްތަކާ އެކު ވަޅު ކޮންކަމުން ދިޔަ ސާނިހާ ވާހަކަ ފެށިއެވެ.

"ނޫން. ކަމެއް އޮތީކީ ނޫން. އާދެވުނުލެއް ވަކި އަވަހެއް ވެސް ނޫން" ޢަލިޔާގެ ވަޅުގެ ކަނާތްފަރާތުގައި ހުރި ވަޅުން ފެންފުރާން އިން ނިޢުމާ ޖަވާބު ދިނެވެ.

"ސާނިހާއަށް މިއަދު ތި އާދެވުނީ ތަންކޮޅެއް ލަހުން. އަހަރެމެން މިއައީ އެހެންޏާ ވެސް އަންނަ ގަޑިއަށް ދޯ ނިޢުމާ." ނިއުމާއަށް ދޯ އަޅާލަމުން ވާހަކަދެއްކީ ސާނިހާގެ ވާތްފަރާތު ވަޅުގައި ފެންފުރަން އިން ހަސީނާއެވެ.

"މިއަދު ނޭނގެ މަށަށް ވީގޮތެއް. ހަވީރުވާން އުޅެނިކޮށް ނިދި އަންނަން ފެށީ. ނުނިދާން އުޅުމުން ވެސް އެކަން ވާގޮތެއް ނުވި. މަށަށް ހޭލުވުނީ އަމާ ގޮވީމާ" ކަންތައް ވީގޮތް ސާނިހާ އޮޅުން ފިލުވައިދިނެވެ.

" އޭތް! އިރުކޮޅެއް ކުރިން މި ތަނަށް މަންޖެ ހޯދަން އައި ހުޅަނގުކޮޅު ޒީނާ. މަށަށް ހީވަނީ ތި ވަޅުން ފޮން ފޮދެއް ބޭނުން ވެގެންހެން." ދައްކަމުން ދިޔަ ވާހަކަ ބަދަލުކޮށްލީ ނިޢުމާއެވެ.

" މަށަށް ވެސް ހީވަނީ އެ ކަހަލަ ކަމެއް ހެން. އަދި އަހަރެމެން ގާތު އެހި މި ވަޅުގެ ފެންދޯއޭ މިރަށުން އެންމެ މީރީ ވެސް. އަހަރެން ބުނިން ތިއެއް މަށަކަށް ނޭނގޭ. މަށަށް އެނގެނީ ތިވަޅުގެ ފެން ވަރަށް މީރުކަމޭ." ހަސީނާގެ ވާހަކައަށް އިތުރު ތަފުޞީލު ދިނީ ނިޢުމާއެވެ.

" އާނ! ތިވާނީ އެ ކަހަލަ ކަމަކަށް. އެކަމަކު ކިހިނެއް ރަށުގެ ހުރިހާ ރައްޔިތުންނަށް މި ވަޅުން ފެންދޭނީ. ނަސީބެއްނު އަވަހަށް ނާދެވުނުކަން. އެންމެ ފަހުން އެހެން މީހުންނަށް ފެންދޭން އުޅެގެން މި ވަޅުގެ ފެން ވެސް ވާނީ ލޮނުކަން ނޭނގެ." ސާނިހާ ވިސްނާލީ އެ ވަޅަށް ވެދާނެ ގޮތެކެވެ.

" ތިޔަ ބުނީ ހެޔޮކޮށް. މި ރަށުގައި ވަޅު ކޮންނާނެ ތަން މަދެއް ނުވާނެ. މި ބޮޑު މަގުގައި ވެސް އެތައް ވަޅެއް ކޮނެވިދާނެ. ވަޅު ކޮނުނީމާ ވީނު. ގައިމު ފެން ލިބޭނެތާ. އަހަރެމެން ވެސް އަމިއްލައަށް ވަޅު ކޮނެގެން މި ފެންނަގަނީ. ދުވަހަކު ވެސް މީހެއްގެ ގާތަށް ފެން ބަލައެއް ނުދަން. ނުވެސް ދާނަން" ނިޢުމާގެ ޚިޔާލަށް ހަސީނާއާއި ސާނިހާ ބޯޖަހާލިއެވެ.

