ޔޫތު ހަބްގައި ބޭއްވި ޚާއްޞަ ހަފުލާގައި ތުޅާދޫ ސިލްވަރޝައިން ކުލަބަށް މި އެވޯޑް ލިބުނީ ތަޢުލީމީ ދާއިރާއިންނެވެ. ތުޅާދޫ ސިލްވަރޝައިން ކުލަބާ މި އެވޯޑް ހަވާލުކޮށްދެއްވީ ޒުވާނުން ބާރުވެރިކުރުވުމާއި މައުލޫމާތާއި ފަންނާ ބެހޭ ވަޒީރު އިބްރާހީމް ވަހީދެވެ. ތުޅާދޫ ސިލްވަރޝައިން ކުލަބުން މި އެވޯޑާ ހަވާލުވެވަޑައިގަތީ ކުލަބުގެ މަސްޢޫލުވެރިޔާ ޒަކަރިއްޔާ ޢަލީއާއި ކުލަބުގެ ކުލަބުގެ ޗެއަރޕާސަން ޙުސައިން ޙަސަން (ހުސޭނުބެ) އެވެ.
ތުޅާދޫ ސިލްވަރ ޝައިން ކުލަބްގެ ފަރާތުން ކުލަބުގެ މަސްޢޫލުވެރިޔާ ޒަކަރިއްޔާ ޢަލީއާއި ކުލަބުގެ ކުލަބުގެ ޗެއަރޕާސަން ޙުސައިން ޙަސަން (ހުސޭނުބެ) އެވޯޑާ ހަވާލުވެވަޑައިގަންނަވަނީ
މި ރޭގެ ހަފުލާގައި ތުޅާދޫ ސިލްވަރޝައިން ކުލަބާއެކު ޖުމުލަ 7 ޖަމިއްޔާއަކަށް 7 ދާއިރާއަކުން ސިވިލް ސޮސައިޓީ އެވޯޑް ލިބިފައިވެއެވެ. އެއީ އަންހެނުންނާއި ކުޑަކުދިންނާއި ޒުވާނުންގެ ހައްގުތައް ހިމާޔަތްކޮށް އެފަރާތްތައް ބާރުވެރިކުރުވުމުގެ ދާއިރާ އިން ވިމެން އެމްޕަވާމަންޓް އެސޯސިއޭޝަން އޮފް ތިނަދޫއަށާއި ހާއްސަ އެހީއަށް ބޭނުންވާ ފަރާތްތަކަށް އެހީތެރިވުމުގެ ދާއިރާއިން ކެއާ ސޮސައިޓީއަށާއި ދިވެހިންގެ ސަގާފަތާއި އާދަކާދަތަކާއި، ތާރީހީ ތަރިކަ، ދިވެހިބަސް ދިރުވުމުގެ ދާއިރާއިން ޝާއިރުންގެ ވާދީއަށާއި ތިމާވެށީގެ ދާއިރާއިން ކްލީން މޯލްޑިވްސްއަށާއި ސިއްހީ ދާއިރާ އަދި ދުޅަހެޔޮ މުޖްތަމަޢުއަކަށް މަސައްކަތް ކުރުމުގެ ދާއިރާއިން އަލްޒައިމާ ސޮސައިޓީ އޮފް މޯލްޑިވްސްއަށާއި މަސްތުވާ ތަކެތިން މުޖްތަމައު ރައްކާތެރިކުރުމުގެ ދާއިރާއިން ގިރިންދާއަށާއި ތަޢުލީމީ ދާއިރާއިން ތުޅާދޫ ސިލްވަރޝައިން ކުލަބަށެވެ.
2025ވަނަ އަހަރު ސިވިލް ސޮސައިޓީޫ އެވޯޑް ލިބުނު ޖަމިއްޔާތަކުން އެވޯޑާ ހަވާލުވެވަޑައިގެންނެވި ބޭފުޅުން ވަޒީރުގެ އަރިހުގައި
ސިވިލްސޮސައިޓީ އެވޯޑް ލިބުނު ތުޅާދޫ ސިލްވަރޝައިން ކުލަބަކީ 1971 ވަނަ އަހަރުގެ ޖަނަވަރީ މަހުގެ 20ވަނަ ދުވަހު ސަރުކާރުގައި ރަޖިސްޓްރީ ކުރެވިގެން ހިންގަމުން އަންނަ ކުލަބެކެވެ. އެ ކުލަބަކީ ރާއްޖޭގައި ރަޖިސްޓްރީކޮށްގެން ހިންގާ ކުލަބުތަކުގެ ތެރެއިން ދެވަނައަށް އެންމެ ގިނަ ދުވަސްވީ ކުލަބެވެ. މި ކުލަބުން ތުޅާދޫއަށާއި ތުޅާދޫ ރައްޔިތުންނަށް ދެމުން އަންނަ އެންމެ މުހިންމު އެއް ޚިދުމަތަކީ ޕްރީސްކޫލު ޚިދުމަތެވެ. ތުޅާދޫ އެތައް ބައެއް އެދުމުގެ މަތިން ތުޅާދޫ ސިލްވަރ ޝައިން ކުލަބުން "ތުއްތުކުދިންގެ ޕްރީ ސްކޫލް"ގެ ނަމުގައި ޕްރީ ސްކޫލެއް ރަޖިސްޓްރީކޮށް ތުޅާދޫގައި ޚިދުމަތް ދޭންފެށީ 2003ވަނަ އަހަރުއެވެ. އެ އަހަރުން ފެށިގެން މިއަދާ ހަމައަށް ކުރިއަށް ގެންދާ އެ ޚިދުމަތަކީ ތަޢުލީމީ ޖީލެއް ތުޅާދޫގައި އުފެއްދުމަށް ކުލަބުން ވަމުން އަންނަ މަތިވެރި ގުރުބާނެކެވެ.
