މި ހަތަރު ޓީމު ސެމީ ފައިނަލަށް ދަތުރުކުރީ ދެ ގުރޫޕަށް ބަހާލައިގެން ކުޅެވުނު މެޗުތަކުން އެންމެ ގިނަ ޕޮއިންޓް ހޯދައިގެންނެވެ. މި މުބާރާތުގެ ސެމީ ފައިނަލް މެޗުތައް އޮންނާނީ މި ސެޕްޓެންބަރު މަހުގެ 22ވާ ހޯމަ ދުވަހުއެވެ. ސެމީ ފައިނަލް ފުރަތަމަ މެޗުގައި ބައްދަލުކުރާނީ ދެކުނު ކަންމަތި ޓީމާއި އަދި ނޮރިންމަ ޓީމެވެ. ސެމީފައިނަލް ދެވަނަ މެޗުގައި ބައްދަލުކުރާނީ ފަތްމިނި ޓީމާއި ޒެފަރސް ސްޕޯޓްސް ކްލަބެވެ.
މި މުބާރާތުގައި މިރޭ ކުޅެވުނު ފުރަތަމަ މެޗުގައި އެފް 12 އަދި ޒެފަރސް ސްޕޯޓްސް ކްލަބް ބައްދަލުކުރި މެޗުގެ ފުރަތަމަ ހާފު ނިމިގެން ދިޔައިރު ވެސް ދެ ޓީމުގެ ފަރާތުން ފެނިގެންދިޔައީ ވަރަށް އެއްވަރުގެ ކުޅުމެކެވެ. ނަތީޖާއެއްގެ ގޮތުން ދެ ޓީމު ވެސް އޮތީ އެއްވަރުވެފައެވެ. މެޗުގެ ދެވަނަ ހާފު ފެށިގެން ކުޅެމުން ދިޔަވަރަކަށް ޒެފަސްއިން މެޗުގެ ކޮންޓްރޯލް ނަގައި ލީޑު ފުޅާކުރަމުން ދިޔައެވެ. 10-5 ން މެޗް ކާމިޔާބުކުރީ ޒެފަރސް ސްޕޯޓްސް ކްލަބެވެ. މެޗްގެ މޮޅުކުޅުންތެރިއަކަށް ހޮވުނީ ޒެފަރސް ސްޕޯޓްސް ކްލަބްގެ ޖާޒީ ނަމްބަރު 7 މިޝްކާއެވެ.
މިރޭ ކުޅެވުނު ދެވަނަ މެޗުގައި ބައްދަލުކުރީ ނޮރިންމަ އަދި ފަތްމިނި ޓީމެވެ. މި މެޗް 36-10ން ކާމިޔާބު ކުރީ ފަތްމިނި ޓީމެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ފަތްމިނި ޓީމުގެ ޖާޒީނަމްބަރު 3 ޔުސްރާ ޔޫސުފެވެ.