"އާނ.. މިހާރަކަށް އައިސް ކޮންމެ މީހަކު ވެސް ބޭނުން ވަނީ އެހެން މީހުންގެ ވަޅު. ވަޅެއްގެ ފެން މީރުކަން އެނގިއްޖެ ނަމަ އެ ކަންތަކާ ޖެހުނީ. ގްރޫޕް ހަދާލާފައި މީހުންތައް އަންނާނެ. ގައިމު ވެސް އެހެން މީހެއްގެ އަތަށް މިވަޅެއް މަށެއް ނުދޭނަން. މި ވަޅުން ފެންފުރާނީ ހަމައެކަނި އަހަރެން." ސާނިހާ ނިންމައިގެން އިން ގޮތް އޭނާ ހާމަކުރިއެވެ. އެ ނިންމުން އޭނާގެ އެކުވެރީންގެ ކުރިމަތީ ސާނިހާ ހާމަކުރިއިރު މީގެ ކުރިން ސާނިހާ ކަންކުރަމުން އައީ ވެސް ހަމަ އެގޮތަށެވެ. އޭނާ ގަބޫލުކުރާ ގޮތުގައި އެ ވަޅަށް ރައްކާތެރިވުމަކީ އޭނާގެ ޒިންމާއެކެވެ. ކޮންމެ ކޮންމެ މީހަކު ފެންފުރުމަށް އެ ވަޅު ހަވާލުކުރުމަކީ އެ ވަޅަށް ކޮންމެ ފަދަ އެއްޗެއް ވެސް އަޅާފާނެކަމެވެ. އަމުދުން އޭނާ ނެތް ވަގުތެއްގައި ވަޅުން ފެންފުރަން ދިނުމަކީ އޭނާ ނުކުރާ ކަމެކެވެ. ގިނަ ފަހަރަށް މީހަކު ފެންބަލައި އައިޔަސް ސާނިހާ ފެންފުރައިދެނީއެވެ.

ފެންފުރާ ނިންމާލައި ވަޅަށް ފަސްލުމަށްފަހު ސާނިހާ ހިނގައި ގަތެވެ. އޭރު ފެންފުރާން ތިބި ގިނަ މީހުން ވެސް އުރުގައި ބަނޑިޔާތައް ޖަހައިގެން ގޭގެއާ ދިމާއަށް ދަނީއެވެ. ސާނިހާގެ ވިސްނުން ހުރީ އޭނާ ފެންފުރަމުންދާ ވަޅާ މެދުއެވެ. ގިނަ ބަޔަކު އެ ވަޅުގެ ފެންމީރުވެގެން އެ ވާހަކަ ދައްކާތީ އެކަމާ މެދުއެވެ. ބައެއް މީހުންގެ ނުރުހުން ލިބޭތީ އެކަމާ މެދުއެވެ.

"ދަރިފުޅާ! ކީއްވެތަ އެހެން މީހުން ފެންފުރަން ފެން ވަޅު ނުދެނީ. މިއަދު ވެސް މީހަކު ބުނެފި އެ މީހުންނަށް ފެންބަނޑިޔަލެއް ދޭށޭ ބުނީމާ ދަރިފުޅު އެ ކަން ކޮށް ނުދިން ވާހަކަ. އެހެން ހަދާކަށް ނުވާނެއްނު." ފެންބަނޑިޔަލާއެކު ގެއަށް ވަން ސާނިހާގެ ގާތު މަންމަ ކުރީ ޝަކުވާއެވެ.

"ދެން މަންމާ! ތި ނޫން ވާހަކައެއް ދައްކަން ވެއްޖެންނު. ކޮންމެ ދުވަހަކު ވެސް މަންމަ ތި ދައްކަނީ ތި ވާހަކަ. ބަލަ އެހެން މީހުން ވެސް ވަޅު ކޮންގެން ފެން ނެގީމާ ވީނު. އަހެރެންގެ ވަޅު ނޫނަސް ވަޅުތައް އެ ހުރީނު. އެ މީހުންގެ ގާތަށް ގޮސްގެން ފެން ހޯދަން ވީނު." މަންމަގެ ވާހަކަތަކުން ސާނިހާ ހިތްހަމަ ނުޖެހުނެވެ.

"ބައެއް މީހުން އުޅެނީ މި ވަޅު ލޮނުކޮށްލަން ވެގެން. މި ވަޅުގެ މީރުކަމަށް ހަސަދަވެރިވެގެން. އެހެން ނޫންނަމަ ކޮންމެ ދުވަހަކު މީހަކު ފެން ބޭނުންވެގެނެއް ނާންނާނެ." ސާނިހާއަށް ވިސްނޭ ގޮތް އެއްވެސް ޖެހިލުމެއް ނެތި އޭނާގެ މަންމަގެ ކުރިމަތީ ހުށަހެޅިއެވެ. މަންމައަށް ހުރެވުނީއެވެ. ބުނާނީ ވެސް ކީކޭ ހެއްޔެވެ؟

ޖެހިގެން އައި ދުވަހު މެންދުރެއް ނުވެއެވެ. ސާނިހާ ފެންވަރައިގެން ރީތިވަނީއެވެ. އަތުގައި އޮތް އެންމެ ހިތްގައިމު ހެދުން އިސްތިކޮށްލުމަށް ފަހު ގަޔަށް ހެޔޮވަރުކޮށްލަނީއެވެ.

"ދަރިފުޅާ! އާދެބަލަ ބަދިގެއަށް. މަންމަ އެބަޖެހޭ ބޭރަށް ގޮސްލަން" ބަދިގޭގައި ހުރެ މަންމަ ގޮވާލީ ސާނިހާއަށެވެ. އެ އަޑު ކަންފަތުގައި ޖެހުމާއެކު ސާނިހާގެ މަސައްކަތްތައް ހުއްޓުނެވެ. ހިތްހަމަ ނުޖެހުމުގެ ޝުޢޫރު ހިތުގައި ހިނގައިގަތެވެ.

"އަހަރެން މި ރީތިވަނީ. ފެންފުރަން ދާން ތައްޔާރު ވަނީ" އަޑަށް އިތުރު ބާރެއް ލަމުން މަންމައަށް އިވޭ ވަރަށް ސާނިހާ ޖަވާބުދިނެވެ. އެ ޖަވާބާއެކު މަންމައަށް މަޖުބޫރުވީ ސާނިހާ ފެންނަ ހިސާބަށް ދިއުމަށެވެ.

"ބަލަ އަދި 12 ވެސް ޖެހީކީ ނޫނެއްނު. މި އޮތް އަވިގަދަ ގަޑީގައި ކީއްކުރަން ފެންފުރަން ދަނީ. ދަރިފުޅު މޮޔަވީތަ؟" ކޮޓަރީގެ ދޮރުމަތީ ހުރެ މަންމަގެ ހިތްހަމަ ނުޖެހުން ފާޅުކުރިއެވެ.

"ބަލަ މަންމައަކަށް ނޭނގޭތަ ފެން ފުރަން އެންމެ ރަނގަޅު ގަޑިއަކީ މީ ކަމެއް. މި ގަޑީގައި އެހެން މީހަކު ފެންފުރާކަށް ނުދާނެކަމަށް. އެހެން މީހަކު ފެން ބަލާކަށް ވެސް ނުދާނެކަމެއް. އަނެއްކާ ފެން ވެސް ނުލާހިކު މީރުވާނެ" ސާނިހާގެ ވާހަކަ ތަފާތެވެ. އެއީ މީގެ ކުރިން އޭނާ ދެއްކި ވާހަކަތަކެއް ނޫނެވެ. އެއީ ދުވަހަކު ވެސް އެ ގަޑީގައި އޭނާ ކުރިކަމެއް ނޫނެވެ. އެ ވާހަކަތަކުން މަންމަގެ ބޮލުގައި ރިއްސާލިއެވެ. ކަމެއް ގޯސް ވެއްޖެކަން ދެނެގަތެވެ.

"ނޫން މި ގަޑީގައި ދާނެކަމެއް. މިއީ މީހުން ފެންފުރާން ދާ ގަޑިއެއް ނޫން." އެންމެ ފަހުން މަންމައަށް މަޖުބޫރުވީ އެކަން ހުއްޓުވާށެވެ. ސާނިހާ ހާހެއް ނުވިއެވެ. ޖެހިލުމެއް ވެސް ނުވިއެވެ. އޭނާ ކުރިހާ ވެސް ކަމަކީ ކޮޓަރީގެ ދޮރު ބަންކިޔާފައި ލެއްޕުމެވެ. އޭނާ ރުޅި އަތުވެއްޖެ ނަމަ ހަދާ ގޮތެވެ. މަންމަ ހިނގައިގަތީ އެކަން ހުއްޓުނުކަމުގެ ޔަގީންކަން ލިބިގަތުމަށް ފަހުއެވެ.

އިރުތަކެއް ފަހުން މީހަކު އައިސް ސާނިހާގެ މަންމަގާތު ސާނިހާ ފެންފުރަން އިން ވާހަކަބުންޏެވެ. އެ މަންމަ އެރީ ރަތަށެވެ.

"މަ އެ ވަރަށް ބުނީމާ ވެސް އެ ދިޔައީ ދޯ؟ ބަލަ މީ މީހުން ފެންބަލައި ދާ ގަޑިތަ؟ މި ރަތްދަކަ އަވީގައި ކޮން ފެނެއް ފުރާކަށް؟" ދުލުން ފަތިވަރުތަކެއް އަމުނަމުން ސާނިހާގެ މަންމަ ހިނގައިގަތީ ރަށުގެ ބޮޑު މަގާ ދިމާއަށެވެ. އަވަސް ހިނގުމުގައި އެ މަންމަ ސާނިހާގެ ގާތަށް ދެވުނު އިރު އޭނާ އިނީ ވަރުބަލި ވެފައެވެ. މުޅި މީހާ ވަނީ ދާހިތްލާ ފޯވެފައެވެ.

"ބަލަ މަ އެ ވަރަށް މި ގަޑީގައި ތިކަން ނުކުރާށޭ ބުނީމާ ވެސް ސިއްރުން އައީ ދޯ؟ މަންޖެ މޮޔަވީތަ؟ ހަމަ މިހާރު ހިނގާ ގެއަށް" ސާނިހާގެ މަންމަގެ ބަސްތައް އޭނާއަށް ނުއިވޭ ފަދައެވެ. ތުޅާއަށް ފެންފޮދެއް ނެގުމަށްފަހު އޭނާ ފެށީ ބޯށެވެ.

"ބަލަ އަޑެއް ނުއިވޭތަ؟ ގެއަށް ދާން ހިނގާށޭ" އަޑުގައި ނެތްތަނަށް އެ މަންމަ ހަޅޭއްލަވައި ގަތެވެ. އެ އަޑާއެކު ސާނިހާގެ އަތުގައި އޮތް ތުޅާ ދޫވިއެވެ. މުޅި މީހާގެ ވަރު ހުސްވި ކަހަލައެވެ. ސާނިހާއަށް މަޑުމަޑުން ތިރި ވެވުނެވެ. ސާނިހާގެ މަންމަގެ ހަޅޭކުގެ އަޑު މުޅި ހިސާބުގަނޑަށް ފެތުރުނެވެ. މަގޭ ދަރިޔާއޭ ގޮވަން ފެށިއަޑަށް އެކި ދިމަދިމާއިން މީހުންތައް ޖަމާވިއެވެ. އޭރު ސާނިހާ އޮތީ ހޭނެތިފައެވެ. ހަރަކާތް ހުއްޓިފައެވެ.

ސާނިހާ ނަގައިގެން ގެންދެވުނީ އޭނާގެ ގެޔަށެވެ. އެއްބަޔަކު ބުނަނީ އޭނާ ބޯއެނބުރީ ކަމަށެވެ. ރަތްދަކަ އަވީގައި ގިނަ އިރު އިނުމުގެ ސަބަބުން ހެޔަށް ގޮތްވީކަމަށެވެ. އަނެއް ބަޔަކު ކަންބޮޑުވީ ސާނިހާ އެއްވެސް ވާހަކައެއް ނުދައްކާތީއެވެ. އޭނާއާ ސުވާލުކުރުމުން އެ ސުވާލުތަކަށް ޖަވާބު ނުދޭތީއެވެ. ބައެއް މީހުން ފާޑުފާޑުގެ ވާހަކަތައް ރަށުތެރެއަށް ފެތުރީ އެހެންވެއެވެ.

އެތައް އިރަކު އެ ގޮތަށް އިނުމަށްފަހު ސާނިހާ ފުންމައިގެން ތެދުވިއެވެ. އަޑުގެ ކޮޅަށް ހަޅޭއްލަވަމުން ގޭތެއިން ބޭރަށް ދުއްވައިގަތެވެ. ގޭތެރޭގައި ތިބި މީހުންނަށް ލިބުނު ހާސްކަމާއެކު އެ މީހުން ވެސް ސާނިހާ ފަހަތުން ދުވަންފެށިއެވެ. ސާނިހާގެ ދުވެލި ބާރެވެ. ދެތިން މިނެޓެއް ނުވަނީސް ރަށުގެ ބޮޑުމަގާ ހަމަކުރިއެވެ. އޭނާ ގޮސް އޭނާގެ ފެންވަޅުގެ ކައިރިއަށް ހުއްޓި ވަޅު ކޮންނަން ފެށިއެވެ. އޭނާގެ ފަހަތުން އައި ފިރިހެނުންތައް އޭނާގެ އަތުގައި ހިފުމާއެކު ގަދަ ދައްކަންފެށިއެވެ. ފާޑެއްގެ ވަރުގަނޑެއް އަރުވާން ފެށިއެވެ. ދެން ފެށީ ހަޅޭއްލަވާށެވެ. އޭނާ ސަލާމަތް ކޮށްދިނުމަށް އެދިއެވެ. އޭނާ އެ ތަނުން ނުގެންދިއުމަށް އެދިއެވެ.

ސާނިހާއަށް ކަމެއް ވެފައިވާކަން ޔަގީންކުރެވުނީ އެ ހިސާބުންނެވެ. ރަށުތެރޭގައި ދައްކަމުން ދިޔަ ވާހަކަތަކަކީ ތެދުކަން ގަބޫލުކުރަން ޖެހުނީދެނެވެ. އޭނާ މޮޔަވެފައި ހުރިކަން އެނގުނީ ފަންޑިތަވެރިއަކު ގެނެސް ކިޔަވަން ފެށުމުންނެވެ. ރުގިޔާ ހަދައި ވާނުވާ ބެލުމުންނެވެ.

އެތައް އިރަކު ފެންކިޔެވުމުން ސާނިހާ ހަމައަކަށް އެޅުނެވެ. އޭނާގެ ހަށިގަނޑަށް ވެރިވެފައިވާ ބާރު ދޫވެގެން ދިޔައެވެ. އޭނާ ތެޅެމުން ދިޔަ ތެޅުމާއި ލަވަމުން ދިޔަ ހަޅޭކުގެ އަޑު ކެނޑިގެން ދިޔައެވެ. ކޮންމެ މީހަކު ވެސް ކުރަނީ ސުވާލެކެވެ. އެހެން ވާންވީ ކީއްވެ ހެއްޔެވެ؟ އޭނާއަށް އެހެން ހެދީ ކާކު ހެއްޔެވެ؟

އެ ސުވާލުގެ ޖަވާބު ވަރަށް ސާފެވެ. ރުގިޔާ ހެދި މީހާގެ ވާހަކަތަކުން އެ ކަން މެދުވެރިވީ ސާނިހާގެ ފެންވަޅުގެ ސަބަބުންކަން ޔަގީންވިއެވެ. ސާނިހާގެ ޢަމަލުތަކުން ވެސް ބައެއް މީހުން އެކަން ޔަގީންކުރިއެވެ.

މިއަދު ސާނިހާއަކީ ފެންފުރާން ދާ މީހެއް ނޫނެވެ. އެކަން ކުރާން އޭނާ ޖެހިލުންވެއެވެ. އޭނާ ގަބޫލުކުރާ ގޮތުގައި އޭނާއަށް ދިމާވި ހުރިހާ މުސީބާތެއް ދިމާވީ އޭނާ ގެންގުޅުނު ވަޅުގެ ސަބަބުންނެވެ. އެ ވަޅަށް މީހަކު ހެދި ސިހުރެއްގެ ސަބަބުންނެވެ. އެ ވަޅަށް ހަސަދަވެރިވީ ބައެއްގެ ސަބަބުންނެވެ. އެންމެ ފަހުން އެ ވަޅު ބޭނުން ކުރުން ހުއްޓާލީއެވެ. އެއްވެސް މީހަކު އެ ވަޅުގެ ފެން ބޭނުން ކުރާން ބޭނުންނުވީއެވެ. އެ ފެނުގެ މީރުކަން މުޅި ޢުމުރަށް ޙަރާމްކުރީއެވެ.